Türkiye döletlik oqush mukapatigha iltimas qilish dawamlashmaqta

Ixtiyariy muxbirimiz erkin tarim
2017-03-13
Share
turkiyede-oqush-mukapat-2017-iltimas.jpg Türkiye bash ministirliqigha qarashliq chet'ellerdiki türkler we qérindash milletler bashqarmisining tor béti.
turkiyeburslari.gov.tr

Türkiye bash ministirliqigha qarashliq chet'ellerdiki türkler we qérindash milletler bashqarmisining Tor bétidiki Élan'gha asaslan'ghanda, türkiyening 2017-yilliq toluq kurs oqush mukapatigha iltimas qilish 3-ayning 1-küni bashlinip, 3-ayning 30-künigiche dawamlishidiken. Iltimas qilghuchi oqughuchilar bu 30 kün ichide iltimas qilsa bolidiken.

Mezkur tor Bétidiki élanda déyilishiche, bakalawrliq üchün iltimas qilidighanlarning yash cheklimisi 1996-yili 1-ayning 1-künidin kéyin tughulghan bolushi, doxturluq, chish doxturluq we dorigerlik kesiplirige iltimas qilidighanlarning toluq ottura mektep otturiche ders netijisi kem dégende 90 nomurdin az bolmasliqi we bashqa kesiplerge iltimas qilidighanlarning toluq ottura mektep otturiche ders netijisi eng az 70 nomurdin töwen bolmasliqi kérek iken.

Merkizi istanbulda turushluq Uyghur akadémiyesi bash katipi batur qaraxanli ependi türkiye döliti teripidin bériliwatqan bu oqush pulining némilerni öz ichige alidighanliqi toghrisida melumat berdi. Uning éytishiche, oqughuchilarning ayliq oqush mukapati 700 türk lirasi, yeni texminen 200 amérika dolliri we bir yil türkche öginish heqsiz oqush bolidiken.

Oqughuchilargha heqsiz yataq we türkiyege tunji qétim kélish we oqush püttürgendin kéyin qaytish ayropilan béletliri élip bérilidiken. Salametlik sughurtisi bolidiken.

Türkiyede oquwatqan abduweli ependi türkiye döliti teripidin bérilidighan 700 türk lirasining bir ayliq rasxot üchün yétidighanliqini bayan qildi.

Uzun yil sherqiy türkistan wexpide ishlesh jeryanida Uyghur oqughuchilarni oqutush ishlirigha mes'ul bolghan hamit göktürk ependi, türkiyede oqughuchi oqutush ishlirini deslepte Uyghurlarning bashlighanliqini bayan qildi.

Hamit göktürk ependi kéyinki 30 yil ichide türkiyede oqup yétishken her qaysi türkiy milletler arisida Uyghurlarning muweppeqiyetlik bolush nisbitining töwen bolghanliqini bayan qildi. Proféssor alimjan inayet ependi Uyghur oqughuchilarning muweppeqiyetlik bolalmasliqidiki sewebning her xil ikenliki, hazir oqughuchi tallash sistémisining özgergenliki, bundin kéyin Uyghur oqughuchilarning muweppeqiyetlik bolush nisbitining yuqiri bolidighanliqini bayan qildi.

Batur qaraxanli ependi türkiyede oqushning bashqa yolliri toghrisida melumat berdi.

2016-Yili türkiyede bakalawrliq, magistirliq we doktorluq unwanliri üchün oqushqa 180 dölettin 90 ming oqughuchi iltimas qilghan bolup, buning ichidin telepke layiq bolghan 6 ming etrapida oqughuchi qobul qilin'ghan.

Hazir türkiyede dölet oqush puli élip oquwatqan Uyghur oqughuchilarning sani 250 etrapida iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet