Londonda Uyghurlar duch kéliwatqan medeniyet qirghinchiliqi anglitildi

Ixtiyariy muxbirimiz ekrem
2019.07.22
Share on WhatsApp
Share on WhatsApp
london-yighin-dolqun.jpg D u q re'isi dolqun eysa ependi “Uyghur musulmanliri duch kelgen medeniyet qirghinchiliqi-xelq'ara inkaslar we exlaqiy mejburiyet” namliq yighinda sözlimekte. 2019-Yili 21-iyul, london.
RFA/Ekrem

Dunya Uyghur qurultiyining rehberliri en'giliyediki “London islam medeniyet merkizi” de jaza lagérliri toghrisida doklat teqdim qildi.

21-Iyul en'gliye paytexti londondiki “London islam medeniyet merkizi” de “Uyghur musulmanliri duch kelgen medeniyet qirghinchiliqi-xelq'ara inkaslar we exlaqiy mejburiyet” namliq yighin chaqirilghan. Yighinda d u q re'isi dolqun eysa, re'is wekili turghunjan alawudun qatarliqlar doklat teqdim qilip, Uyghur diyarining nöwettiki éghir weziyitini anglatqan.

Londondiki Uyghur siyasiy aktipliridin rehime xanimning bildürüshiche, bu qétimqi yighinni merkizi londonda bolghan kordoba fondi jem'iyiti, biritaniye musulmanlar jem'iyiti we en'gliye Uyghur jem'iyiti qatarliq teshkilatlar birlikte uyushturghan. Uning eskertishiche, bu yighinni uyushturushtiki meqset sherqiy türkistanning nöwettiki éghir weziyitini londondiki musulmanlar teshkilatlirigha bildürüsh arqiliq en'gliyede xitaygha qarshi téximu küchlük jama'et pikri hasil qilish iken.

En'giliyediki Uyghur siyasiy aktipliridin eziz eysa ependining bildürüshiche, en'gliye Uyghur jem'iyiti xélidin buyan “Uyghur diyaridiki jaza lagérliri mesilisini en'giliyening mesilisi shundaqla pütün dunyaning mesilisi” haligha keltürüsh üchün en'giliyediki musulmanlar teshkilatliri bilen zich hemkarliship ish élip barmaqta iken.

Bu qétimqi yighinda d u q ning re'is wekili, sherqiy türkistan ölimalar birlikining mu'awin re'isi turghunjan alawudun ependimu nutuq sözlep, nuqtiliq halda sherqiy türkistanda dawam qiliwatqan diniy zulum toghrisida melumatlar bergen.

16-Iyuldin buyan amérikida ziyarette boluwatqan d u q re'isi dolqun eysa ependi 21-iyul londonda chaqirilghan bu yighin'gha ülgürüp kélip, Uyghur diyarining ötmüshi, bügüni we nöwettiki paji'elik weziyiti toghrisida tepsiliy doklat teqdim qilghan. Uning bildürüshiche, musulman ellirining köpligen xelq'araliq teshkilatlirining merkizi london'gha jaylashqan bolup, bu yerdiki musulman teshkilatlirini heriketke keltürüsh Uyghurlarning jaza lagérliri mesilisige süküt qilish pozitsiyesini tutuwatqan pütün dunyadiki musulmanlarni oyghitishta türtkilik rol oynaydiken.

Bu qétimqi yighindin kéyin d u q rehberliri bilen en'gliye Uyghur jem'iyiti xadimliri otturisida mezkur teshkilatni téximu kücheytish hemde londondiki pa'aliyetlerning kölimini yenimu kéngeytish mesilisi toghrisida söhbetler élip bérilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.