Almatada ataqliq kompozitor merhum sélimaxun zeynallofning 80 yilliqi xatirilendi

Ixtiyariy muxbirimiz oyghan
2016-10-10
Share

8-Öktebir küni almata shehirining dostluq mehellisige orunlashqan abdulla rozibaqiyéf namidiki 153-mektep-gimnaziyede bestikar kompozitor we sazende sélimaxun zeynalofning 80 yilliqigha béghishlan'ghan sen'et kéchiliki ötküzüldi. Uninggha ziyaliylar, jem'iyetlik birleshmiler wekilliri, ustazlar we oqughuchilar, yurt-jama'etchilik wekilliri qatnashti.

Radiyomiz ziyaritini qobul qilghan gimnaziye mudiri shawket ömerof mezkur kechni uyushturush meqsitini chüshendürüp, mundaq dédi: “Meqsitimiz ustazimizning qilghan emgeklirini, yazghan, éytqan naxshilirini yene bir qétim eslesh, balilargha milliy rohta terbiye bérish. Bayramning yuqiri derijide ötidighinigha ishenchimiz kamil. Sélimaxun akining heqiqetenmu bu yurtqa, mektipimizge qilghan emgekliri bébaha. U, mektipimizning tereqqiyatigha nahayiti köp ülüsh qoshqan akilirimizning biri. Özi oxshash sazandilerni, senetxumar balilarni teyyarlighan chong ustaz.”

Bu kéchilik gimnaziye xor topining orunlishida sha'ir mirzexmet mérimofning sözige, sélimaxun zeynalofning muzikisigha yézilghan “Weten” naxshisi bilen échildi. Murasimda sözge chiqqan pédagogika penlirining namzati émélyan hoshurof, filologiye penlirining namzati rabik ismayilof, qazaqistan parlaméntining sabiq sénatori mars battalof, “Inayet” jem'iyetlik birleshmisining re'isi hakimjan arupof, jumhuriyetlik “Uyghur awazi” gézitining bash muherriri érshat esmetof, gimnaziye mudiri shawket ömerof we bashqilar s. Zeynalofning Uyghur milliy sen'itining rawajlinishigha qoshqan töhpisini alahide tekitlidi.

Radiyomiz ziyaritini qobul qilghan qazaqistanning xizmet körsetken artisi marat memetbaqiyéf özining s. Zeynalof bilen uzun waqit birliship ishligenlikini eslep, mundaq dédi: “Sélimaxun aka nahayiti tirishchan idi. U manga mexmut aka abduraxmanof bilen yazghan “Közlirim” dégen naxshini berdi. Bu naxshigha bir hepte ishlidim. Kéyin uninggha ussul qoyuldi. Xelqmu bu naxshini xushal qarshi aldi. Sélimaxun akining yazghan hemme naxshiliri xelq naxshilirigha aylandi. U hazir bolghan bolsa, téximu köp naxshilarni éytar idim.”

Sélimaxun nezer oghli zeynalof 1936-yili Uyghur élining ili wilayitige qarashliq jaghistay yézisida sazende a'iliside tughulghan. Deslepte ottura mektepni, andin 1959-yili ghulja shehiride exmetjan qasimi namidiki bilim dergahini tamamlighan s. Zeynalof shu yili qazaqistan'gha köchüp chiqip, almata wilayiti Uyghur nahiyisining chong aqsu yézisigha orunlishidu. U 1962-yilghiche dangliq elneghme sultanmurat rezamof rehberlik qilghan “Arzu” ansambilida yétekchi sazende, andin almata shehirige köchüp kélip, 1997-yilghiche a. Rozibaqiyéf namidiki 153-mektepte muzika pénining mu'ellimi bolup ishlidi. Shu jeryanda s. Zeynalof dostluq yézisida “Dostluq” ansambilini qurup, köpligen talantliq shagirtlarni terbiyilep chiqqan. U bolupmu abduxaliq Uyghur, hézmet abdullin, xélil hemrayéf, mexmut abduraxmanof, abduréhim ötkür, dolqun yasin qatarliq ataqliq sha'irlarning eserlirige we xelq ijadiyitige muzika yazghan 300din oshuq naxshilarning aptoridur. S. Zeynalof naxshiliri “Yürek sadaliri”, “Shükri deymen”, “Dil arami” namliq toplamlar bilen yoruq körgen. U, qazaqistan kompozitorlar ittipaqining ezasi, 1-derijilik “Ilham” mukapatining, shundaqla qazaqistan ma'arip ministirliqining köpligen pexriy yarliqlirining sahibi s. Zeynalof 2011-yili 75 yéshida alemdin ötken idi.

Ziyaritimizni qobul qilghan kompozitorning qizi, gimnaziye kitabxanisining xadimi gülbostan zeynalowa atisini eslep, mundaq dédi: “Dadamning hayati bihöde ötmidi. Uning keynidin nurghunlighan shagirtliri qaldi. Shundaqla bala-chaqiliri, newriliri, chewriliri dadimizning izini bésip kéliwatidu. Uning yazghan naxshilirini xelq söyüp tingshaydu. Weten'ge barghanda ghuljida dadamning naxshilirini éytqinini körüp, özüm bek xursen boldum. Dadam a'ilide sözni jiq qilmaytti. Bir éytqinini ikkinchi qétim tekrarlimaytti. Dadam bizdin oqushni, bir ishni axirighiche chiqirishni telep qilatti. Dadam hayatining tengdin tolisini ijadiyetke béghishlighan. Dadamning sazende, kompozitor bolup yétilishide apimizningmu roli üstün dep oylaymen.”

Kéchilik pa'aliyet quddus ghojamyarof namidiki jumhuriyetlik dölet Uyghur muzikiliq komédiye tiyatiri “Nawa” ansambilining ataqliq naxshichiliri marat memetbaqiyéf, nuralim warisof, perhat dawutof we bashqilarning ijrasida merhumning “Yollar”, “Turnilar”, “Séghindim”, “Külse jananlar”, “Uyghurum” namliq naxshiliri, shundaqla gimnaziye oqughuchiliri teyyarlighan naxsha we ussullar bilen dawam qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet