Америка уйғур җамаити җәм болуп норузни тәбриклиди

Мухбиримиз үмидвар
2018-03-25
Елхәт
Пикир
Share
Принт
Америка уйғур бирләшмиси өткүзгән норуз паалийитидин бир көрүнүш. 2018-Йили 24-март. Фәйирфакс, америка.
Америка уйғур бирләшмиси өткүзгән норуз паалийитидин бир көрүнүш. 2018-Йили 24-март. Фәйирфакс, америка.
RFA

Америка уйғурлири бирләшмиси шәнбә, йәни 24-март күни америка пайтәхти вашингтон шәһири йенидики фәйирфакс шәһәрчисидә норуз паалийити өткүзди. Тәхминән 300 дин артуқ киши қатнашқан мәзкур норуз паалийити алди билән шәрқий түркистан миллий марши билән башланған болуп, кичик балилардин тартип, һәммә киши бирдәк һалда ай юлтузлуқ көк байрақ алдида марш ахирлашқучә өз садақитини билдүрүшти. Уйғурларниң миллий әнәниси бойичә җамаәт норуз ешиға еғиз тәгди. Виргинийә, мариланд вә башқа штатлардин аилиси вә пәрзәнтлири билән биргә кәлгән шуниңдәк уйғур миллий кийимлирини кийишкән уйғур ата-анилар пәрзәнтләрниң тәйярлиған ана тилдики шеир декламатсийәлири вә башқа түрлүк сәнәт номурлиридин һозурланди.

Паалийәтниң ечилиш нутқини сөзлигән америка уйғурлири бирләшмисиниң рәиси илшат һәсән әпәнди көпчиликкә норузлуқ салам йоллап, уларниң норуз байримини тәбриклиди. У сөзидә; бу йилқи норузниң уйғурларниң өз вәтинидә хитай компартийиси һакимийитиниң қаттиқ сиясий тәқибләшлиригә учрап, инсаний әркинликлиридин вә һоқуқлиридин айрилған, уйғурлар дияриниң үсти очуқ түрмигә айлинип, хәлқ назарәт астиға елинған бир вәзийәткә тоғра кәлгәнлики, әмма шундақ болушиға қаримай америкидәк һор дуняда яшаватқан уйғурларниң бир ариға җәм болуп, бир-бириниң норузини тәбриклишиватқанлиқини әсләтти. У сөзидә йәнә, уйғурларниңму өзигә-өзи хоҗа болған күнлириниң һаман бир күни келидиғанлиқиға болған үмидини билдүрди. 

Көп йиллардин бери һәр йили норуз паалийәтлиригә қатнишип келиватқан бир қисим уйғурларниң ейтишичә, америка уйғурлири бирләшмиси тәшкиллигән бу йилқи норузлуқ паалийәткә қатнашқан адәм сани адәттикидин көп болған шуниңдәк бу норузлуқ паалийәттә яш өсмүрләр вә пәрзәнтләрниң һәр хил сәнәт, уссул, шеир декламатсийәси, музика орундаш қатарлиқ талантлирини вә қизғинлиқини намаян қилишқа көпрәк пурсәт яритип берилгән.

Паалийәттә йәнә 3-айниң 15-күнидики дуня йүзлүк «бир аваз бир қәдәм» аяллар намайишини тәшкиллигүчи рошән аббас вә сурәййә қәшқәри қатарлиқ ханим-қизларниң пидакарлиқ роһиға һөрмәт билдүрүлүп, улар вә уйғур ана тили мәктипиниң оқутқучилири һәм бир қисим өсмүрләр тәқдирләнди. 

Америка уйғурлири бирләшмиси 1998-йили қурулғандин буян һәр йили җумһурийәт күни, йеңи йил, норуз, рамзан вә қурбан һейтқа охшаш аммиви байрам паалийәтлирини тәшкилләшкиму әһмийәт берип кәлмәктә.

Пикирләр (0)
Share
Толуқ бәт