Түрк дуняси мәдәнийәт рәсим көргәзмисигә уйғурларға аит сүрәтләрму қоюлди

Ихтиярий мухбиримиз арслан
2020-07-23
Елхәт
Пикир
Share
Принт

Түркийәниң ялова шәһиригә җайлашқан ялова фолклор вә тәлим - тәрбийә мәркизи ( YAFEM) ниң уюштуруши билән 14 - нөвәтлик түрк дуняси мәдәнийәт пайтәхтлири рәсим көргәзмиси вә түрк дуняси журналистлар учришиши йиғини охшаш вақитта ялова шәһиридә өткүзүлди.

Бу паалийәттә уйғурларму өзлириниң нөвәттики еғиз вәзийити вә мәдәнийитини намаян қилидиған һәрхил сүрәтләрни көргәзмигә қойди.

Түрк дуняси рәсим көргәзмисигә шәрқий түркистан маарип вә һәмкарлиқ җәмийити тәрипидин қоюлған уйғурларниң тарихи, мәдәнийити, өрп - адәтлири , хитайниң уйғурлар үстидин елип бериватқан бесим вә зулумлири һәм хитайниң җаза лагерлириға қамалған уйғурларниң көрүнүшлиригә аит бу сүрәтләр зиярәтчиләрниң алаһидә диққитини тартти.

4 Күн давам қилған бу паалийәткә корона вируси сәвәбидин чәклик миқдарда киши тәклип қилинған болуп, көп санда киши йәнә программиға интернет телекамераси арқилиқ қатнашти.

Бу йиғинни уюштурған ялова фолклор вә тәлим - тәрбийә мәркизиниң рәиси өзәр қуюнҗи әпәнди, «уйғурлар мәсилисигә қандақ қарайсиз вә қандақ паалийәтләр елип бериватисиләр?»дегән соалимизға җаваб берип мундақ деди: »шәрқий түркистан мәсилиси түрк җуғрапийәсиниң һазир әң еғир қийин әһвалдики мәсилисидур. Шәрқий түркистанда йүз бериватқан паҗиәләр, қәтлиамлар тохтитилиши керәк болған әң муһим мәсилидур. Бизниң 2005 - йилидин башлап түркийәдики шәрқий түркистан хәлқи билән бирликтә паалийәтләр елип бериватимиз. Һазирму паалийәтлиримиз давам қиливатиду. Бизниң елип бериватқан хизмәт паалийәтлиримиз шәрқий түркистан үчүн азрақ болсиму пайдиси болса бу биз үчүн хушаллиқ иштур. Шәрқий түркистан мәсилиси һәр вақит бизниң күнтәртиптә тутуватқан мәсилиләрдин биридур. Пүткүл паалийәтлиримиздә, йиғин - программилиримизда бу мәсилә бизниң асасий мәсилимиз болуп кәлди. Бу қетимқи паалийәттә шәрқий түркистан рәсим көргәзмиси ечилди. Түрк дуняси журналистлар учришиши йиғинида шәрқий түркистан мәсилиси музакирә қилинди. Әң җиддий һәл қилиниши керәк болған мәсилиләрдин бири шәрқий түркистан мәсилисидур. Буниң һәл болуши үчүн бизму қолимиздин келишичә һәссә қошимиз. Әң қисқа вақитта хитайниң бу зулумиға хатимә берилиду дәп үмид қилимиз. Бу мәсилисини дуня җамаитиниң күнтәртипигә кәлтүрәлисәк әң қисқа вақитта бу мәсилә һәл болиду дәп қараймиз вә буниң үчүн тиришчанлиқ көрситимиз».
Биз йәнә уйғурлар мәсилиси тоғрисида пикир қарашлирини елиш үчүн милләтчи һәрикәт партийәси ялова шөбә рәиси намик там әпәнди билән сөһбәт елип бардуқ.

Намик там әпәнди уйғурлар мәсилиси тоғрисидики пикир - қарашлирини ипадиләп мундақ деди: «шәрқий түркистанлиқ қериндашлиримиз өзлирини һәргиз ялғуз һес қилмисун, шәрқий түркистан бизниң иззәт - номусимиздур, у йәрдики қийинчилиқларни билимиз вә көзитип келиватимиз, улар сәврчан болуши керәк. Алдимиздики күнләрдә бу қериндашлиримизға мунасивәтлик һәм түркийә җумһурийити тәрипидин һәм милләтчи һәрикәт партийәси тәрипидин җиддий хизмәтләр елип берилиду, қериндашлиримиз өзлирини һәргиз ялғуз һес қилмисун. Улар бизниң иззәт - абройимиздур, шәрипимиздур. Уйғурлар түрк дунясиниң асасий мәнбәсидур, уйғурларниң алаһидилики болса, түрк дунясиниң қәдими мәдәнийити, илим - мәрипити, сәнәт вә сода - тиҗаритидә асасий мәнбә болушидур, шәрқий түркистанлиқ қериндашлиримизға һөрмәт билдүримән, салам йоллаймән, пат - пурсәттә биз у йәргә баримиз уларму келиду, аримиздики тосуқ йоқайду».

Паалийәт 18- июлдин 23 - июлғичә 6 күн давам қилиду. Рәсим көргәзмисигә уйғурлардин башқа йәнә түрк, қазақ, қирғиз, өзбек, түркмән, әзәрбәйҗан, татар қатарлиқ хәлқлириму қатнишип, өзлириниң гүзәл мәдәнийити вә өрп - адәтлирини намаян қилди.

Пикирләр (0)
Share
Толуқ бәт