Qaraqash chinibaghda herbir kentte birdin jeset bir terep qilish orni qurulghan

Muxbirimiz shöhret hoshur
2018-06-25
Élxet
Pikir
Share
Print
Xoten shehiri arish yéza awap kent "Depne ishliri mulazimet merkizi". 2018-Yili. Xoten.
Xoten shehiri arish yéza awap kent "Depne ishliri mulazimet merkizi". 2018-Yili. Xoten.
RFA/Shohret Hoshur

Muxbirimizning bu yilning béshida qaraqashtin ehwal igilishi dawamida, mezkur nahiyede depne murasimi orni nami astida jeset bir terep qilish orunlirining qurulushqa bashlighanliqi we buning urchi qatarliq yézilarda 4-5 kentte birdin tesis qilin'ghanliqi ashkarilan'ghan idi. Muxbirimizning bu heptidiki éniqlishi dawamida, jeset bir terep qilish ornining qaraqash bazar ichidiki chiniwagh saqchixanisi tewelikide her bir kentte birdin qurulghanliqi ashkarilandi.

Uyghur rayonining bir qisim jaylirida zor kölemlik jeset köydürüsh orunliri quruluwatqandin bashqa yene qeshqer, xotenlerde depne murasimi orni we méyit uzitish orni dégendek namlarda jeset bir terep qilish orunlirining taki kentlerge qeder kéngeytiliwatqanliqi ashkarilanmaqta. Saqchi xadimlirining pash qilishiche, qaraqash nahiyesining chinibagh saqchixanisigha qarashliq 13 kent we 2 ahaliler komitétining hemmiside birdin jeset bir terep qilish orni tesis qilin'ghan.

Bir kent amanliq mudirining bildürüshiche, qaraqashtiki bu jeset bir terep qilish orunlirining qurulushi bultur 7-ayda, yeni yighiwélish lagérliri tesis qilinip 4 aydin kéyin qurulushqa bashlighan.

Bu yilning béshidiki éniqlashlirimiz dawamida, qaraqashning urchi yézisida jeset bir terep qilish ornining qurulushqa bashlighanliqini we shu mezgilge qeder 4-5 kentke birdin jeset bir terep qilish orni qurulghanliqi ashkarilan'ghan idi.

Bügün yene dunya Uyghur qurultiyining aliy rehbiri rabiye qadir xanim bir bayanat élan qilip, Uyghur rayonida nöwette jeset köydürüsh orunliri quruluwatqanliqi heqqidiki uchurlardin qattiq endishe hés qiliwatqanliqini bayan qildi.

U, xelq'ara Uyghur kishilik hoquq we démokratiye fondi torida élan qilin'ghan "Bir shumluqtin puraq kéliwatidu, xelq'arada jama'etni diqqet qilishqa chaqirimen" mawzuluq bu bayanatta lagérlarda solinip yatqan bir milyondin artuq Uyghurning nöwettiki ehwali we teqdiri heqqidiki jiddiy endishisini tilgha alghan.

Bayanatida Uyghur rayondiki lagérlar bilen natsistlarning yighiwélish lagérliri arisida bir sélishturma élip barghan rabiye xanim, xitay hakimiyitining 1989-yilidiki tyen'enmén weqeside öz ewladlirini tanka bilen basturulup öltürgenlikini eslitip, ötken esiride natsistlarning yighiwélish lagérlirida yüz bergen paji'elerning Uyghur rayonidiki lagérlarda yüz bérish éhtimalliqini chetke qéqishqa bolmaydighanliqini eskertken we xelq'ara jama'etni Uyghur rayonining weziyiti, jümlidin yighiwélish lagérliri üstidin derhal bir tekshürüsh élip bérishqa dewet qilghan.

Toluq bet