Almatada "Turan dunyasi" fondining besh yilliqi atap ötüldi

Ixtiyariy muxbirimiz oyghan
2016-09-27
Élxet
Pikir
Share
Print

24-Séntebirde almatada quddus ghojamyarof namidiki jumhuriyetlik dölet Uyghur muzikiliq komédiye tiyatirida qazaqistan jumhuriyiti musteqilliqining 25 yilliqi we "Turan dunyasi" jem'iyetlik fondining 5 yilliqigha béghishlan'ghan "Birliki yarashqan musteqil élim bar!" témisida tentenilik murasim bolup ötti.

"Turan dunyasi" jem'iyetlik fondining uyushturushi hemde qazaqistan Uyghurlirining jumhuriyetlik étno-medeniyet merkizining qollap-quwwetlishi bilen ötken bu pa'aliyetke türkiy xelqlerning medeniyet merkezliri wekilliri, ziyaliylar, almata shehiri we almata wilayitining yurt-jama'etchiliki, her xil jem'iyetlik birleshmiler, ammiwi axbarat wasitiliri wekilliri, ottura we aliy oqush orunliri oqughuchiliri we bashqilar qatnashti. Uninggha shundaqla türkiye, qirghizistan, ezerbeyjan jumhuriyetliri elchixaniliri we konsulxanilirining qazaqistandiki wekilliri, nur-otan partiyisi ezaliri ishtirak qildi. Yighinni qazaqistan jumhuriyiti parlaménti aliy kéngishining ezasi shahimerdan nurumof we almata sheherlik aliy kéngishining ezasi shawket ömerof tebrik söz bilen achti.

Bu murasimda yene türkiy xelqlerning sen'et guruppiliri, Uyghur tiyatirining "Nawa" we "Ruxsari" ansambillirining qatnishishida chong konsért programmisi körsitildi.

Murasimda shundaqla "Ozan" sheherlik ezerbeyjan jem'iyitining re'isi gharib mamédof, "Tinchliq dunyasi" qazaq ijadiy birleshmisining prézidénti abén nurmanof, türkiy xelqler medeniyiti fondining prézidénti exmet daghduran we bashqilar qazaqistanning charek esir jeryanida qolgha keltürgen utuqlirini, "Turan dunyasi" fondi hem uning re'isi karlin mexpirofning türkiy xelqler birlikini mustehkemleshke qoshqan töhpisini alahide tekitlidi.

Murasim dawamida türk kéngishi, türkiy xelqler medeniyiti teshkilati, türkiy xelqlerning pütün dunya assambléyisi, shundaqla ezerbeyjan, qarachay-chérkésiye, towa, qirim-tatar, özbékistan, qirghizistan we bashqimu jumhuriyetlerdin kelgen tebrik xetliri oquldi.

Murasim axirida "Turan dunyasi" ijtima'iy fondining re'isi karlin mexpirof pütkül méhmanlargha özining cheksiz minnetdarliqini bildürdi.

Ziyaritimizni qobul qilghan Uyghur ziyaliysi aztékin ependi türkiy xelqler ittipaqliqi mesilisining muhimliqini bildürdi.

Ziyaritimizni qobul qilghan "Örlé'u" wilayetlik mu'ellimlerning kespini mukemmelleshtürüsh institutining xadimi ruslan arziyéf mezkur fondning biwasite k. Mexpirofning teshebbusi bilen qurulup, öz pa'aliyitini bir nechche yönilishte élip bériwatqanliqini körsitip, mundaq dédi: "Birinchidin, qazaqistandiki we uning sirtidiki türkiy xelqler teshkilatliri, türkiy birliki terepdari bolghan jem'iyet erbabliri bilen zich munasiwet ornitish. Ikkinchidin, ulargha Uyghurlarning ijtima'iy, medeniy we siyasiy hayatini tonushturush. Üchinchidin, ular uyushturuwatqan pa'aliyetlerge biwasite arilishish. Uyghur xelqining ma'aripi we medeniyitige munasiwetlik idiyilerni terghib qilish. Bu mesile boyiche fond dangliq meripetchi abduqadir damollining hayati we pa'aliyitige béghishlan'ghan kitab neshr qilip, uni tonushturush murasimini ötküzdi. Shundaqla dangliq karxanichi musabayéflargha béghishlan'ghan kitab neshr qilip, tonushturdi".

R. Arziyéfning tekitlishiche, k. Mexpirof kéyinki waqitlarda qazaqistanliq Uyghurlargha özining teshkilatchanliq qabiliyiti, milletperwerliki jehettin tonulup kéliwatqan jem'iyet erbabidur. U 2009-yili ötken türkiy xelqler ilmiy muhakime yighinida 5-iyul ürümchi qanliq paji'esige baha bérish mesilisi qaralghanliqini, uninggha qatnashqan türkiy xelqler wekillirining Uyghurlargha hésdashliq bildürgenlikini ilgiri sürdi.

Igilishimizche, 2011-yili qurulghan "Turan dunyasi" jem'iyetlik fondining asasiy meqsiti bu türkiy xelqlerni bir-biri bilen yéqindin tonushturup, ular arisida qérindashliq munasiwetlerni ornitish we kücheytish, türkiy xelqlerni Uyghurlarning tarixi, medeniyiti bilen tonushturushtin ibarettur.

Fond shundaqla ana tilini, Uyghur edebiyatini, ma'aripini terghib qilishnimu özining asasiy wezipisi qilip qoyghan.

Toluq bet