Германийәдики уйғур җамаити миюнхенда норуз паалийити өткүзди

Ихтияри мухбиримиз әкрәм
2018-03-26
Елхәт
Пикир
Share
Принт
Германийәдики уйғур җамаити 2018-йиллиқ норузни бирликтә тәбриклиди
Германийәдики уйғур җамаити 2018-йиллиқ норузни бирликтә тәбриклиди
RFA/Ekrem

25-Март күни германийәдики уйғур җамаити мюнхен шәһиридә дағдуғилиқ  норуз паалийити өткүзди.

Дуня уйғур қурултийиниң ярдими вә қоллиши, «яврупа шәрқий түркистан бирлики» ниң орунлаштуруши билән 25-март күни чүштин кейин германийәниң мюнхен шәһиридә өткүзүлгән норуз паалийитигә мюнхен вә йеқин әтраптики шәһәрләрдин кәлгән көплигән уйғурлар қатнашти. Мюнхендики бир қисим кишилик һоқуқ тәшкилатлириниң мәсуллири вә түрк тәшкилатлириниң вәкиллириму бу паалийәткә тәклип билән қатнашти.

Норуз паалийити алди билән «шәрқий түркистанниң истиқлал марши» ни орунлаш билән башланди. Йүзлигән уйғур җамаити орунлиридин турушуп, қоллирини көксигә қоюп, «истиқлал марши» ға болған һөрмитини билдүрди.

Паалийәттә уйғурчә миллий уссул кийимлирини кийгән миюнхендики яш-өсмүрләрниң орунлишида норузлуқ түрлүк сәнәт номурлири көрситилди. Хитай һөкүмитиниң уйғур елида нөвәттә йүргүзиватқан қаттиқ бастуруш сияситини әйипләйдиған нутуқ вә пикирләр баян қилинди. Голландийәдин тәклип қилинған сазәндиләрниң муңлуқ нахшилири, уйғур өсмүрлириниң гүзәл уссуллири вә ләтипилири дилларни сөйүндүрсә, уйғур сиясий актиплириниң тәсирлик сөзлири миллий роһни урғутти.

Мәзкур паалийәтни орунлаштурған «яврупа шәрқий түркистан бирлики» ниң рәиси турғунҗан алавудун бу хусуста нәқ мәйданда зияритимизни қобул қилғанда бу қетимқи норуз паалийитиниң ноқул бир байрамла әмәс, бәлки миллий роһни тәрбийиләйдиған дәрс болғанлиқини тәкитлиди.

Бу қетимлиқ норуз паалийитигә «голландийә уйғур ансамбили» ниң сазәндилири, мюнхендики халисә ханимниң сәнәт гурупписидики уссулчилар вә миюнхендики ана тил мәктипиниң оқуғучилири мәхсус тәйярлиған сәнәт номурлирини көрсәтти. Улар орундиған номурларда вәтән муһәббити, миллий туйғу, көк байраққа болған сөйгү һәмдә хитай һакимийитигә болған нәпрәтләр әкис әттүрүлди. Паалийәткә иштирак қилған уйғур җамаити сорундики йоқири миллий кәйпияттин һозур һес қилишқанлиқлирини тилға елишти. Норуз өткүзүлгән залму көк байрақлар вә уйғур миллий безәклири билән безәлгән иди.

Миюнхенда өткүзүлгән бу норуз паалийитигә риясәтчилик қилған пәрһат йоруңқаш әпәндиму өзиниң бу қетимлиқ норузниң мәзмуниға болған мәмнунийәтлирини изһар қилди. Алайитән германийәниң вуртзбург шәһридин кәлгән уйғур сиясий затлиридин әркин алиптекин әпәндиму бу паалийәттә сөз елип, уйғур җамаитигә болған норузлуқ тиләклирини ижар қилип өтти.

4 Саәт давам қилған норуз паалийитиниң хатимисидә сөзгә тәклип қилинған дуня уйғур қурултийиниң рәиси долқун әйса әпәнди бу паалийәткә иштирак қилған уйғур җамаитиниң норуз байримини тәбриклиди. У йәнә германийәдики уйғур җамаитини 4-айниң 27-күни белгийә пайтәхти бирюсселда өткүзилидиған 5 миң кишилик намайишқа паал аваз қошушқа чақирди.

Пикирләр (0)
Share
Толуқ бәт