Ömer qanat: “Malaysiya parlaménti re'isi teleplirimizge ijabiy jawab berdi”

Ixtiyariy muxbirimiz erkin tarim
2023.02.27
omer-qanat-malaysiya-1.jpg Dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat(soldin ikkinchi) ependi malaysiya parlaméntining re'isi johari abdul(soldin üchinchi) ependi bilen körüshti. 2023-Yili 24-féwral, malaysiya.
RFA/Erkin Tarim

24-Féwral dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat ependi bashchiliqidiki 4 kishidin terkib tapqan hey'etni malaysiya parlaméntining re'isi johari abdul ependi parlamént binasidiki ishxanisida qobul qilghan. Körüshüshte ömer qanat ependi malaysiya parlaméntining Uyghur qirghinchiliqini étirap qilip qarar maqullshini telep qilghan.

Ömer qanat ependining bildürüshiche, ularning malaysiyadiki eng chong ammiwi teshkilatlar, jem'iyet erbabliri we parlamént ezaliri bilen bolghan uchrishishliri ghelibilik, muweppeqiyetlik dawamlishiwatmaqtiken. U, bu qétimqi ziyaritining ünümlük we tarixiy ziyaret boluwatqanliqini tekitlidi.

Ömer qanat ependi d u q hey'itining malaysiya parlaméntining re'isi johari abdul ependi bilen bolghan körüshüshte Uyghurlargha wakaliten sun'ghan teklipliri heqqide toxtaldi. U, mundaq dédi:

“Malaysiya parlaméntining re'isige, hazirghiche 10 dölet parlaménti Uyghur qirghinchiliqini étirap qildi. Héch qandaq musulman dölitining parlaménti bundaq bir qarar qobul qilmidi. Malaysiya parlaméntining bundaq bir qararni oylishishini, muzakire qilishini telep qilimiz déduq. Uningdin bashqa hazir yaponiye, shiwétsiye, amérika, kanada we yawropa parlaméntlirida Uyghur dostluq guruppisi quruldi. Malaysiya parlaméntidimu buninggha oxshash Uyghur mesilisige köngül bölidighan Uyghur dostluq guruppisi qurulushi kéreklikini telep qilduq. Üchinchisi, awstraliye, amérika we yaponiye parlaméntida ötküzülgendek malaysiya parlaméntiningmu lagér shahitlirini teklip qilip guwahliq bérish yighinliri ötküzüshini telep qilduq”.

Dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat bashchiliqidiki bir hey'et malaysiyada bir qatar pa'aliyetlerde boldi. 2023-Yili 24-féwral, malaysiya.
Dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat bashchiliqidiki bir hey'et malaysiyada bir qatar pa'aliyetlerde boldi. 2023-Yili 24-féwral, malaysiya.
RFA/Erkin Tarim

Hey'et terkibidin orun alghan dunya Uyghur qurultiyi ichki ishlar komitétining mudiri bextiyar böre ependi, d u q hey'itining malaysiya parlamént re'isi, malaysiyadiki eng chong musulman ammiwi teshkilatlar mes'ulliri, parlamént ezaliri bilen élip barghan körüshüshliride ulardin “Uyghur irqiy qirghinchiliqi” ni toxtitish üchün heriketke ötüshi toghrisidiki teleplirini otturigha qoyghanliqini, ularning ijabiy jawab qayturghanliqini éytti.

Amérika bashchiliqidiki bir qisim gherb döletliri b d t kishilik hoquq kéngishining Uyghurlar heqqidiki doklatida bayan qilin'ghan wehshiyliklerge qarita musteqil tekshürüsh élip bérish-barmasliq we Uyghurlar mesilisini mexsus muzakire qilish toghrisida b d t gha sun'ghan teklip layihesi ötken yili 10-ayning 6-küni b d t da bilet tashlash arqiliq qarar qilin'ghanidi. Mezkur qarar b d t kishilik hoquq kéngishige eza 47 dölet ichidin amérika bashliq gherb démokratik döletliri 17 awazgha, xitay we uning terepdarliri 19 awazgha érishken bolup, 11 dölet awaz bérishtin waz kechkenidi. Netijide 2 awaz perq bilen, yeni 17 ge qarshi 19 awaz bilen xitay terep utup chiqqanidi. Malaysiya döliti awaz bérishtin waz kechken döletler qatarida qalghanidi. Ömer qanat ependi özlirining malaysiya parlaméntining re'isi johari abdul ependige démokratiye bilen bashquruluwatqan islam döliti bolghan malaysiyaning birleshken döletler teshkilatida irqiy qirghinchiliqqa uchrawatqan Uyghurlarni qollishini telep qilghanliqini, johari abdul ependining bu telepkimu ijabiy jawab bergenlikini bildürdi.

Dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat bashchiliqidiki bir hey'et malaysiyada bir qatar pa'aliyetlerde boldi. 2023-Yili 24-féwral, malaysiya.
Dunya Uyghur qurultiyi ijra'iye komitéti re'isi, Uyghur kishilik hoquq qurulushi diréktori ömer qanat bashchiliqidiki bir hey'et malaysiyada bir qatar pa'aliyetlerde boldi. 2023-Yili 24-féwral, malaysiya.
RFA/Erkin Tarim

Dunya Uyghur qurultiyining awstraliyediki wekili, awstraliye Uyghur jem'iyitining bayanatchisi mehmet jelepchi ependi, b d t da Uyghur mesiliside somali bilen türkiyedin bashqa musulman döletlirining sükütte turuwatqan bügünki künde malaysiyada Uyghur qirghinchiliqi yaxshi anglitilsa bashqa musulman döletlirining qollishigha türtke bolidighanliqini ilgiri sürdi.

Dunya Uyghur qurultiyi ijra'iye komitéti re'isi ömer qanat, dunya Uyghur qurultiyi ichki ishlar komitétining mudiri bextiyar böre ependi, awstraliye Uyghur jem'iyitining bayanatchisi mehmet jelepchi ependi we awstraliye Uyghur jem'iyiti mu'awin re'isi gülmire zunun qatarliqlardin terkib tapqan hey'et 26-féwral küni malaysiyadiki ikram we ACCİN qatarliq ikki chong teshkilat rehberliri uyushturghan söhbet yighinigha ishtirak qilghan. Bu ikki teshkilat malaysiyada Uyghur qirghinchiliqini anglitishta hemkarliq élip bériwatqan teshkilatlar iken.

Dunya Uyghur qurultiyi hey'etliri 2019-yili 1-ayning axiri we 2022-yili 4-ayning 11-künidin 17-künigiche malaysiyani ziyaret qilip her sahe zatliri we teshkilat rehberliri bilen uchrashqanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.