Mawiy hilal (kök ay) insaniy yardem jem'iyiti istanbuldiki éhtiyajliq Uyghur a'ililerge qurbanliq tarqatti

Ixtiyariy muxbirimiz arslan
2022.07.14
Mawiy hilal (kök ay) insaniy yardem jem'iyiti istanbuldiki éhtiyajliq Uyghur a'ililerge qurbanliq tarqatti Mawi hilal insaniy yardem jemiyiti re'isi abdurehim eziz oghli qurban héytta Uyghur osmürlerge héytliq tarqatmaqta. 2022-Yili iyul, istanbul.
RFA/Arslan

Uyghurlarning maddiy we meniwiy éhtiyajini qamdash üchün istanbulda pa'aliyet qiliwatqan mawiy hilal (köy ay) insaniy yardem jem'iyiti bu yilliq qurban héyt munasiwéti bilen 650 qoy we 70 kalining göshini istanbuldiki éhtiyajliq Uyghur a'ililerge tarqatqan.

Igellinishiche, 2013 – yilidin 2017 – yilighiche Uyghur diyaridin nurghunlighan Uyghurlar xitay bésimidin qéchip beziliri pasiport bilen beziliri bashqa yollar arqiliq türkiyge kelgen bolup, bulardin köpinchiliri türkiyege kelgendin kéyin iqtisadiy jehettin qiyinchiliqqa düch kelmekte. Bular  2017 – yilidin kéyin Uyghur diyaridiki uruq – tuqqanliri bilen alaqe qilalmighanliqi tüpeylidin iqtisadi menbeliri üzilip qélip éhtiyajliq ehwalgha chüshüp qalghan Uyghur a'ililer xéli salmaqni igelleydu.

Mawi hilal (kök ay) insaniy yardem jem'iyiti, türkiyede yashawatqan Uyghurlarning maddi we meniwiy qiyinchiliqlirini hel qilish meqsitide 2019 – yili istanbulda qurulghan bolup, hazir istanbulda yashawatqan we éhtiyajliq Uyghurlarning iqtisadiy qiyinchiliqlirini hel qilish üchün tirishchanliq körsitip kelmekte iken.

Mawi hilal insaniy yardem jemiyiti teripidin tarqitish üchün teyyarlan'ghan qurbanliq qoylar. 2022-Yili iyul, istanbul.
Mawi hilal insaniy yardem jemiyiti teripidin tarqitish üchün teyyarlan'ghan qurbanliq qoylar. 2022-Yili iyul, istanbul.

Biz bu heqte téximu toluq melumatqa ige bolush üchün mawiy hilal (kök ay) insaniy yardem jem'iyitining re'isi abduréhim eziz oghli bilen söhbet élip barduq.

Abduréhim eziz oghlining bildürüshiche, mawiy hilal (kök ay) insaniy yardem jem'iyiti, türkiyige yéngi kelgen Uyghurlarning maddiy we meniwiy qiyinchiliqlirini hel qilish meqsitide 2019 – yili sherqiy türksitan ma'arip we hemkarliq jem'iyiti we sherqiy türksitan ölimalar birliki qatarliq Uyghur teshkilatlarning qollishi bilen qurulghan.

Abduréhim eziz'oghli, bu jem'iyet qurulghandin buyan 5000 Uyghurgha her xil türde yardem qilip kéliwatqan bolsimu yéqindin buyan yardem alidighanlarning sani aziyip 2000 Uyghurgha chüshkenlikini bildürdi.

Abduréhim eziz oghlining bildürüshiche, bu éhtiyajliq Uyghurlargha yimek – ichmek, öy ijarisini tölep bérish, késel bolup qalghanlarni doxtorxanida heqsiz dawalitish , ay – küni toshqan hamildar ayallarning doxturxanida tughush chiqimlirini tülep bérish dégendek her xil qiyinchiliqlirini hel qilish üchün tiriship kelmekte iken.

Abduréhim eziz oghlining bildürüshiche bu jem'iyet ramizan éyidimu nurghun a'ililerge yimek – ichmek we ayliq öy ijarisini tülep bérish dégendek xizmetlerni élip barghan we yéqinda ikki doxturxana bilen Uyghurlardin késel bolup qalghanlarni heqsiz dawalishi üchün telep qilghan.

Bu jem'iyet yéqinda yene 50 Uyghur perzentini toplap doxturxanida birla waqitta heqsiz xetne qildurghan, türkiyede uniwéristit püttürgen oqughuchilardin 50 neper Uyghur oqughuchining toy rasxotlirini kötürüp öylük – ochaqliq bolushigha wasite bolghan.

Abduréhim eziz'oghli, bu xil yardem xizmetlirini bezi saxawetchi türk jem'iyetler we en'giliye qatarliq bashqa döletlerdiki yardem jem'iyetliri bilen yéqin munasiwet qurup, hemkarliq ichide élip bériwatqanliqini bildürdi.

Biz yene bu heqte pikir – qarashlirini élish üchün mawiy hilal (kök ay) insaniy yardem jem'iyitining ish – pilan tüzüsh mes'uliy ömerjan bilen söhbet élip barduq.

Ömerjanning bildürüshiche ular layiheligen qurban héytiliq yardemning sirtida, ötken ramizan éyida ramizanliq yardem pilanida istanbuldiki Uyghurlardin iqtisadiy qiyinchiliqi bolghan 600  a'ilige yimek – ichmek we ayliq öy ijarisini tülep bérish dégendek éhtiyajlarni hel qilip bergen.

Ömerjan bu xil yardem xizmetlirining ehmiyiti toghrisida toxtilip mundaq dédi: “Bundaq yardemlerning dawamlishishi bolsa, hazirqidek türkiye iqtisadining muqim bolmaywatqan, nerse – kéreklerning bahasi özlüksiz üsiwatqan bir peytte iqtisadiy bésimning éship kétishi, bu seweblik her xil mesililerning kélip chiqishi we rohiy- pisxikilik mesililer otturigha chiqiwatqan bir peytte bu yardem türlerning dawamlishi'ishi intayin muhim bolup, ularning meyli saghlamliq bolmisun yaki iqtisadiy jehettin we yaki telim terbiye jehettin az bolsimu ulargha yardemchi bolush, ularning yükini yenggillitish bek muhim, bu arqiliq ular téximu saghlam, bésimdin xaliraq halette muhajirettiki hayatini dawamlashturishigha paydisi bar dep qaraymiz”.

Igellinishiche, mawiy hilal (köy ay ) insaniy yardem jem'iyiti, istanbulda, 2020-yilining bashlirida korona wirusi pütün dunyada yamrashqa bashlan'ghandin kéyin dunyaning her qaysi döletliride pa'aliyet élip bériwatqan 40 tin artuq Uyghur teshkilati d u q ning yétekchilikide “Wirus krizisi yardem merkizi” qurghanidi. Mezkur merkez dunyaning herqaysi jayliridiki Uyghurlardin 160 ming dollar pul i'ane toplap tarqatqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.