Myunxéndiki aliptékin telim - terbiye merkizi janlanmaqta

2013-07-12
Élxet
Pikir
Share
Print
Myunxéndiki aliptékin telim - terbiye merkizi
Myunxéndiki aliptékin telim - terbiye merkizi
RFA/Ekrem

Gérmaniyining myunxén shehiridiki aliptékin telim - terbiye merkizining qurulghinigha azkem 10 yil boldi.  Hazir bu merkezde üch siniptiki 60 etrapida yash - ösmürlerge Uyghur ana tilidin ders bérilish bilen birge, islam eqidiliri bilen terbiyileshni asas qilghan Uyghur milliy ma'aripi dawam qiliwatqan bolup, qolgha keltürgen netijilerdin myunxén jama'iti memnun bolushmaqta.

Aliptékin telim - terbiye merkizining oqutquchilirining éytishiche, xitay hökümiti Uyghur ilide atalmish " Qosh tilliq ma'arip" ni küchep emeliyleshtürüshke bashlighandin buyan, buninggha qarshi halda chet'ellerdiki Uyghurlarning milliy telim - terbiye xizmitimu parallil halda küchiyishke bashlighan. Jümlidin, myunxén shehiridiki aliptékin telim - terbiye merkizimu 2012 - yili qaytidin tertipke sélinip, oqu - oqutush ishliri zor derijide janlan'ghan.

Bu merkezde ilgiri diniy bilimlerdin sirt, Uyghur tili, tarixi, edebiyati, medeniyiti, sen'iti  qatarliq sahelerde yash - ösmürlerni terbiyilesh dawam qilip kelgen idi. Nöwette asasliqi islam dini bilimliridin sawat chiqirish dersige köprek ehmiyet bériliwatqan bolup, bezi oqughuchilar qur'an sawadini chiqirip bolghan. Bu merkezde Uyghur perzentlirining oqush qizghinliqini téximu yuqiri kötürüsh üchün qerellik halda herxil zéhin sinash, jama'et aldida émtihan élish sheklidiki mukapatliq pa'aliyetler uyushturulmaqta. Biz bu mektepning omumiy ehwalidin téximu etrapliq uchur igilesh meqsitide, aliptékin telim - terbiye merkizining qurghuchi xadimliridin bolghan eniwerjan ependi, abdujélil ependi hemde hazirqi diniy ustazlardin hebibullah qari we hezritim qatarliqlarni ziyaret qilduq.

Myunxéndiki diniy zatlardin abdujélil ependi aliptékin telim - terbiye merkizining qurulush tarixidin qisqiche melumat berdi. Diniy ustazlardin hebibullah qari Uyghur ösmürlirining hazirqi öginish ehwallirini tonushturup, oqughuchilardiki ilgirileshlerning ata - anilarni memnun qilghudek derijige yetkenlikini tilgha aldi. Ustaz hezritimmu  aliptékin telim - terbiye merkizining oqu - oqutush ishlirining yaxshi yürishiwatqanliqini tekitlidi. Yawrupa sherqiy türkistan birliki teshkilatining re'isi eniwerjan ependi bolsa, bu merkezning pa'aliyitige qisqiche baha bérip ötti. U sözide, bundin kéyin aliptékin telim - terbiye merkizi kölimining téximu kéngiyip, Uyghur milliy kimlikini saqlap qélishta zorür bolghan dersliklerning toluqlinidighanliqini eskertti.

Toluq bet