Түркийә зафәр партийәси "мән хитайлиқ" дегән түркийә мадо ширкитиниң хоҗайинини қаттиқ әйиблиди

Ихтиярий мухбиримиз әркин тарим
2021-11-23
Share
MADO Марожни ширкитиниң хоҗайини мәһмәт саит канбур.
Social Media

Өткән ай әнқәрәниң чукурамбар мәһәллисидики мадо марожни ширкитиниң шөбисидә дуня уйғур қурултийи вәхписи тәрипидин ечилмақчи болған мухбирларни күтүвелиш йиғинини, хитайда мәбләғлириниң зиянға учришидин әнсирәп әмәлдин қалдурған мәзкур ширкәтниң хоҗайини мәһмәт саит канбур, -11айниң-16күни түркийәдә хитай компартийәсиниң тәшвиқатини елип бериватқан, хитай мәркизи хәлқ телевизийәсиниң түркчә бөлүминиң зияритини қобул қилип: "инсанниң икки вәтини болиду, бири туғулған җайи, йәнә бири қорсиқи тойған йәр, мән бүгүн хитайда қорсиқимни тойдуруватқан болсам мәнму хитайлиқ", дегән.

Мәһмәт саит канбурниң бу сөзлири түркийәдики иҗтимаий таратқуларда қаттиқ тәнқидкә учрапла қалмастин аммиви тәшкилатлар вә сиясий партийәләрниңму қаттиқ наразилиққа учримақта. 11-Айниң 21-күни зафәр партийәсиниң рәиси үмид өздағ әпәнди мадо марожни ширкитиниң алдида баянат елан қилип, хәлқ аммисини мадо марожнисини байқут қилишқа чақириқ қилди. У, мундақ деди: "мадо, бир түрк ширкитидур. Бир қанчә һәптә бурун бир гуруппа уйғур хитайниң уларға елип бериватқан бесим сияситигә наразилиқ билдүрүш үчүн мадо ресторанида мухбирларни күтүвелиш йиғини өткүзмәкчи болғанда, ' хитайда салған мәбләғлирим зиянға учримисун дәп‹, 'мән хитайлиқ, хитайға қарши паалийәт өткүзүшкә рухсәт қилмаймән‹дәп мухбирларни күтүвелиш йиғинини өткүзүшкә йол қоймапту. Тоғриси мән һаятим бойичә бундақ адәмни йиргәндүридиған, миллий кимликтин йоқсул, адәмниң көңлини илиштуридиған баянатни наһайити аз аңлап баққан идим. Бир адәм қандақму азғина пул үчүн түрк вә мусулман кимликини сатиду? һәй адәм бундақ қилишниң орниға хитайниң зулуми астида яшаватқан уйғур қериндашлириңға бир пиялә чай қуюп бәрсәң болмамти? биз зафәр партийәси болуш сүпитимиз билән мадо ширкитигә болған наразилиқимизни бу йәрдә өткүзүш биләнла қалмай, түркий милләтләргә тил узатқан кишиләргә қарши һәр заман йәр йәрдә авазимизни чиқиришқа давам қилимиз".

Истанбулда паалийәт елип бериватқан д у қ вәхписиниң рәиси абдурешит абдухәмит әпәнди өткән ай бейҗиң қишлиқ олимпик мусабиқисини байқут қилиш үчүн мадода мәтбуат баянати елан қилиш йиғини ачмақчи болғанда мәмәт канбур әпәнди рухсәт қилмиғачқа мадо дукининиң йенидики бир залда өткүзгәнликини, у вақитта ахбарат васитилиригә баянат бәргәнликини баян қилди.

У, 2017-йили җаза лагерлири мәсилиси оттуриға чиққандин кейин түркийәдә уйғурларға һесдашлиқ қилидиған кишиләрниң тезла көпийиватқанлиқини, сиясий партийәләрниң бу хил әһвалларни байқут қилишиниң зор әһмийәткә игә икәнликини баян қилди.

Мустафа ақинҗи исимлик киши тивиттер һесабида, "мадо ширкитиниң хоҗайининиң қорсиқи түркийәдә тойғаниди, түркийәдә тапқан пулини хитайға мәбләғ селип, қарним хитайда тойди, мән хитайлиқ дәпту, бу немә дегән иккийүзлимилик?".

Әсма қолҗу исимлик оқутқучи бу һәқтә тивиттерда инкас қилип мундақ язған: "уйғурларниң йиғин ечишиға рухсәт бәрмигән вә мән хитайлиқ дегән мадо ни байқут қилайли, униңдин марожни сетивелиш, хитайниң ирқий қирғинчилиқини қоллиғанлиқ болиду".

Көп санда әгәшкүчиси болған түрк сәнәтчи, путболчи, сиясийон вә парламент әзалириму мадо ширкити хоҗайини мәһмәт канбурниң "мән хитайлиқ" дегән мәзкур сөзлири орун алған видийосини тивиттерда һәмбәһирлиди вә униң бу сөзлирини әйибләп мадо марожнисини йемәсликкә чақирди.

Игилинишичә, мәркизи түркийәниң шәрқий җәнуби районидики қаһраманмараш райониға җайлашқан мадо маркилиқ марожни ширкитиниң 40 әтрапида дөләттә дуканлири ечилған болуп, түркийәдә 398 шөбә дукини мәвҗут икән. Мадо ширкити хитайниң шаңхәй вә йиву қатарлиқ бир қанчә шәһәрлиридә шөбилирини ачқан болуп, бундин кейин хитайниң башқа шәһәрлиридиму шөбә ачмақчи икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт