Istanbulda Uyghur ana til ilmiy muhakime yighini échildi

Ixtiyariy muxbirimiz arslan
2016.02.22
Share on WhatsApp
Share on WhatsApp
Abduweli-ayup-sozde-ana-til.jpg Dunya ana til küni munasiwiti bilen ötküzülgen Uyghur ana til ilmiy muhakime yighinida abduweli ayup ependi sözde. 2016-Yili 21-féwral, istanbul.
RFA/Arslan

21-Féwral yekshenbe küni dunya ana til küni munasiwiti bilen istanbulda 6-nöwetlik “Uyghur ana til we Uyghur magistir, doktor oqughuchilar ilmiy muhakime yighini” échildi.

Bu yighin merkizi istanbulgha jaylashqan Uyghur akadémiyisi teripidin uyushturulghan bolup, yighin'gha Uyghur akadémiyisi idare hey'et ezaliri, istanbulda oquwatqan Uyghur oqutquchilar, tetqiqatchilar we oqughuchilar bolup köp sanda kishi qatnashti.

Yighin türkiye istiqlal marshini oqush bilen bashlandi. Yighinda aldi bilen Uyghur akadémiyisining bashliqi abdulhemit qaraxan échilish nutqi sözlidi.

Abdulhemit qaraxani ependi bu yighinning ehmiyiti we meqsiti toghrisida toxtilish bilen birge, Uyghur akadimiyitining xizmet pa'aliyetlirini qisqiche tonushturup ötti. Kéyin Uyghur akadémiyisining pexri re'isi doktor rishat abbas ependining tebrik sözi oqup ötüldi.

Yighinda Uyghur til tetqiqatchi abduweli ayup ependi, “Muhajiret we ana til ‏-Uyghur ana tilining muhimliqi, qoghdash tedbirliri we mesililiri” dégen témida söz qilip muhajirette yashawatqan Uyghurlar üchün ana tilning qanchilik muhim ikenliki toghrisida toxtaldi.

Abduweli ayup ependi sözide, ana til chet'ellerdiki Uyghurlar üchün meniwi ozuq ikenlikini ipadilidi. U yene barliq Uyghurlarning ana tiligha köngül bölüwatqanliqini, qiziqiwatqanliqini, ehmiyet bériwatqanliqini bildürdi we néme üchün ana tili Uyghurlar üchün muhim bolup qalghanliqini emeliy misallar bilen chüshendürüp ötti.

Yighin jeryanida yene, Uyghur akadémiyisining sabiq pexri re'isi erkin sidiq ependining yighinni tebriklep yollighan tebrik sözi oqup ötüldi.

Yighinda yene, Uyghur til tetqiqatchi quddus hapiz ependi, “Yéngi chiqqan kona gep, démektimen künde xep” dégen témida söz qilip, Uyghur til-yéziqi duch kéliwatqan xewplerni üch nuqtigha yighinchaqlidi we hel qilish usulliri üstide teklipler bérish bilen birge, bu mesilige sel qarashqa bolmaydighanliqini tekitlidi.

Yighinda yene, Uyghur ana til toghrisida yézilghan shé'irlar déklamatsiye qilindi. Yighinning kéyinki qismi Uyghur magistir we doktor oqughuchilarning ilmiy maqale teqdim qilishi bilen dawam qilghan bolup, yighinda“100 Yil burunqi Uyghur yéziq tilining bezi alahidilikliri”, “Tarixtin bügün'giche Uyghur-oghuz tili lughetliridin Uyghur tiligha nezer”, “Nöwette junggo iqtisadida körülgen mesililer” we “Uyghur tarixida xojilar dewri” dégen témilarda léksiye sözlendi.

Yighin axirida Uyghur akadémiyesining re'isi abdulhemit qaraxan ependi bilen sabiq re'is ablet turan yighinda léksiye sözligüchilerge teshekkürname teqdim qildi.

Biz bu yighinning meqsiti we ehmiyiti toghrisida Uyghur akadémiyisining re'isi abdulhemit qaraxan bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.