Истанбулда өткүзүлгән норуз байримини тәбрикләш паалийитигә уйғурларму қатнашти

Ихтиярий мухбиримиз арслан
2018.03.23
Share on WhatsApp
Share on WhatsApp

21-Март күни истанбул валийлиқи, истанбул шәһәрлик һөкүмәт, зәйтинбурну шәһәрлик һөкүмәт, истанбул мәдәнийәт идариси қатарлиқ орунларниң бирликтә уюштуруши билән истанбулдики түрк дуняси бағчисида норуз байримини тәбрикләш паалийити өткүзүлди. Бу паалийәткә уйғурларму қатнишип, ай-юлтузлуқ көк байрақни ләпилдәтти. Норуз әһлигә уйғур полуси тарқитилди.

Истанбул валийси васип шаһин, истанбулниң шәһәр башлиқи мәвлут уйсал оғли қатарлиқ әрбаблар сөз қилип, түрк дуняси хәлқлириниң норуз байримини тәбриклиди. Улар бирдәк норуз байриминиң түрк дунясидики хәлқләрниң қериндашлиқ мунасивәтлириниң күчийишигә, түрк дунясиниң тинчлиқ вә хатирҗәмлик ичидә өтүшигә бир васитә болушини арзу қилидиғанлиқини билдүрди.
Паалийәт җәрянида, уйғур, түрк, қазақ, қирғиз, өзбек, татар қатарлиқ хәлқләрниң миллий нахша-музикилиридин арийәләр көрситилди. 

Норузни қутлаш паалийити җәрянида сәһнигә есилған түрк дунясидики дөләтләрниң байрақлири арисида шәрқий түркистанниң ай-юлтузлуқ көк байриқиму җәвлан қилди. “явро-асия түрк җәмийәтлири федиратсийәси” ниң рәиси исмаил җенгиз көргәзмә ечип, уйғурларниң мәдәнийәтлири вә әнәнилирини қериндаш түрк дуняси хәлқлиригә тонуштурди. 

Истанбул валийси васип шаһин, истанбулниң шәһәр башлиқи мәвлут уйсал қатарлиқ рәһбәрләр тухум чеқиштурди, оттин атлиди, базған билән төмүр соқти. Түрк дуняси мәдәнийәт көргәзмисини айлинип чиқти. Исмаил җенгизниң билдүрүшичә, истанбулниң шәһәр башлиқи мәвлут уйсал әпәнди уйғур көргәзмисини зиярәт қилғанда, қәшқәр вә үрүмчидиму норуз байриминиң тәбриклинишини арзу қилидиғанлиқини ипадилигән. 

Биз бу паалийәт тоғрисида пикир қарашлирини елиш үчүн паалийәткә қатнашқан уйғурлардин “явро-асия түрк җәмийәтләр федиратсийәси” рәиси исмаил җенгиз билән истанбулдики уйғур паалийәтчиләрдин асийә қарақаш ханим билән сөһбәт елип бардуқ. Улар өзлириниң бу йилқи истанбулда өткүзүлгән норуз байримини қутлаш паалийитидин алған тәсиратлирини баян қилишти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.