Мал дохтури қурбан рахманниң лагерда қийин-қистақтин өлгәнлики илгири сүрүлмәктә

Мухбиримиз шөһрәт һошур
2019-08-27
Елхәт
Пикир
Share
Принт
Хитай уйғур районида қурған йиғивелиш лагерлириниң бир. 2019-Йили 2-июн, атуш.
Хитай уйғур районида қурған йиғивелиш лагерлириниң бир. 2019-Йили 2-июн, атуш.
AFP

Кучалиқ муһаҗирлардин бири өткән һәптә радийомизға учур йоллап, куча ишхила йезилиқ мал дохтурханисиниң хадими қурбан рахманниң мушу айниң бешида лагерда өлгәнликини мәлум қилди. Игилинишичә, даириләр қурбан рахманниң җәситини аилисигә қайтурғанда униң хироендин зәһәрләнгәнликини ейтқан. Аилә әзалири бу изаһатқа һәйран болуп, өлүм сәвәбини ениқрақ билмәкчи болғинида сақчилар тәһдит селиш арқилиқ уларниң еғизини тувақлиған. Мухбиримизниң телефонини қобул қилған сақчи хадими ишхала мал дохтурханисидин икки кишиниң лагерға әкетилгәнлики, буниң бириниң қурбан рахман икәнликини дәлиллиди. Әмма у қурбан рахманниң өлүм учури һәққидә мәлумат берәлмиди.

Кучалиқ муһаҗирниң инкас қилишичә, бу йил 35 яш чамисидики мал дохтури қурбан рахман өткән йили мушу мәзгилдә хизмәт орни болған ишхила йезилиқ мал дохтурханисидин бешиға қара халта кийдүрүлүп елип кетилгән вә аридин бир йил өткәндә аилисигә җәсити қайтурулған. Телефонимизни қобул қилған кучадики бир сақчи хадими ишхиала мал дохтурханисидин икки кишиниң лагерға әкетилгәнлики, булардин бириниң абдурусул турсун, йәнә бириниң болса қурбан рахман икәнликини дәлиллиди. Инкаста дейилишичә, қурбан рахман иш орнидин әкетилгәндин кейин аввал куча наһийәлик қамақханида 3 һәптә тутуп турулған, андин яңақлиқ бағ дегән җайдики «тәрбийәләш мәркизи» гә йөткәлгән. Мәзкур сақчи хадими қурбан рахманниң қамақханидин җ х идарисиниң йенидики «3‏-тәрбийәләш мәркизи» гә йөткәлгәнликини дәлиллиди.

Инкаста дейилишичә, қурбан рахманниң аилә әзалири сақчилардин униң өлүм сәвәбини сориғинида сақчилар униң хироендин зәһәрләнгәнликини ейтқан вә хироенни қачан вә қәйәрдә чәккәнлики һәққидә чүшәндүрүш бәрмигән. Аилә әзалири бу сәвәбкә һәйран қалғанлиқини билдүргинидә сақчилар бу сәвәб һәққидә тәкрар соал соримаслиқ, сорашқа тоғра кәлсә өзлириму «тәрбийәләш» кә беришқа тәйярлиқ қилип қоюш һәққидә агаһландурған.

Инкасчи муһаҗир қурбан рахманниң 1‏-авғуст йеза игилик университетиниң чарвичилиқ кәспини пүттүргәнлики, униң ақ тамака чекиштәк бир адитиниң болмиғанлиқини илгири сүрди. Әмма мәзкур сақчи хадими қурбан рахманниң өлүм сәвәбини сориғинимизда униң 10 йил бурун ақ тамака чәккәнлики һәққидә җинайәт хатириси барлиқини ейтти. Биз униңдин қурбан рахманниң ақ тамакини әң йеқинда қачан вә қәйәрдә чәккәнликини сориғинимизда бу соалға алақидар рәһбәрләрдин җаваб елишимизни тәвсийә қилди. Қурбан рахманниң өзиниң алий мәктәптики савақдиши икәнликини баян қилған мәзкур инкасчи юрттики тонуш-билишлиридин аңлиғанлириға асасән, қурбан рахманниң тордин аталмиш «бөлгүнчилик» мәзмунидики лексийә аңлиғанлиқи үчүн лагерға әкетилгәнликини әскәртти. Мәзкур сақчи хадими қурбан рахманниң тутулушидики бу сәвәбниму инкар қилмиди. Инкаста қурбан рахманниң хизмәтдашлириниң «диний әсәбийлик» аламәтлирини паш қилишқа қисталғанлиқи вә у буни рәт қилғанлиқи үчүн қейин-қистаққа елинғанлиқи, қурбан рахманниң қейин-қистақтин өлгәнлик еһтималлиқи оттуриға қоюлған. Мәзкур сақчи хадими қурбан рахманниң қийин-қистақта өлгәнлик еһтималлиқи һәққидә еғиз ечишни кәскин түрдә рәт қилди вә бу һәқтә алақидар рәһбәрләр билән сөзлишишимиз керәкликини тәкитлиди.

Ишхиала йезисидики бир аһалиниң баянлиридин қурбан рахманниң икки пәрзәнти барлиқи, аялиниңму өзи тутулуп 3 айдин кейин лагерға әкетилгәнлики мәлум. Әмма униң өлүмидин аялиниң хәвири бар-йоқлуқи вә ериниң йүзини көрәлигән яки көрәлмигәнлики һазирчә мәлум әмәс.

Пикирләр (0)
Share
Толуқ бәт