Amérika Uyghur jama'iti noruzni birlikte tebriklidi

Muxbirimiz eziz
2017-03-27
Élxet
Pikir
Share
Print
Amérikining paytexti washin'gton ötküzülgen noruz bayrimini tebriklesh pa'aliyitide amérika Uyghur birleshmisining re'isi élshat hesen ependi söz qilmaqta. 2017-Yili 25-mart.
Amérikining paytexti washin'gton ötküzülgen noruz bayrimini tebriklesh pa'aliyitide amérika Uyghur birleshmisining re'isi élshat hesen ependi söz qilmaqta. 2017-Yili 25-mart.
RFA/Eziz

2017-Yilliq noruz yétip kelgendin kéyin, amérikining paytexti washin'gton we qoshna shtatlardin kelgen Uyghur jama'iti yene bir qétim bir yerge jem bolup, Uyghurlarning bu en'eniwi bayrimini birlikte tebriklidi. Uyghur ösmürler we yashlar özlirining bayramliq shadliqini her xil shekillerde ipadiligen bolsa, chonglar öz tileklirini bayan qildi.

Uyghurlar esirlerdin buyan noruz bayrimini tebriklep kéliwatqan bolup, bu hal wetini ichi we sirtidiki Uyghurlarda oxshashla dawam qilmaqta. Shu jümlidin muhajirettiki Uyghur topluqliri üchünmu noruz bayrimi izchil halda en'eniwi milliy bayramlarning biri qatarida qutlanmaqta. Bu yilliq noruz bayrimi hepte arisigha toghra kélip qalghanliqi üchün amérika Uyghur jama'itining bu bayramni qutlishi birnechche kün kéchikip, yeni 25-mart küni ötküzüldi.

Amérika Uyghur birleshmisi bash bolup teshkilligen bu yilliq noruz bayrimini qutlash pa'aliyiti paytext washin'gton'gha anche yiraq bolmighan xérndon shehiridiki ammiwi baghchining pa'aliyet zalida ötküzüldi. Kech sa'et altidin bashlap pa'aliyet zaligha kélishke bashlighan top-top Uyghur balilar we chonglar Uyghurlargha xas milliy libaslar, jümlidin Uyghur doppiliri, chirayliq etles köngleklerni namayish qilghan halda, bügünki pa'aliyetning amérikidiki özgiche bir milliy topluqqa mensup kishilerning yighilishi ikenlikini ishare qilatti.

Noruz tebriki aldi bilen yillardikige oxshash "Sherqiy türkistan marshi" bilen bashlandi. Marsh bashlinishtin burun amérika Uyghur birleshmisining re'isi élshat hesen köpchilikni ornidin turup hörmet bildürüshke chaqirdi.
Shuningdin kéyin sorun riyasetchiliridin edine bu qétimqi noruzluq tebrik pa'aliyitining resmiy bashlan'ghanliqini élan qildi.

Uyghurlardek, sen'et xumarliq turmushning herbir hüjeyrisigiche singip ketken bir xelq üchün bu yilqi noruz pa'aliyitimu aldi bilen Uyghurlargha xas naxsha-ussullar bilen bashlandi. Bu qétimliq noruz pa'aliyitide alahide közge chéliqidighan sen'et nomurliri wirjiniye shtatidiki Uyghur baliliri üchün échilghan "Ana Care" ana til merkizide oquwatqan balilar teyyarlap kelgen maharetler boldi. Ular orunlighan "Meshrep" namliq ussul sorun keypiyatini biraqla yuqiri pellige kötürüp pa'aliyet ishtirakchilirini hayajan'gha saldi.

Uzaq esirlerdin buyan Uyghurlarning noruzluq tebrik pa'aliyetliri bilen herqachan chemberchas baghlinip ketken yene bir hadise, sha'irlarning bayramliq shé'ir yézip bulaq yaki derya sulirida éqitishi, shu arqiliq insan bilen tebi'etning birlishishidek arzuning eks ettürülüshi bolup kéliwatqanliqi melum. Bu yilqi noruz tebrikige yighilghan Uyghur jama'itimu shu qatarda Uyghur shé'iriyitidiki munewwer eserlerdin durdaniler oqudi.

Axirida amérikidiki Uyghur yashliridin muhemmetjan merhum sha'ir abduréhim ötkürning "Men aq bayraq emes" namliq shé'irini déklamatsiye qilip sorun ehlining qizghin qarshi élishigha érishti.

Noruzluq pa'aliyetke qatnashqan Uyghur jama'itidin mahire xanim ziyaritimizni qobul qilip, wetendiki Uyghur jama'itining hazirqi siyasiy we medeniyet jehetlerdiki müshkül ehwali yadigha kelgende özining tolimu rahetsiz bolidighanliqini bildürdi.

Axirida bu qétimqi pa'aliyetni teshkilligüchilerning biri, amérika Uyghur birleshmisining re'isi élshat hesen ziyaritimizni qobul qilip, bu xildiki milliy bayramni qutlash pa'aliyetlirining muhajirettiki Uyghurlarda öz-ara birlik we uyushchanliqni emelge ashurushta zor ehmiyetke ige ikenlikini tekitlidi.

Bu qétimqi pa'aliyet qaynam-tashqinliq keypiyat we jushqun naxsha-muzika sadasi ichide ishtirakchilargha yene bir qétim Uyghurluq tuyghusidin kolléktip behrimen bolush pursiti yaritip berdi. Köpchilik axirida xushalliq hemde qiyalmasliq ichide bir-biri bilen xoshlashti.

Toluq bet