Öz xelqini ottura asiya xelqlirige tonushturush sepirige atlan'ghan yazghuchi

Muxbirimiz ümidwar
2015.09.03
Uyghur-yazghuchi-Ismayiljan-Iminof-1-305.jpg Qazaqistanda tonulghan Uyghur yazghuchisi isma'iljan iminof.
RFA/Oyghan


Ismayiljan iminof ottura asiyadiki qazaqistan Uyghurliri arisida Uyghurlarning ana wetini, Uyghurlarning medeniyiti - tarixi we bashqa ehwalliri heqqide edebiy axbarat zhanirida köpligen eserlerni rus tilida yézip neshir qildurup, oqurmenlerning étirap qilishigha érishken yazghuchidur.

Ötken esirning 70 - 90 - yillirida ottura asiyaliqlar arisida qirghiz yazghuchisi chinggiz aytmatof öz eserlirini biwasite rus tilida yézip, sabiq sowét ittipaqi da'irisidin halqip, chiqip, xelq'aragha tonulghan meshhur yazghuchigha aylan'ghan idi. Mutexessislerning qarishiche, chinggiz aytmatofning bu netijilirining tesiri astida qazaq, özbék, ezerbeyjan, tajik, tatar we bashqa xelqler arisidimu xéli köp sanda yazghuchilar öz eserlirini rus tilida yézip, élan qilish bir dolqun'gha aylan'ghan idi. Ene shu xelqler qatarida sani nahayiti az bolghan bir qisim Uyghur yazghuchilirimu öz edebiy eserlirini rus tilida yézip neshir qildurdi.

Hazir qazaqistanda yashaydighan Uyghur yazghuchi ismayiljan iminof Uyghurliri arisida rus tilida edebiy eser yazidighan az sandiki yazghuchilarning biri bolup, u hazir ottura asiya jumhuriyetliridiki her millet oqurmenlirige yaxshi tonulghan Uyghur yazghuchilirining birige aylan'ghan.

U, özining “Ezizane qeshqer”namliq rus tilidiki edebiy axbarat kitabi we bashqa eserliri arqiliq yaxshi tonulghan hemde her millet oqurmenlirining étirap qilishigha érishken idi.

Qazaqistan metbu'atliri Uyghur yazghuchisi ismayiljan iminofning qeshqeriye seper xatiriliri heqqide yazghan kitabi we uning ijadiy pa'aliyiti üchün mexsus murasim ötküzüp bergenliki hemde rusiye bash konsulining uning Uyghurlarning medeniyiti we tarixi heqqide yazghan publistikiliq eserlirige yuqiri baha bergenliki xewer qilin'ghan idi.

Ismayiljan iminof 1959 - yili qazaqistanning almuta wilayitidiki mutleq köp qisim ahalisi qazaqlardin terkip tapqan bir yézida Uyghur ziyaliysi a'iliside tughulghan.

U, özining pütünley rusche ma'arip terbiyesi körgenlikige qarimay, Uyghur tilini puxta öginishke tirishqanliqi we öz ana tilida köpligen eserlerni oqughanliqini bayan qildi.

Shuningdek u yene Uyghur medeniyiti, tarixi, sen'iti, bolupmu Uyghurlarning ana wetini qeshqer, ghulja, turpan qatarliq jaylar heqqide xatirilerni rus tilida yézip neshir qildurush arqiliq Uyghur xelqini rus tilliq xelqlerge tonushturushni nishan qilghanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.