Түркийә дөләтлик оқуш мукапатиға илтимас қилиш давамлашмақта

Ихтиярий мухбиримиз әркин тарим
2017-03-13
Елхәт
Пикир
Share
Принт
Түркийә баш министирлиқиға қарашлиқ чәтәлләрдики түркләр вә қериндаш милләтләр башқармисиниң тор бети.
Түркийә баш министирлиқиға қарашлиқ чәтәлләрдики түркләр вә қериндаш милләтләр башқармисиниң тор бети.
turkiyeburslari.gov.tr

Түркийә баш министирлиқиға қарашлиқ чәтәлләрдики түркләр вә қериндаш милләтләр башқармисиниң Тор бетидики Еланға асасланғанда, түркийәниң 2017-йиллиқ толуқ курс оқуш мукапатиға илтимас қилиш 3-айниң 1-күни башлинип, 3-айниң 30-күнигичә давамлишидикән. Илтимас қилғучи оқуғучилар бу 30 күн ичидә илтимас қилса болидикән.

Мәзкур тор Бетидики еланда дейилишичә, бакалаврлиқ үчүн илтимас қилидиғанларниң яш чәклимиси 1996-йили 1-айниң 1-күнидин кейин туғулған болуши, дохтурлуқ, чиш дохтурлуқ вә доригәрлик кәсиплиригә илтимас қилидиғанларниң толуқ оттура мәктәп оттуричә дәрс нәтиҗиси кәм дегәндә 90 номурдин аз болмаслиқи вә башқа кәсипләргә илтимас қилидиғанларниң толуқ оттура мәктәп оттуричә дәрс нәтиҗиси әң аз 70 номурдин төвән болмаслиқи керәк икән.

Мәркизи истанбулда турушлуқ уйғур академийәси баш катипи батур қараханли әпәнди түркийә дөлити тәрипидин бериливатқан бу оқуш пулиниң немиләрни өз ичигә алидиғанлиқи тоғрисида мәлумат бәрди. Униң ейтишичә, оқуғучиларниң айлиқ оқуш мукапати 700 түрк лираси, йәни тәхминән 200 америка доллири вә бир йил түркчә өгиниш һәқсиз оқуш болидикән.

Оқуғучиларға һәқсиз ятақ вә түркийәгә тунҗи қетим келиш вә оқуш пүттүргәндин кейин қайтиш айропилан беләтлири елип берилидикән. Саламәтлик суғуртиси болидикән.

Түркийәдә оқуватқан абдувәли әпәнди түркийә дөлити тәрипидин берилидиған 700 түрк лирасиниң бир айлиқ расхот үчүн йетидиғанлиқини баян қилди.

Узун йил шәрқий түркистан вәхпидә ишләш җәрянида уйғур оқуғучиларни оқутуш ишлириға мәсул болған һамит гөктүрк әпәнди, түркийәдә оқуғучи оқутуш ишлирини дәсләптә уйғурларниң башлиғанлиқини баян қилди.

Һамит гөктүрк әпәнди кейинки 30 йил ичидә түркийәдә оқуп йетишкән һәр қайси түркий милләтләр арисида уйғурларниң мувәппәқийәтлик болуш нисбитиниң төвән болғанлиқини баян қилди. Профессор алимҗан инайәт әпәнди уйғур оқуғучиларниң мувәппәқийәтлик болалмаслиқидики сәвәбниң һәр хил икәнлики, һазир оқуғучи таллаш системисиниң өзгәргәнлики, бундин кейин уйғур оқуғучиларниң мувәппәқийәтлик болуш нисбитиниң юқири болидиғанлиқини баян қилди.

Батур қараханли әпәнди түркийәдә оқушниң башқа йоллири тоғрисида мәлумат бәрди.

2016-Йили түркийәдә бакалаврлиқ, магистирлиқ вә докторлуқ унванлири үчүн оқушқа 180 дөләттин 90 миң оқуғучи илтимас қилған болуп, буниң ичидин тәләпкә лайиқ болған 6 миң әтрапида оқуғучи қобул қилинған.

Һазир түркийәдә дөләт оқуш пули елип оқуватқан уйғур оқуғучиларниң сани 250 әтрапида икән.

Пикирләр (0)
Share
Толуқ бәт