Istanbulda "Uyghur longqisi" ni talishish waskétbol musabiqisi ötküzüldi

Ixtiyariy muxbirimiz arslan
2018-04-23
Share
Uyghur-longqusini-talishish-basketbol-musabiqisi-Istanbul-2018-01.JPG Istanbulda ötküzülgen Uyghur longqisini talishish waskétbol musabiqisidin bir körünüsh. 2018-Yili 21-aprél. Istanbul, türkiye.
RFA/Arslan

Istanbulda yéngi qurulghan sherqiy türkistan tenterbiye we tereqqiyat jem'iyitining uyushturushi bilen 21-22-aprél künliri istanbul zeytinburnu chirpiji baghchisidiki tenterbiye meydanida "Uyghur longqisi" ni talishish waskétbol musabiqisi ötküzüldi.

Musabiqige istanbuldiki za'im uniwérsitétining Uyghur oqughuchilar komandisi, tejdid uniwérsitéti we istanbul tijaret uniwérsitéti Uyghur komandilirining qatnishishi bilen birge yene Uyghur kulubi komandisi, zeytinburnu guruppisi, sefaköy guruppisi qatarliq komandilar musabiqige qatnashti.

Musabiqining échilish murasimida sherqiy türkistan ölimalar birlikining mu'awin re'isi sirajidin ezizi, sherqiy türkistan ma'arip we hemkarliq jem'iyitining bash katipi abdul'ehed abduraxman, sutuq bughraxan ilim we medeniyet wexpidin ömer qarim, yéngi nesil herikiti jem'iyitining re'isi abdusalam teklimakan qatarliq kishiler söz qilip, Uyghur yashlirining bu pa'aliyitini yéqindin qollap-quwwetleydighanliqini bildürüshti.

Sirajidin ezizi bu musabiqining uyushturulghanliqidin söyün'genlikini ipadilidi we "Tenterbiye insanni jismaniy jehettin küchlendürüpla qalmastin, belki eqliy jehettin, exlaqi jehettin we bashqa jehetlerdimu insanni takamullashturidighan bir amil", dédi. 

U yene mundaq dédi: "Muhajirette yashawatqan Uyghurlar arisida dölet komandisigha qatnishidighan Uyghur tenheriketchilirining yétiship chiqishi intayin muhim. Chünki tenterbiye sahesidimu Uyghur millitini tonushturush bizning mes'uliyitimiz. Sherqiy türkistan tenterbiye jem'iyitining tereqqiy qilip yashlarni yéteklishi biz sherqiy türkistan xelqi üchün intayin paydiliq dep qaraymen we bu xil pa'aliyetlerni yéqindin qollap-quwwetleymen."
Bu musabiqe sherqiy türkistan tenterbiye we tereqqiyat jem'iyitining tunji pa'aliyiti bolup, istanbulda yashawatqan Uyghur muhajirlarning waskétbol saheside tunji qétim teshkillinip musabiqe uyushturushi bolup hésablinidiken.

Sutuq bughraxan ilim we medeniyet wexpining mes'ulliridin ömer qarim, bu pa'aliyetni uyushturghan sherqiy türkistan tenterbiye we tereqqiyat jem'iyitini tebrikleydighanliqini bildürdi we ularning her sahede yashlarni terbiyilep yétekleshte qilishqa tégishlik xizmet-pa'aliyetlerni jiddiy türde élip bérishini ümid qilidighanliqini bildürdi.

U mundaq dédi: "Sherqiy türkistan tenterbiye jem'iyitining mushu sahede yashlarni terbiyilep, hem tenheriket hem ilmiy tereptin hem siyasiy tereptin ularni yétishtürüshini kelgüside milletning ulardin kütüwatqan ümidini aqlishini telep qilimen. Buningdin kéyin bu jem'iyetning téximu tereqqiy qilishi üchün qolimizdin kélishiche maddiy we meniwi jehettin qollap-quwwetleymen. Yaxshi netijilerni qolgha keltürüshige tilekdashliq bildürimen."
Biz bu pa'aliyet toghrisida téximu tepsiliy melumat igilesh üchün bu musabiqini uyushturghan sherqiy türkistan tenterbiye we tereqqiyat jem'iyitining bashliqi tahirjan kökbayraq bilen söhbet élip barduq. 

Tahirjan bu pa'aliyetni uyushturushtiki asasiy meqsiti toghrisida toxtilip, mundaq dédi: "Bu musabiqe nahayiti yaxshi we köngüllük boldi dep qaraymen. Bu musabiqini uyushturushtiki meqsitimiz shuki, türkiyede yashawatqan Uyghur yashlarni mushu musabiqe arqiliq bir-birige tonushturush, öz-ara dostluq munasiwiti ornitish, yashlargha jem'iyet qurulghanliqini bildürüsh, buningdin kéyinki pa'aliyetlerde ulargha yardemchi bolidighanliqimiz we kelgüside téximu yaxshi pa'aliyetlerni teshkilleydighanliqimizni ulargha bildürüshtin ibaret." 

Tahirjanning bildürüshiche, bu qétimqi waskétbol musabiqisi 21- we 21-aprél künliri ikki kün dawam qilghan bolup, 22-aprél chüshtin kéyinki hel qilghuch musabiqide istanbuldiki tejdid uniwérsitéti oqughuchiliri komandisi birinchilikke, Uyghur kulubi komandisi ikkinchilikke, istanbul tijaret uniwérsitéti oqughuchiliri komandisi üchinchilikke érishken. Birinchilikke érishken komandigha sherqiy türkistan tenterbiye jem'iyitining logosi chüshürülgen kömüsh renglik longqa we 400 türk lirasi neq pul mukapat bérilgen. Ikkinchilikke érishken Uyghur kulubi komandisigha kömüsh renglik longqa bilen 300 türk lirasi neq pul mukapat bérilgen.

Mukapatlarni mahirlargha sherqiy türkistan ma'arip we hemkarliq jem'iyitining bash katipi abdul'ehed abduraxman bilen sherqiy türkistan ölimalar birlikining mes'ulliridin hebibulla küseni teqdim qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.