Almatada Uyghur tiyatirining 80 yilliqigha béghishlap murasim ötküzüldi

20 - Dékabirda almatadiki Uyghur tiyatiri bénasida quddus ghojamyarof namidiki jumhuriyetlik dölet Uyghur muzikiliq komédiye tiyatirining 80 yilliqigha béghishlan'ghan tentenilik kéchilik pa'aliyet bolup ötti.

Deslepte tiyatirning tarixi heqqidiki höjjetlik filim namayish qilin'ghandin kéyin, birinchi tebrik söz qazaqistan jumhuriyitining medeniyet we tenheriket ministiri aristanbék muhemmet oghligha bérildi. U tiyatir kolléktipini qizghin tebriklep, bu tiyatirning quddus ghojamyarof, exmetjan qadirof oxshash ataqliq sen'etkarlarni shundaqla exmediyéflar, meshüroflar qatarliq sen'etchi sulalilerni terbiyilep chiqqanliqini alahide tekitlidi. U bügünki bayramning peqet qazaqistanliqlar üchünla emes, belki pütkül alem sen'itining toyi ikenlikini, memliket prézidénti nursultan nazarbayéfning Uyghur tiyatirigha alahide hörmet bilen qaraydighanliqini bildürüp, uning yollighan tebrik xétini oqup berdi.

Uningda mundaq déyilgen: “Quddus ghojamyarof namidiki jumhuriyetlik dölet Uyghur muzikiliq komédiye tiyatiri kolléktipini uluq bayrimi - 80 yilliq tewelludi bilen tebrikleymen. Siler élimizning qazaqistan xelqlirining medeniy xezinisige salmaqliq töhpe qoshuwatqan eng chong ijadiyet kolléktiplirining biride emgek qiliwatisiler. Özige xas Uyghur medeniyitini roshen ipadiligen tiyatir pütkül köp milletlik qazaqistanning omumiy bayliqi bolghan hem bolup qalidu. Uzun yillardin béri ewladlar, tamashibinlar silerning yuqiri bedi'iy we kespiy derije bilen perqlinidighan ijadinglarni alahide semimiylik bilen qobul qilmaqta. Tiyatirning qoyulumlar tizimliki xilmu - xil, keng we xelqimizning bay medeniy mirasi, u semimiy méhriwanliq we insanperwerlik rohi bilen chemberchas baghlan'ghan. Tiyatirning "anarxan", "ayman - cholpan", "qiz zhibek", "qeshqer qizi", "sadir palwan" we bashqa shuninggha oxshash sehne eserliri peqet élimizdila emes, belki yiraq chet'ellerdimu keng tonulghan. Uyghur muzikiliq komédiye tiyatiri "yashliq", "nawa" oxshash jumhuriyettiki meshhur we söyümlük ijadiy ansambillargha yol achti. Uyghur tiyatiri ijadiyet kolléktipi buningdin kéyinmu tamashibinlarni yéngi, yarqin eserliri bilen xushal qilidu, dep ishinimen. Pütkül kolléktipqa salametlik, xatirjemlik, yéngi ijadiy utuqlar we güllinish tileymen.”

Kechte shundaqla almata shehiri hakimining orunbasari za'urésh amanjolowa, qazaqistan xelqi assambléyisi re'isining orunbasari érali toghzhanof, qazaqistan parlaménti aliy kéngishi ijtima'iy - medeniy tereqqiyat komitétining ezasi, qazaqistan xelqi assambléyisining aliy kéngesh ezaliri topining rehbiri jumatay aliyéf, qazaqistan parlamént sénati, ijtima'iy - medeniy tereqqiyat komitéti re'isi axan bizhanof, qazaqistan parlaménti aliy kéngishining xelq'araliq ishlar, mudapi'e we bixeterlik komitéti ezaliri qu'anish sultanof we turarbék asanof, qazaqistan parlaménti aliy kéngishi ezaliri gülmira ésénbayéwa, ratbék smaghulof, sowét we qazaqistan xelq artisi asaneli eshimof, qazaqistan parlaménti aliy kéngishi ijtima'iy - medeniy tereqqiyat komitétining ezasi murat exmediyéf, almatadiki tiyatir kolléktiplirining wekilliri, almata sheherlik meslihitining ezasi exmetjan sherdinof, “Sana'etchiler, tijaretchiler we yéza égiliki xadimliri jem'iyetlik birleshmisi”ning re'isi dilmurat quzi'éf, qazaqistan Uyghurlirining jumhuriyetlik étnomedeniyet merkizi re'isi shahimerdan nurumof, shundaqla almata wilayiti hakimchiliqi, almata wilayitining Uyghur we panfilof nahiyiliri hakimchiliqlirining wekilliri semimiy tileklirini éytip, öz soghilirini tapshurdi. Tiyatir kolléktipi namigha shundaqla almata shehirining hakimi exmetjan ésimofning, qazaqistan parlamént sénatining re'isi qasimjomart toqayéfning, qazaqstan parlaménti aliy kéngishi re'isining orunbasari darigha nazarbayéwaning tebrik xetliri tapshuruldi.

Memliket prézidéntining permani bilen marat noruzofqa “Qazaqistanning emgek singergen erbabi” hörmetlik atiqi bérilse, tiyatir mudiri sawutjan sonurofqa “Ela emgiki üchün” médali tapshuruldi. Shundaqla tiyatirning alimjan toqayéf, rashidem hemra'éwa, mérwanem hoshurowa, niyaz tursunof qatarliq yigirmige yéqin artisi medeniyet we tenheriket ministirliqining, qazaqistan xelqi assambléyisning médalliri, pexriy yarliqliri, teshekkürnamiliri bilen teqdirlendi.

Tentenilik kech Uyghur tiyatiri shundaqla almata shehiridiki tiyatirlar, ussulchilar topliri, yekke naxshichilar teripidin teyyarlan'ghan konsért programmisi bilen tamamlandi.

Radi'omiz ziyaritini qobul qilghan yéza égiliki akadémiyisining akadémiki mehemmetjan abdullayéf bu heqte öz qarashlirini otturigha qoydi.