Алматада “уйғур қәләмкәшләр” журнилиниң нөвәттики сани йоруққа чиқти

Ихтиярий мухбиримиз ойған
2015-07-23
Share
uyghur-qelemkeshler-pen-jurnal-zhurnal-2015.jpg “уйғур қәләмкәшләр” журнилиниң нөвәттики сани
RFA/Oyghan


Йеқинда алмата шәһиридики “мир” нәшрият өйи тәрипидин “уйғур қәләмкәшләр” җумһурийәтлик әдәбий - бәдиий журнилиниң алтинчи сани йоруққа чиқти. Мәзкур санда атақлиқ тарихчи вә язғучи турғун алмасниң “уйғурлар” намилиқ китабидин парчә, йәни униң “көл билгә қарахан вә униң оғуллири” дегән қисми, шаир қурбан иминниң “бовақ”, “тағ сүйи”, “мәкиткә зиярәт”, “или дәряси” намлиқ әсәрлири, қазақистанлиқ көрнәклик уйғур язғучиси җамалдин босақофниң “көч - көч” романидин үзүндә, мәһәммәтҗан җанбақийефниң шаир илахун һошуроф, өзбәкистанлиқ уйғур алими мәрһум пәрһат һәмрайефниң әдип һезим искәндәроф вә рәссам талғат миррәһимофлар иҗадийити һәққидики тәтқиқатлири, язғучи исрайил ибраһимофниң “ухлаватқан бала үчүн соната” намлиқ нәсри әсири, яш иҗаткар маһарәт имированиң “бойдақниң өлүми” һекайиси орун алған.

Радийомиз зияритини қобул қилған әдәбиятшунас алим, филологийә пәнлириниң намзати рабик исмайилоф мәзкур журнал һәққидә тохтилип, мундақ деди: “икки йил болди, уйғур җамаәтчилики, болупму зиялийлар “уйғур пән” дегән журнални оқушқа башлиди. 2014 - Йилдин башлап мушу қазақистанда яшиғучи қәләм қулубниң вәкиллири, әзалири шуниң биваситә рәһбәрлириниң бири хәмит һәмрайефниң рәһбәрликидә “уйғур қәләмкәшләр” дегән журнални нәшр қилиш қарариға кәлгән иди. Бу журнал уйғур вә рус тиллирида нәшр қилинип, пәсиллик характерға игә болди, йәни йилиға төрт қетим нәшр қилиш көздә тутулған иди. Мана, һазирчә, журналниң алтә сани йоруққа чиқти. Х. Һәмрайеф вә шуниң билән биллә мушу журналға күч чиқириватқан қәләм қулубниң әзалири наһайити яхши ишни қолға алди, дәп ойлаймән. Биринчидин, бизниң бай әдәбиятимизни әнә шу язма әдәбиятимиздин башлап мушу бүгүнки күндә қолға кәлтүргән утуқлиримизни қайтидин йәнә өз җамаитимизгә, өз китабханилиримизға тонуштуруватиду. Иккинчидин, пәқәт әдәбиятнила нәзәрдә тутмай, мушу кейинки он - он бәш йил ичидә уйғур рәссамлири чоң утуқларни қолға кәлтүрди. Мушуни етибарға елип, журнал өзиниң һәр бир санида муқавиниң иккинчи вә ахириқи бетидә уйғур рәссамлириниң әсәрлирини рәңлик һалда бериватиду. Мән ойлаймәнки, бу наһайити чоң иш. Бизниң рәссамлиримизниң иҗадийитини тәшвиқ қилиш мәсилисидә журнал чоң рол ойнаватиду.”

Шуни алаһидә тәкитләш керәкки, қазақистан уйғурлири болупму көп әсирлик тарихқа вә бай мәдәний мирасқа игә уйғур классик әдәбияти нәмунилирини омумйүзлүк тәрғип қилишқа чоң көңүл бөлмәктә. Билим уйғур тилида берилидиған мәктәпләр үчүн чиқирилидиған оқуш қораллирида, уйғур тилида нәшр қилинидиған гезит вә журналларда классик әдәбиятниң ярқин вәкиллириниң иҗадийити үзлүксиз берилип туриду. Бу, әлвәттә, яш әвладларниң өз тарихидин, миллий мәдәнийитидин пәхирлиниш, тарихий вә мәдәний ядикарлиқларни асраш сезимлирини тәрбийиләйду. Р. Исмайилоф сөзини давам қилип, йәнә мундақ деди:“әмди һәммимиз яхши билимизки, бизниң классик, йәни язма әдәбиятимиз наһайити бай. Мана мушу журналниң һәр бир саниға бизниң бай мирасимиздин қандақла болмисун шәртлик рәвиштә бирәр язғучи, мәйли маһмут қәшқәри болсун, мәйли йүсүп хас һаҗиб болсун, яки низари, нәвбәти, зәлили болсун, шуларниң әсәрлиридин, бәзилириниң толуқ иҗадийитини, бәзилириниң әсәрлирини тонуштуруш мәқсәт қилинмақта. Әлвәттә, журналниң асасий мәқсити, мушу қазақистанда, қирғизистанда, өзбекистанда яшаватқан уйғур язғучилириниң иҗади билән тонуштуруш. Буни журналниң һәр бир санида көрүшкә болиду.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт