Uyghur zhurnalist kitablirini yarkenttiki yurtdashlirigha béghishlan'ghan

Qazaqistanda nam chiqarghan Uyghur zhurnalist öz kitablirida qazaqistanning yarkent teweside netije qazan'ghan Uyghurlarning hayati–pa'aliyitini yorutushqa tirishqan.

Péshqedem zhurnalist abdukérim tudiyarofning éytishiche, u öz yurtidin chiqqan meshhur ademlerni  xatirilep tarix bétidin orun aldurushni özining milliy burchi dep bilgechke ushbu kitablirini royapqa chiqirishqa tirishqan. U kitablirini höjjetlik matériyallargha asasen yazghan bolup, u kitablirining kelgüside bir tarixiy matériyal bolup qélishini ümid qilidighanliqini bildürdi.

Melumki, öz waqtida qazaqistandiki Uyghurlar ichidin köpligen partiye, dölet, medeniyet we sen'et erbabliri, urush we emgek qehrimanliri, ataqliq alim we yazghuchilar, ustaz we sazendiler yétiship chiqqan idi.

Shu jümlidin Uyghurlar zich olturaqlashqan yarkent tewesimu namayendiliri pütkül memliketke meshhur bolghan shundaq yurtlarning biri. Yéqinda “Mir neshriyat öyi” teripidin qazaqistan zhurnalistlar ittipaqi mukapatining sahibi, péshqedem zhurnalist abdukérim tudiyarofning “Yurtdashlar himmiti” namliq ochérklar toplimi yoruq kördi. A. Tudiyarof buningdin ilgiri “Ösek wadisining merdaniliri” we “Yaxshidin bagh qalidu” namliq kitablarnimu yazghan bolup, bu qétimqi neshri shularning dawami bolmaqta.

Sowét qazaqistani aliy kéngishi we jumhuriyetlik medeniyet we axbarat ministirliqining pexriy yarliqliri, qazaqistan zhurnalistlar ittipaqi mukapatining sahibi, panfilof nahiyisining pexriy puqrasi, qazaqistanning pexriy zhurnalisti a. Tudiyarof özining köp yilliq izdinishliri netijiside onlighan yurtdashliri heqqide salmaqliq emgeklerni yézip, bashqilargha tonushturdi.

Radi'omiz ziyaritini qobul qilghan a. Tudiyarof özining zhurnalistikiliq pa'aliyitining 50 yilliq musapini bésip ötkenlikini, bu jeryanda yarkent teweside ötken merdane shexslerning ömür bayani we emgiki heqqide köpligen maqalilerni, ochérklarni, xatirilerni yazghanliqini otturigha qoyup, mundaq dédi: “2014-Yili yoruqqa chiqqan ‛yurtdashlar himmiti‚ dégen kitabimda yarkent teweside xelq igilikining her xil saheliride merdanilerche emgek qilghan ademlerning qismiti, ünümlük pa'aliyiti yorutulghan. Ularning hemmisi arxip matériyallirigha asaslinip yézilghan. Kélechekte yene, yarkentte ishligen ataqliq ademler toghriliq bir toplam chiqarsam, dégen niyitim bar. Shundaqla yarkentning tarixigha béghishlan'ghan ‛wélibay we yarkent‚ dégen nam bilen bir kitab chiqarsam, dégen ümidte yürimen.