Istanbulda 3000 dek Uyghur jem bolup qurban héytni qutlidi

Ixtiyariy muxbirimiz arslan
2018-08-23
Élxet
Pikir
Share
Print
Istanbuldiki Uyghurlarning héytliq pa'aliyitidin körünüsh. 2018-Yili 23-awghust.
Istanbuldiki Uyghurlarning héytliq pa'aliyitidin körünüsh. 2018-Yili 23-awghust.
RFA/Arslan

Pütün dunyadiki musulmanlar bu yilliq qurban héyt tentenisige chömülgen bir peytte muhajirettiki Uyghurlar, jümlidin istanbulda yashawatqan Uyghurlar bu bayramni éghir keypiyatta kütüwaldi. Ular héyt ötküzüwatqandek körün'gini bilen qelbi wetendiki éghir zulumlar we tutqun qilin'ghan uruq-tughqanlirining otida puchilanmaqta idi.

Bügün, yeni 23-awghust peyshenbe küni istanbulda yashawatqan Uyghurlardin 3000 dek kishi bir jaygha jem bolup qayghuni küchke aylandurdi we qurban héyt bayrimini birlikte ötküzdi.

Istanbuldiki Uyghur jama'iti wetini we zulum chékiwatqan xelqige medet bérish shundaqla birdem bolsimu qelbliridiki ghem-qayghuni untup özlirige gheyret-jasaret béghishlash üchün qurban héytning 3-küni istanbulning küchükchekmeji rayonidiki awjilar déngiz sahiligha jem boldi hemde bir-birining qurban héytini mubarekleshti.

Bu qétimqi qutlash pa'aliyitini sherqiy türkistan teshkilatlar birliki uyushturghan bolup, pa'aliyet qur'an kerim tilawiti bilen bashlandi. Pa'aliyette aldi bilen sherqiy türkistan teshkilatlar birlikining re'isi hidayetulla oghuzxan échilish sözi sözlep, yighin ehlining qurban héyt bayrimini tebriklidi.

Hidayetulla oghuzxan bu pa'aliyetni uyushturushtiki asasiy meqset üstide toxtilip, Uyghurlar nöwette derd-elem we köz yashliri bilen turghan qayghuluq künlerde birlik-ittipaqliqni küchlendürüsh, dostluq we muhebbetni ashurush, jarahetlen'gen köngüllerni aram tapquzush üchün mezkur pa'aliyetni uyushturghanliqini bildürdi.

Hidayetulla oghuzxan sözide Uyghurlarda birlik we ittipaqliq bolghandila herqandaq qiyinchiliq we musibetlik künlerdin qisqa waqit ichide qutulup chiqalaydighanliqigha ishinidighanliqini tekitlidi.

Pa'aliyette yene Uyghur ösmürler her xil mezmunda shé'ir déklamatsiye qildi, naxsha oqudi we chélishish musabiqisi ötküzdi. Uyghur yashlirining chélishish musabiqisi sorundiki hemme kishini qiziqturdi.

Pa'aliyette yene sherqiy türkistan ölimalar birlikining re'isi doktor atawullah shehyar söz qilip, Uyghur jama'itining qurban héyt bayrimini tebriklidi we ularni qayghuni küchke aylandurup, her waqit ümidwar yashashqa chaqiriq qildi.

Doktor atawulla shehyar sözide yene gerche Uyghurlar bügün ghem-qayghuluq künlerni yashawatqan bolsimu, emma islam dinining körsetmisi boyiche qurban héytni tebriklep, özlirige medet we teselli bérishning zörürlükini tekitlep ötti.

Arqidin sherqiy türkistan ölimalar birlikining hey'et ezaliridin hebibulla küseniy söz qilip, qérindashlirining qurban héytni tebriklidi.
Undin bashqa dini alim mexmutjan bilen Uyghur pa'aliyetchi abduraxman ependilermu ziyaritimizni qobul qilip, özlirining bügünki tesiratlirini bayan qildi.

Istanbuldiki Uyghurlar ötken roza héytnimu birlikte ötküzgen bolup, rozi héytni qutlash pa'aliyitige istanbuldiki 6000 din artuq Uyghur qatnashqan idi. Shu qétimliq héyt pa'aliyitige türkiye ichki ishlar ministiri sulayman soylu ependimu qatniship, Uyghurlargha alaqidar iqamet bérish qatarliq muhim bayanatlarni élan qilghan idi.

Toluq bet