Хәлқара мәдәнийәт фестивалида уйғурлар өз мәдәнийитини намаян қилмақта

Ихтиярий мухбиримиз әркин тарим
2014-09-01
Share
enwer-demirel-we-xeyrullah.jpg Хәлқара мәдәнийәт фестивалида уйғур көргәзмә бөлүмини. 2014-Йили 29-авғуст, түркийә.
RFA/Erkin Tarim

Әнқәрәниң әтимәсқут районида ечилған 11-нөвәтлик хәлқаралиқ анатолийә мәдәнийәт вә сәнәт фестивали 29-чесла тәнтәнилик ечилиш мурасими билән башланди.

Бу фестивалға түркийәдин 40 җәмийәт вә вәқп қатнашқандин сирт йәнә оттура асия түркий җумһурийәтлири һәм башқа түркий милләтләрниң вәкиллириму қатнишип вә мәхсус бөлмә ечип өзлириниң мәдәнийәт-сәнитини намаян қилмақта. Уйғурларму 11-қетим өзлириниң мәдәнийәт-сәнитини вә кейинки йилларда хитайниң уйғурларға елип бериватқан бесим вә қирғинчилиқ сиясәтлири әкс әттүрүлгән сүрәтләрни намайәндә қилмақта.

8-Айниң 29-күнидики ечилиш мурасимиға фестивални уюштурған әнқәрә әтимәсқут районлуқ һөкүмәтниң рәиси әнвәр дәмирәл әпәнди, һәрқайси сиясий партийиниң вәкиллири, мустәқил оттура асия түркий җумһурийәтлириниң әнқәрәдә турушлуқ әлчилири, түркий милләтләрниң җәмийәт вә вәқиплириниң вәкиллири вә хәлқтин болуп он миңлиған киши қатнашти. 29-Чесла ахшам түркийәниң даңлиқ нахшичиси йилдиз тилбә консерт бәрди. Консерт башлиништин бурун әнқәрә әтимәсқут районлуқ һөкүмәтниң башлиқи әнвәр дәмирәл вә милләтчи һәрикәт партийиси муавин башлиқлири, шәрқий түркистан өйи намидики көргәзмә бөлүмини зиярәт қилди.

Уйғур бөлмисини ачқан шәрқий түркистан мәдәнийәт вә һәмкарлиқ җәмийити әнқәрә шөбиси башлиқи хәйруллаһ әфәндигил әпәнди әнвәр дәмирәлгә үрүмчи вәқәси билән йәкән вәқәсини әкс әттүргән рәсимләрни көрситип туруп “мана бу шәрқий түркистанлиқларниң һазирқи әһвали” деди. Униң билән биллә шәрқий түркистан бөлүмигә киргәнләр ичидә милләтчи һәрикәт партийисиниң алий рәһбәрлири вә башқа партийиләрниң вәкиллириму бар иди.

10 Күн давамлишидиған бу фестивалда һәр күни бир қанчә түркий милләт өз мәдәнийәт сәнитини намайәндә қилғандин сирт һәр күни ахшам бир даңлиқ сәнәтчи консерт бериду. Булар, йилдиз тилбә, пәтәк динчөз, әхмәт шафақ, муаззәз әрсой, сәвҗан орхан, мустафа йилдиздоған, али шан, оғуз йилмаз, демәт ақалин вә азәрин қатарлиқлар.

Бу 10 күн җәрянида тәхминән 50 миң әтрапида кишиниң уйғур көргәзмә бөлүмини зиярәт қилғанлиқи пәрәз қилинмақта.

9-Айниң 4-күни ахшам шәрқий түркистанлиқлар кечиси болуп, бу кечидә даңлиқ нахшичи алишан консерт бәрмәкчи. Уйғурлар һәр йили уйғур сәнәтчиләрни тәклип қилип уйғур нахша-усуллиридин нәмуниләр көрситәтти. Йәкән вәқәсидин түпәйли уйғурлар бу йил сәнәт номури көрсәтмәй кичик муҗаһит қәшқәрли шеир декламатсийә қилмақчи.

Биз нәқ мәйданда бу һәқтә мәлумат игилидуқ. юқиридики аваз улинишидин тәпсилатини аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт