Лондонда «қәшқәрдин истанбулғичә» намлиқ консертта уйғурлар тонуштурулди

Ихтиярий мухбиримиз әркин тарим
2018-03-28
Елхәт
Пикир
Share
Принт
Лондондики юнус әмрә иниститутида өткүзүлгән «қәшқәрдин истанбулғичә» консертидин бир көрүнүш. 2018-Йили 27-март. Лондон.
Лондондики юнус әмрә иниститутида өткүзүлгән «қәшқәрдин истанбулғичә» консертидин бир көрүнүш. 2018-Йили 27-март. Лондон.
RFA/Erkin Tarim

Норуз байрими мунасивити 24-март күни лондон уйғур уюшмисида, 25-март күни болса лондон университетида норуз паалийити уюштурулған болуп, уйғурлар бу паалийәтләргә қатнишип уйғур нахша-уссул вә музикилирини орундиған. 27-Март күни болса лондондики юнус әмрә институтида «қәшқәрдин истанбулғичә» консерти өткүзүлгән. Консертта уйғур сәнәтчиләр билән түрк сәнәтчиләр уйғур нахша-музикилири билән түрк нахша-музикилирини орундиған.

Лондон университети оқутқучиси доктор рачел харрис ханим қурған уйғур ансамбилидики уйғур сәнәтчиләрдин рәһимә мәхмут ханим, туңган музикант искәндәр диң, түркийәниң бурса чеһридики улудағ университети музика оқутқучиси доктор әрдәм өздәмир қатарлиқ сәнәтчиләр уйғурчә, түркчә нахша-музикилардин өрнәкләр сунған.

Бу һәқтә зияритимизни қобул қилған доктор әрдәм өздәмир әпәнди мундақ деди: «26-март күни лондон юнус әмрә институтида лондон уйғур ансамбилидики рәһимә мәхмут ханим билән бирликтә оюн қойдуқ. Бу оюнниң биринчи қетимлиқини икки йил бурун қойған идуқ. Лондон уйғур ансамбили узун йиллардин бери бу паалийитини давамлаштуруватиду. Лондондин сирт дуняниң һәр қайси җайлирида консерт бериватиду. Мән үч йил бурун уйғур музикиси тоғрисида докторлуқ илмий мақалә йезиш үчүн лондонға кәлгән вақтимда бу өмәккә қатнашқан идим. 3 Йилдин бери бирликтә консерт бериватимиз.»

У, өзиниң докторлуқ илмий мақалисиниң темисиниң «уйғур музикиси билән түрк музикиси оттурисидики охшашлиқлар вә пәрқләр» икәнликини, лондонда уйғур музикисиға қизиқидиғанларниң көп икәнликини баян қилип мундақ деди: «мениң докторлуқ илмий мақаләмниң темиси ‹түрк музикиси билән уйғур музикиси оттурисидики охшашлиқлар вә пәрқләр' иди. Мән уйғур ансамбилиға киргәндин кейин түрк музикилирини орундидим. яхши маслаштуқ. Түнүгүнки консертимизға қизиқиш юқири иди. Музикантлар, музика һәвәскарлири, лондондики һәрқайси университетларда музика дәрси бериватқан оқутқучиларниң консертимизға келиши бизни бәкла хурсән қилди. Булардин сирт лондонда туруватқан түркләр вә уйғурларму қатнашти. Лондон уйғур консертлириға узун йиллардин бери саһипханлиқ қиливатиду. Лондонда уйғур музикилириға қизиқиш интайин юқири.» 

Рәһимә мәхмут ханим түркийәниң лондондики юнус әмрә институтида өткүзүлгән «қәшқәрдин истанбулғичә» консерти қәшқәр нахшиси «мираҗихан» билән истанбул нахшиси «арал вә саһилларда сени сақлаймән» дегән нахша билән башлинип, «розиләм» дегән нахша билән ахирлаштурғанлиқини баян қилди 

Доктор әрдәм өздәмир әпәнди консертта түрк музикиси билән уйғур музикиси оттурисидики охшашлиқларниң көп икәнликиниң оттуриға қоюлғанлиқини баян қилип мундақ деди: «түрк музикиси билән уйғур музикиси оттурисидики охшашлиқлар наһайити көп. Түркләр билән уйғурлар тәхминән миң йилдин буян узақ йәрләрдә яшимақта. Түркләр билән уйғурлар бунчивала узун замандин бери узақ йәрләрдә яшаватқан болсиму музика җәһәттинму бүйүк охшашлиқларға игә икәнликини оттуриға қоюшқа тиришиватимән. Болупму муқамлардики охшашлиқлар кишиләрни һәйран қалдурмақта. Нахша текистлиридиму охшашлиқлар мәвҗут. Әлвәттә охшимаслиқларму бар чүнки шәрқий түркистан билән түркийә һәр хил мәдәнийәтләрниң өтиңи, булар қәдимдин тартип өзара тәсир көрсәткән. Лондонда бәргән консертимизда уйғурчә вә түркчә нахша вә музикилардин өрнәкләр көрситип, бу охшашлиқлар билән охшимаслиқларни оттуриға қоюшқа тириштуқ».

Рәһимә мәхмут ханим консерт ахирида түрк музикиси билән уйғур музикисиниң қанчилик йеқин икәнликидин бәк тәсирләнгәнликини баян қилди. 

Рәһимә мәхмут ханим узун йиллардин бери консертларда уйғур-нахша уссуллирини тонуштурупла қалмастин, нахша арилирида уйғурларниң еғир вәзийити тоғрисидиму мәлумат бәрмәктә. «Қәшқәрдин истанбулғичә» консертидиму шундақ қилған. У, буниң уйғур дәвасини тонуштуруштики муһим бир усул икәнликини баян қилди. 

Рәһимә мәхмутниң ейтишичә бир һәптидә үч қетим консерт берилгән болуп, һәммисидә уйғурларниң һазирқи еғир вәзийитиму тонуштурулған.

Пикирләр (0)
Share
Толуқ бәт