Җамаәт әрбаби, қазақистан уйғурлириниң йигит беши абдурешит мәхсутоф аләмдин өтти

Ихтиярий мухбиримиз ойған
2018-08-17
Елхәт
Пикир
Share
Принт
Қазақистан уйғурлириниң йигит беши мәрһум абдурешит мәхсутоф (оңдин иккинчи киши).
Қазақистан уйғурлириниң йигит беши мәрһум абдурешит мәхсутоф (оңдин иккинчи киши).
RFA/Oyghan

17-Авғуст күни қазақистан уйғурлириниң җумһурийәтлик етно-мәдәнийәт мәркизи йенидики йигит башлири кеңишиниң рәиси, қазақистан хәлқ бирләшмисиниң әзаси абдурешит мәхмут оғли мәхсутоф кесәл сәвәби билән алмутада 67 йешида аләмдин өтти.

Мәрһумниң дәпнә мурасимиға алмута шәһири вә алмута вилайити шундақла қошна қирғизистан җумһурийитиниң бишкәк шәһиридин кәлгән йигит башлири, юрт актиплири, зиялийлар, һәр саһә вәкиллири вә яшлар болуп, 700 гә йеқин адәм қатнашти. Дәпнә мурасимида қазақистан җумһурийәтлик йигит беши кеңишиниң рәислик лавазимини вақитлиқ орунлиғучи ярмуһәммәт кибироф, «алмута көврүк иншаатлири» ширкитиниң директори әхмәтҗан шәрдиноф, қирғизистан уйғурлири җумһурийәтлик «иттипақ» җәмийитиниң рәиси артиқ һаҗийеф, алмута шәһәрлик кеңишиниң әзаси шавкәт өмәрофлар сөз қилип, мәрһумниң һаят вақтида қазақистан уйғурлириниң мәдәний һаяти вә җәмийәтлик ишлирида көрсәткән төһпилиригә юқири баһа бәрди. Улар абдурешит мәхсутофниң уйғур миллий әнәнилирини сақлаш вә тәшвиқ қилиш, уйғур тиятириниң қоюлум-консертлириға тамашибинларни җәлп қилиш, ана тилидики мәктәпләргә бала йиғиш, уйғур мәтбуатлириға муштәри топлаш вә башқиму ишларни йүргүзүштә өзиниң тәшкилатчилиқ қабилийитини намайиш қилғанлиқини алаһидә тәкитлиди. 

Радийомиз зияритини қобул қилған қазақистан уйғурлириниң җумһурийәтлик етно-мәдәнийәт мәркизи рәисиниң орунбасари, җумһурийәтлик «уйғур авази» гезитиниң баш муһәррири ершат әсмәтоф мәрһум абдурешит мәхсутофниң аләмдин өтүшиниң қазақистан уйғурлири үчүн чоң вә еғир җудалиқ болғанлиқини тәкитләп, мундақ деди: «абдурешит ака наһайити яхши рәһбәрлик қилип, қазақистанда йигит башлириниң ролини хели юқири дәриҗигә көтүргән иди. У пәқәт той-төкүн вә нәзир-чирағлардила әмәс, бәлки қазақистан уйғурлири һаятиниң барлиқ саһәлиридә хәлқни тоғра йолға башлиған иди. У қазақистандики уйғурларда һәрқандақ бир вәқә йүз бәрсә шуниңға қарита мувапиқ бир чарә-тәдбир көрүшкә тәйяр туратти. ‹Уйғур авази' гезитигә муштәри топлаш ишидиму көп күч чиқарған инсанларниң бири иди.»

Ершат әсмәтофниң ейтишичә, абдурешит мәхсутоф җумһурийәтлик мәдәнийәт мәркизиниң башқарма әзаси сүпитидә мәркәзниң барлиқ ишлириға актип қатнашқан икән. Президент сайлимида, алий кеңәшләр сайлимида, җумһурийәтниң һәр хил саһәлиригә беғишланған паалийәтләрдә, хәйрхаһлиқ ишлирида, хәлқләр достлуқини мустәһкәмләштә абдурешит мәхсутоф даим хәлқ ичидә болуп, көпчиликниң һөрмитигә еришкән.

Җумһурийәтлик йигит беши кеңишиниң рәислик лавазимини вақитлиқ орунлиғучи ярмуһәммәт кибирофниң дейишичә, абдурешит мәхсутоф баш йигит беши лавазимиға бәлгиләнгәндин буян уйғурлар яшаватқан пүткүл қазақистан дияри, җүмлидин алмута шәһири вә алмута вилайити, астана, чимкәнт, павлодар, тараз вә башқа шәһәрләрдики йигит башлириниң бешини қошқан вә өз ара иттипақлиқниң мустәһкәмлинишигә төһпә қошқан икән. ярмуһәммәт кибироф зияритимизни қобул қилип, мундақ деди: «униң қилған ишлири наһайити көп. Биз униң билән һәммә саһәгә қоюқ арилишип кәлдуқ. Һәммисиниң бешини қошуш дегәнму асан иш әмәс. Алмута вә алмута области бойичә чоң мәшрәпләрни қилдуқ. Һөкүмәт билән, башқа милләтләр билән қоюқ арилишишта көп тәшвиқат елип бардуқ. Мәшрәпләрни биз башлиғандин кейин қирғизистанлиқ уйғурларму бишкәктә бу ишни елип маңди. Абдурешиттәк виҗданлиқ, миллити үчүн көйидиған балилиримиз наһайити аз дәп ойлаймән.»

Зияритимизни қобул қилған қирғизистан хәлқ бирләшмисиниң муавин рәиси, қирғизистан уйғурлири «иттипақ» җәмийитиниң рәиси артиқ һаҗийеф қирғизистан пайтәхти бишкәк шәһиридин бир түркүм вәкилләрни башлап кәлгәнликини оттуриға қоюп, мундақ деди: «бүгүн пәқәт қазақистандики уйғурлар үчүнла әмәс, һәммә уйғурлар үчүн чоң йоқитиш болди. Биз көзгә көрүнгән, вәтәнпәрвәр, ғурури күчлүк инсанни узун сәпәргә узитиватимиз. Абдурешит ака баш йигит беши болуп, юрт вә йигит башлирини башқурди. У қирғизистан билән қазақистан оттурисидики алақигә көп һәссә қошти. Абдурешит ака қазақистан дөлитигә, милләтләр достлуқини күчәйтишкә көп һәссә қошқан. Бүгүн һәқиқәтәнму чоң йоқитиш болди. Мән қирғизистан уйғурлири ‹иттипақ' җәмийити вә қирғизистан хәлқ бирләшмиси намидин униң уруқ-туғқанлириға, аилисигә сәвр тиләймән.»

Игилишимизчә, абдурешит мәхсутоф 1951-йили уйғур елиниң или вилайити җелилйүзи наһийисиниң турпанйүзи йезисида дуняға кәлгән. 1963-Йили қазақистанға көчүп чиқип, уйғур наһийисиниң чунҗа йезисидики уйғур оттура мәктипидә оқуған. 1973-Йили у һәрбий хизмитини ада қилип кәлгәндин кейин, 1974-йили алмута шәһириниң горний гигант мәһәллисигә келип орунлашқан һәм һәр хил саһәләрдә хизмәт қилған. Абдурешит мәхсутоф 1993-йилдин башлап тиҗарәтчилик билән шуғуллинип кәлгән. У 1999-йили өзи туруватқан мәһәллиниң йигит беши болуп сайланди. 2007-Йили алмута шәһәрлик бәгләр кеңишиниң рәиси, 2010-йилдин ахирқи вақитларғичә җумһурийәтлик йигит башлири кеңишиниң рәиси хизмитидә болған.

Пикирләр (0)
Share
Толуқ бәт