Алматада «туран дуняси» фондиниң бәш йиллиқи атап өтүлди

Ихтиярий мухбиримиз ойған
2016-09-27
Share

24-Сентәбирдә алматада қуддус ғоҗамяроф намидики җумһурийәтлик дөләт уйғур музикилиқ комедийә тиятирида қазақистан җумһурийити мустәқиллиқиниң 25 йиллиқи вә «туран дуняси» җәмийәтлик фондиниң 5 йиллиқиға беғишланған «бирлики ярашқан мустәқил елим бар!» темисида тәнтәнилик мурасим болуп өтти.

«Туран дуняси» җәмийәтлик фондиниң уюштуруши һәмдә қазақистан уйғурлириниң җумһурийәтлик етно-мәдәнийәт мәркизиниң қоллап-қуввәтлиши билән өткән бу паалийәткә түркий хәлқләрниң мәдәнийәт мәркәзлири вәкиллири, зиялийлар, алмата шәһири вә алмата вилайитиниң юрт-җамаәтчилики, һәр хил җәмийәтлик бирләшмиләр, аммиви ахбарат васитилири вәкиллири, оттура вә алий оқуш орунлири оқуғучилири вә башқилар қатнашти. Униңға шундақла түркийә, қирғизистан, әзәрбәйҗан җумһурийәтлири әлчиханилири вә консулханилириниң қазақистандики вәкиллири, нур-отан партийиси әзалири иштирак қилди. Йиғинни қазақистан җумһурийити парламенти алий кеңишиниң әзаси шаһимәрдан нурумоф вә алмата шәһәрлик алий кеңишиниң әзаси шавкәт өмәроф тәбрик сөз билән ачти.

Бу мурасимда йәнә түркий хәлқләрниң сәнәт гуруппилири, уйғур тиятириниң «нава» вә «рухсари» ансамбиллириниң қатнишишида чоң консерт программиси көрситилди.

Мурасимда шундақла «озан» шәһәрлик әзәрбәйҗан җәмийитиниң рәиси ғариб мамедоф, «тинчлиқ дуняси» қазақ иҗадий бирләшмисиниң президенти абен нурманоф, түркий хәлқләр мәдәнийити фондиниң президенти әхмәт дағдуран вә башқилар қазақистанниң чарәк әсир җәрянида қолға кәлтүргән утуқлирини, «туран дуняси» фонди һәм униң рәиси карлин мәхпирофниң түркий хәлқләр бирликини мустәһкәмләшкә қошқан төһписини алаһидә тәкитлиди.

Мурасим давамида түрк кеңиши, түркий хәлқләр мәдәнийити тәшкилати, түркий хәлқләрниң пүтүн дуня ассамблейиси, шундақла әзәрбәйҗан, қарачай-черкесийә, това, қирим-татар, өзбекистан, қирғизистан вә башқиму җумһурийәтләрдин кәлгән тәбрик хәтлири оқулди.

Мурасим ахирида «туран дуняси» иҗтимаий фондиниң рәиси карлин мәхпироф пүткүл меһманларға өзиниң чәксиз миннәтдарлиқини билдүрди.

Зияритимизни қобул қилған уйғур зиялийси азтекин әпәнди түркий хәлқләр иттипақлиқи мәсилисиниң муһимлиқини билдүрди.

Зияритимизни қобул қилған «өрлеу» вилайәтлик муәллимләрниң кәспини мукәммәлләштүрүш институтиниң хадими руслан арзийеф мәзкур фондниң биваситә к. Мәхпирофниң тәшәббуси билән қурулуп, өз паалийитини бир нәччә йөнилиштә елип бериватқанлиқини көрситип, мундақ деди: «биринчидин, қазақистандики вә униң сиртидики түркий хәлқләр тәшкилатлири, түркий бирлики тәрәпдари болған җәмийәт әрбаблири билән зич мунасивәт орнитиш. Иккинчидин, уларға уйғурларниң иҗтимаий, мәдәний вә сиясий һаятини тонуштуруш. Үчинчидин, улар уюштуруватқан паалийәтләргә биваситә арилишиш. Уйғур хәлқиниң маарипи вә мәдәнийитигә мунасивәтлик идийиләрни тәрғиб қилиш. Бу мәсилә бойичә фонд даңлиқ мәрипәтчи абдуқадир дамоллиниң һаяти вә паалийитигә беғишланған китаб нәшр қилип, уни тонуштуруш мурасимини өткүзди. Шундақла даңлиқ карханичи мусабайефларға беғишланған китаб нәшр қилип, тонуштурди».

Р. Арзийефниң тәкитлишичә, к. Мәхпироф кейинки вақитларда қазақистанлиқ уйғурларға өзиниң тәшкилатчанлиқ қабилийити, милләтпәрвәрлики җәһәттин тонулуп келиватқан җәмийәт әрбабидур. У 2009-йили өткән түркий хәлқләр илмий муһакимә йиғинида 5-июл үрүмчи қанлиқ паҗиәсигә баһа бериш мәсилиси қаралғанлиқини, униңға қатнашқан түркий хәлқләр вәкиллириниң уйғурларға һесдашлиқ билдүргәнликини илгири сүрди.

Игилишимизчә, 2011-йили қурулған «туран дуняси» җәмийәтлик фондиниң асасий мәқсити бу түркий хәлқләрни бир-бири билән йеқиндин тонуштуруп, улар арисида қериндашлиқ мунасивәтләрни орнитиш вә күчәйтиш, түркий хәлқләрни уйғурларниң тарихи, мәдәнийити билән тонуштуруштин ибарәттур.

Фонд шундақла ана тилини, уйғур әдәбиятини, маарипини тәрғиб қилишниму өзиниң асасий вәзиписи қилип қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.