‎Қазақистан йәттису уйғур музика мәктипи оқуғучилири тунҗи консертини өткүзди

Мухбиримиз гүлчеһрә
2016-11-15
Share
yettisu-uyghur-muzika-mektipi-1.JPG Қазақистанниң алмата райониға җайлашқан байсейит йезисида ечилған "йәттису уйғур музика мәктипи" ниң оқутқучи вә оқуғучилири.
Photo: RFA

Қазақистанниң алмата райониға җайлашқан байсейит йезисида ечилған "йәттису уйғур музика мәктипи" ниң оқутқучи вә оқуғучилири, икки ай җиддий вә әтраплиқ тәйярлиқ қилип, ата, ана вә устазлириға тунҗи қетимлиқ консертини 11 ноябир күни көрсәтти вә бу арқилиқ мәктәпниң рәсмий ечилиш мурасими байсейит йезисида мувәппәқийәтлик болуп өтти. Қазақистандики уйғурларға хас тунҗи музика мәктипи болған йәттису уйғур музика мәктипи, баш штаби әнглийәдики агахан музика фондиниң ярдими билән қурулған болуп, мәктәпниң қурулуш вә алақә ишлирида асаслиқ рол ойниған, лондонда паалийәт елип бериватқан мәдәнийәт тәтқиқатчиси, лондон уйғур ансамбилиниң қурғучиси әзиз әйса әпәндиму мәктәпниң ечилиш мурасимиға алаһидә тәклип билән қатнашқан. Зияритимизни қобул қилған әзиз әйса әпәнди консерт вә мурасимниң өзини вә байсейттики устазлар, ата, анилар вә балиларни охшашла һаяҗанға салғанлиқини, қисқиғиғә икки ай вақит ичидә йәттису мәктипидики устаз вә оқуғучиларниң зор тиришчанлиқ көрсәткәнликини, уларниң қизғинлиқи вә қолға кәлтүргән нәтиҗилиридин толиму үмидләнгәнликини билдүрди.

Дутар, тәмбүр, раваб, даплар билән орунланған бу муңлуқ уйғур классик нахша, музикилирини, муқамлирини музика мәктипидә тәрбийә көрүватқиниға әмдила икки ай болған 6 яштин 11 яшқичә болған уйғур балилириниң орунлаватқанлиқиға ишинәмсиз? бу қайнақ консертни тәйярлиған байсейт мәһәллисидики йәттису уйғур музика мәктипиниң оқутқучилири, улар 11-ноябирдики, мәктипиниң ечилиш мурасимини өзлириниң консерти арқилиқ күтүвалған. Мәзкур консертқа қатнишиш үчүн мәхсус лондондин йетип кәлгән, мәктәпниң қурулушиға асас қилған вә асаслиқ хизмәтләрни қилған, консерттики әң асаслиқ тамашибин әзиз әйса әпәндиму, балиларниң икки айдики илгирилишидин һәйран қалған. У болупму өзиниң уйғур нахша, музика сәнитигә иштияқ бағлиған балиларда шәкилләнгән бир хил роһлуқ кәйпияттин бәкрәк хош болғанлиқини билдүрди.

Консерт мәйданида әзиз әйса әпәндиниң ярдими билән, биз йәнә телефон арқилиқ мәктәпниң асаслиқ оқутқучи, устазлири биләнму тонуштуқ.

Әзиз әпәнди йәнә оюн көрсәткән оқуғучилар билән қизғин сөһбәтләшти.

Биз йәнә телефон арқилиқ алматадики уйғурлар юрти байсейт хәлқини сөйүндүргән вә уларға зор үмидләрни бәргән, йәттису уйғур музика мәктипи мудирийитиниң, мәктәпниң нәтиҗилирини хуласиләш вә кәлгүси пиланлири һәққидики мәхсус сөһбәт йиғиниғиму иштирак қилдуқ.

Мәктәпниң асаслиқ музика оқутқучиси, йетәкчиси, пешқәдәм устаз әзиз турдийеф әпәнди, мәктәпниң тунҗи консертидин, устаз болуш сүпити билән нотилардин өзиниң әң һаяҗанда икәнликини вә устазлар һәмдә балиларниң бу икки ай җәрянидики тиришчанлиқи вә тунҗи консерттики ипадисидин бәкму мәмнун болғанлиқини ейтти. У, "балилиримиз мукәммәл бир сәһнә әсирини намаян қилди" деди. У ахирида өзиниң уйғур музика мәдәнийитиниң варислиридин вә мәктәпниң кәлгүсидин зор үмидләргә толғанлиқини хушаллиқ билән ипадә қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт