Türkiyede tunji qétim Uyghur oqughuchilarni terbiyilesh yighilishi ötküzüldi

Ixtiyariy muxbirimiz erkin tarim
2018.01.29
turkiye-uyghur-oqughuchilarni-terbiyelesh-yighilishi-01.JPG Tunji qétimliq Uyghur oqughuchilarni terbiyilesh yighilishidin bir körünüsh. 2018-Yili, yanwar. Zongguldaq, türkiye.
RFA/Erkin Tarim

Türkiyening zongguldaq wilayitining eregli nahiyiside tunji qétim Uyghur aliy mektep oqughuchilirini terbiyilesh kursi ötküzüldi. 22-Yanwardin 29-yanwar künigiche ötküzülgen pa'aliyetke türkiyening herqaysi uniwérsitétlirida oxshimaydighan kesiplerde oquwatqan bir qisim oqughuchilar ishtirak qildi. 7 Kün dawamlashqan pa'aliyette nuqtiliq halda Uyghurlarning tarixi, bügünki weziyiti, tili, istratégiyilik tepekkur, mes'uliyet, mejburiyet we diniy ilim témiliri boyiche léksiye bérildi.

Bu heqtiki ziyaritimizni qobul qilghan qehrimanmarashtiki sütchi imam uniwérsitéti diniy ilimler fakultéti oqughuchisi, istanbuldiki sultan satuq bughraxan wexpining xanim-qizlar komitéti mes'uli iparxan Uyghur xanim bu pa'aliyetni uyushturushtiki meqsitining her qaysi uniwérsitétlarda oquwatqan Uyghur oqughuchilarning ang sewiyisini östürüsh, weten dewasigha bolghan tonushini yuqiri kötürüshtin ibaret ikenlikini bayan qildi. 

Sultan satuq bughraxan wexpi burunmu bu xil terbiyilesh yighilishlirini uyushturghan bolsimu, biraq bu qétimqisi peqet uniwérsitét oqughuchiliri üchün ötküzülgen tunji yighilish iken. Iparxan Uyghur xanim 29-yanwar küni xulase qilish yighini ötküzülgenlikini, oqughuchilarning bu heqte otturigha qoyghan pikirlirige asaslan'ghanda yighilishning muweppeqiyetlik ötkenlikini bayan qildi. 

Sultan satuq bughraxan wexpi xanim-qizlar komitéti mes'uli iparxan Uyghur xanim burun Uyghur uniwérsitét oqughuchilirining bu xil yighilishlargha qorqup kélelmeydighanliqini, bu yil qatnishish üchün köp sanda oqughuchining iltimas qilghanliqini we buning seweblirini bayan qildi. 

Biz bu yighilishqa ishtirak qilghan uniwérsitét oqughuchisi ayshem memet xanim ziyaritimizni qobul qilip, bu qétimqi pa'aliyetning Uyghur yashlirida milliy roh tikleshke paydiliq bolghanliqini tekitlidi. 

Bu pa'aliyetke ishtirak qilghan oqughuchi subinur 7 künlük pa'aliyette özining tepekkur da'irisining échilghanliqini bayan qildi. 

Bu kursta léksiye sözligen enqerediki hajettepe uniwérsitéti oqutquchisi doktor erkin ekrem bu yil türkiyediki herqaysi uniwérsitét tiki Uyghur oqughuchilirining tunji qétim bundaq bir kursqa aktip qatnishishidiki sewebler üstide toxtaldi. 

Doktor erkin ekrem ependi chet'eldiki Uyghur oqughuchilargha bu xil terbiyilesh yighilishlirini ötküzüshning Uyghur dewasi üchün paydiliq bolidighanliqini, bundaq pa'aliyetlerni dunyaning herqaysi jayliridiki Uyghurlarningmu ötküzüshi kéreklikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.