Истанбулда 3000 дәк уйғур җәм болуп қурбан һейтни қутлиди

Ихтиярий мухбиримиз арслан
2018-08-23
Елхәт
Пикир
Share
Принт
Истанбулдики уйғурларниң һейтлиқ паалийитидин көрүнүш. 2018-Йили 23-авғуст.
Истанбулдики уйғурларниң һейтлиқ паалийитидин көрүнүш. 2018-Йили 23-авғуст.
RFA/Arslan

Пүтүн дунядики мусулманлар бу йиллиқ қурбан һейт тәнтәнисигә чөмүлгән бир пәйттә муһаҗирәттики уйғурлар, җүмлидин истанбулда яшаватқан уйғурлар бу байрамни еғир кәйпиятта күтүвалди. Улар һейт өткүзүватқандәк көрүнгини билән қәлби вәтәндики еғир зулумлар вә тутқун қилинған уруқ-туғқанлириниң отида пучиланмақта иди.

Бүгүн, йәни 23-авғуст пәйшәнбә күни истанбулда яшаватқан уйғурлардин 3000 дәк киши бир җайға җәм болуп қайғуни күчкә айландурди вә қурбан һейт байримини бирликтә өткүзди.

Истанбулдики уйғур җамаити вәтини вә зулум чекиватқан хәлқигә мәдәт бериш шундақла бирдәм болсиму қәлблиридики ғәм-қайғуни унтуп өзлиригә ғәйрәт-җасарәт беғишлаш үчүн қурбан һейтниң 3-күни истанбулниң күчүкчәкмәҗи районидики авҗилар деңиз саһилиға җәм болди һәмдә бир-бириниң қурбан һейтини мубарәкләшти.

Бу қетимқи қутлаш паалийитини шәрқий түркистан тәшкилатлар бирлики уюштурған болуп, паалийәт қуран кәрим тилавити билән башланди. Паалийәттә алди билән шәрқий түркистан тәшкилатлар бирликиниң рәиси һидайәтулла оғузхан ечилиш сөзи сөзләп, йиғин әһлиниң қурбан һейт байримини тәбриклиди.

Һидайәтулла оғузхан бу паалийәтни уюштуруштики асасий мәқсәт үстидә тохтилип, уйғурлар нөвәттә дәрд-әләм вә көз яшлири билән турған қайғулуқ күнләрдә бирлик-иттипақлиқни күчләндүрүш, достлуқ вә муһәббәтни ашуруш, җараһәтләнгән көңүлләрни арам тапқузуш үчүн мәзкур паалийәтни уюштурғанлиқини билдүрди.

Һидайәтулла оғузхан сөзидә уйғурларда бирлик вә иттипақлиқ болғандила һәрқандақ қийинчилиқ вә мусибәтлик күнләрдин қисқа вақит ичидә қутулуп чиқалайдиғанлиқиға ишинидиғанлиқини тәкитлиди.

Паалийәттә йәнә уйғур өсмүрләр һәр хил мәзмунда шеир декламатсийә қилди, нахша оқуди вә челишиш мусабиқиси өткүзди. Уйғур яшлириниң челишиш мусабиқиси сорундики һәммә кишини қизиқтурди.

Паалийәттә йәнә шәрқий түркистан өлималар бирликиниң рәиси доктор атавуллаһ шәһяр сөз қилип, уйғур җамаитиниң қурбан һейт байримини тәбриклиди вә уларни қайғуни күчкә айландуруп, һәр вақит үмидвар яшашқа чақириқ қилди.

Доктор атавулла шәһяр сөзидә йәнә гәрчә уйғурлар бүгүн ғәм-қайғулуқ күнләрни яшаватқан болсиму, әмма ислам дининиң көрсәтмиси бойичә қурбан һейтни тәбрикләп, өзлиригә мәдәт вә тәсәлли беришниң зөрүрлүкини тәкитләп өтти.

Арқидин шәрқий түркистан өлималар бирликиниң һәйәт әзалиридин һәбибулла күсәний сөз қилип, қериндашлириниң қурбан һейтни тәбриклиди.
Ундин башқа дини алим мәхмутҗан билән уйғур паалийәтчи абдурахман әпәндиләрму зияритимизни қобул қилип, өзлириниң бүгүнки тәсиратлирини баян қилди.

Истанбулдики уйғурлар өткән роза һейтниму бирликтә өткүзгән болуп, рози һейтни қутлаш паалийитигә истанбулдики 6000 дин артуқ уйғур қатнашқан иди. Шу қетимлиқ һейт паалийитигә түркийә ички ишлар министири сулайман сойлу әпәндиму қатнишип, уйғурларға алақидар иқамәт бериш қатарлиқ муһим баянатларни елан қилған иди.

Пикирләр (0)
Share
Толуқ бәт