Gérmaniyede “Ötmüshni séghinish” namliq sen'et kéchiliki ötküzüldi

Ixtiyariy muxbirimiz ekrem
2016-11-11
Share
germaniye-otmushni-seghinish-2016.jpg “Ötmüshni séghinish” namliq sen'et kéchilikidin bir körünüsh
RFA/Ekrem


11-Noyabir küni gérmaniyening myunxén shehiride Uyghur foliklori tetqiqatchisi nurnisa xanimning “Ötmüshni séghinish” namliq senet kéchiliki ötküzüldi.

Uyghurlarni uzun yillardin buyan Uyghur medeniyiti we sen'iti arqiliq gérmaniye xelqige tonutushni özining muhim wezipiliri qatarida tutup kelgen Uyghur foliklori tetqiqatchisi, gérmaniye Uyghur ayalliri komitétining re'isi nurnisa xanim 11-ayning 11-küni myunxén sheherlik medeniyet idarisining qollishi bilen özining “Ötmüshni séghinish” témisidiki sen'et kéchilikini muweppeqiyetlik ötküzdi.

Myunxén sheherlik medeniyet idarisi zalida ötküzülgen bu kéchilikke köp sanda Uyghur we chet'ellik méhmanlar tamashibin süpitide qatnashti. Myunxén shehiridiki Uyghur perzentlirining usul yitekchisi xalise xanim terbiyiligen yash ösmür usulchilar hemde nurnisa xanim Uyghur éghiz edebiyati boyiche terbiyiligen ösmür balilar bu qétimqi kéchilikte sap Uyghurche til we kéyimler bilen nomur körsitip, tamashibinlarning alqishigha érishti.

Myunxén medeniyet idarisining pa'aliyet zalida, bu küni myunxénda yashawatqan her millet kishilirining sen'et nomurlirimu orunlandi. Uyghurlargha ajritip bérilgen waqitni Uyghur sebilirining türlük omaq söz-heriketliri we yash-ösmürlerning Uyghurche nepis usulliri hemde naxshiliri bilen tesirlik bir shekilde ötküzgen nurnisa xanim, bu pa'aliyetning ünümi üchün bir qisim Uyghur sazendilerni qoshna ellerdin teklip qilip keltürgen idi. Alayiten gollandiyedin kelgen Uyghur sazendisi kamil abbas ependi we bashqa sen'etkarlar “Ötmüshni séghinish” témisidiki bu sen'et kéchilikining muweppeqiyiti üchün hessiler qoshti. Nurnisa xanim bu pa'aliyetler munasiwiti bilen ziyaritimizni qobul qilghanda, özining yürek sözlirini hayajanliq ibariler bilen ipade qildi.

Myunxén shehiridiki Uyghur jama'iti, d u q xadimliri hemde yawrupa sherqiy türkistan birliki teshkilatining rehberliri 13-noyabir küni ötküzilidighan ikki jumhuriyetni xatirilesh we rabiye xanim tewellutining 70 yilliqini qutluqlash, “Uyghur milliy dewasini küchlendürüshning istratégiyilik yolliri” témisida sözlinidighan léksiye ishlirini orunlashturush qatarliq murasimlargha teyyarliq qilish, shundaqla chet'ellerdin bu murasimlargha qatnishish üchün kéliwatqan méhmanlarni kütiwélish ishliri bilen aldirash bolup, 11-ayning 11-küni ötküzülgen bu pa'aliyetke toluq qatnishalmighan bolsimu, nurnisa xanim we xalise xanimlarning bu xildiki medeniy pa'aliyetler arqiliq Uyghurlarni tonutush xizmitige yuqiri bahalar berdi. Yawrupa sherqiy türkistan birliki teshkilatining re'isi esqerjan ependi mana bulardin biridur.

11-Noyabir ötküzülgen “Ötmüshni séghinish” témisidiki sen'et kéchilikige qatnishish pursitige érishken bir qisim Uyghurlarmu bu pa'aliyettin hasil qilghan tesiratlirini bayan qilishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet