Almatada xelq'ara balilarni qoghdash küni xatirilendi

Ixtiyariy muxbirimiz oyghan
2017-06-02
Élxet
Pikir
Share
Print
Xelq'ara balilarni qoghdash küni murasimini uyushturghuchilarning biri, "Alamet" filim ishlesh merkizining mudiri qelbinur roziyéwa(soldin birinchi) mezkur murasimida. 2017-Yil 1-iyun, almata.
Xelq'ara balilarni qoghdash küni murasimini uyushturghuchilarning biri, "Alamet" filim ishlesh merkizining mudiri qelbinur roziyéwa(soldin birinchi) mezkur murasimida. 2017-Yil 1-iyun, almata.
RFA/Oyghan

1-Iyunda qazaqistanning barliq sheherliride xelq'ara balilarni qoghdash küni xatirilep ötüldi. Shu jümlidin almata shehirining jumhuriyet meydanidimu tunji qétim 5000 oqughuchining qatnishishi bilen yashlar we ösmürlerning sen'et guruppilirining tentenilik parati ötti. Balilar künige béghishlan'ghan bu pa'aliyetlerning meqsiti memliket prézidénti ilgiri sürgen "Menggülük el" idiyisi astida mektep we aliy oqush orunliri oqughuchilirida wetenperwerlik, birlik tuyghulirini terbiyileshtin ibaret boldi. Mezkur bayramgha béghishlan'ghan her xil pa'aliyetler sheherning dem élish baghchilirida, meydanlirida ötküzüldi.

Shu munasiwet bilen, qazaqistan xelqi assambiléyisining dostluq öyide qazaqistan Uyghurlirining jumhuriyetlik étno-medeniyet merkizi chong tentenilik murasim uyushturdi. "Sebiy dillarda shatliq sadasi" dep atalghan bu murasimni jumhuriyetlik Uyghur medeniyet merkizi re'isining orunbasari yérshat esmetof tebrik söz bilen échip, qazaqistan parlaménti aliy kéngishining ezasi shahimerdan nurumofning salimini yetküzdi hem barliq méhmanlarni qizghin tebriklidi. Murasimda sözge chiqqan rus, türk we bashqimu medeniyet merkezliri, jem'iyetlik birleshmiler wekilliri qazaqistandiki milletler dostluqi, dinlar ara razimenlik, birlik, ittipaqliq heqqide öz qarashlirini otturigha qoyup, murasimni uyushturghuchilargha minnetdarliqini izhar qildi.

Radiyomiz ziyaritini qobul qilghan jumhuriyetlik Uyghur medeniyet merkizi yénidiki xanim-qizlar kéngishining re'isi senem béshirowaning éytishiche, Uyghur medeniyet merkizi öz aldigha sheherdiki mejruh balilargha, balilar öyliride terbiyiliniwatqan yétim balilargha, shundaqla hal-oqiti nachar hem köp baliliq a'ililerning balilirigha maddiy we meniwi yardem körsitishke oxshash wezipilerni qoyghan bolup, bu qazaqistan hökümiti teripidin hertereplime qollap-quwwetlenmekte. Bu qétimqi murasimni ötküzüshke medeniyet merkizining nahiyilik shöbiliri, "Nuraniy anilar", "Janan" xeyrxahliq fondliri, bolupmu qazaqistan Uyghur yashliri birliki yéqindin yardem körsetti. S. Béshirowa xeyrxahliq teshkilatlardin tashqiri tijaretchilerning, ayrim saxawetlik insanlarning da'im mundaq ishlarda özlirining yardem qolini sozup kéliwatqanliqini alahide tekitlidi. U shundaqla bügünki dunya weziyitining intayin murekkepliship, süriye, iraq, afghanistan we bashqimu urush boluwatqan memliketlerde bigunah balilarning oq astida qéliwatqanliqigha échinip, mundaq dédi: "Qazaqistanda prézidéntimiz eng aldi bilen tinchliqni, dostluqni, birlikni meqset qilip qoyghanliqtin bizde undaq ishlar yoq. Qazaqistanda héchqachan urush bolmisun, balilirimizning közliride yash bolmisun, anilar yighlimisun. Shuning üchün barliq milletler birliship, mushu dostluqni saqlashta prézidéntimizning shu siyasitini qollap-quwetlewatimiz. Shu jümlidin biz, Uyghur anilirimu, balilirimizni terbiyilep, bir kishilik hessimizni qoshup kéliwatimiz."

S. Béshirowa shundaqla perzentlirini tashlap, ularning bextige palta chépiwatqan atilarni, bolupmu anilarni insaniyliqqa, méhir-shepqetke chaqirip, her birining öz wezipisige jawabkarliq bilen qarashning, jem'iyetning angliq ezaliri bolup qélishning muhimliqini tekitlidi.

Murasimni uyushturghuchilarning biri "Alamet" filim ishlesh merkizining mudiri qelbinur roziyéwa mezkur murasimgha her xil millet wekillirining qatnashqanliqini, ularning qazaqistan xelqining birlikini, ittipaqliqini körsitidighan köpligen sen'et nomurlirini namayish qilghanliqini otturigha qoyup, mundaq dédi: "Bizning omaq we talantliq balilirimiz süret sizip, öz hünerlirini körsetse, ussulchi yigit-qizlirimiz sehnide musabiqilerge chüshüp, bayram bek qaynap kétiwatidu. Süret sizish musabiqisi 'méning qazaqistanim' dep atilip, balilar ichki dunyasini shu süretlerde körsetti. 'kélinglar, ussul oynayli' dégen pa'aliyettimu ussulchilirimiz hemmisining könglini aldi."

Q. Roziyéwaning éytishiche, bu pa'aliyetke qatnashqanlarning arisidin, bolupmu almata shehiridiki Uyghur tilida bilim béridighan mektepler oqughuchilirining talanti köpchilikning alqishigha sazawer bolghan. Q. Roziyéwa bu bayramdin chong qattiq tesirlen'gen balilar, ata-anilar we uning bashqimu qatnashquchilirining qelbide heqiqetenmu shatliq sadasining yangrighanliqini alahide tekitlidi.

Toluq bet