Amérikidiki Uyghurlarning bu yilliq noruz bayrimi we rabiye qadir xanimning muhajirettiki 10-yili

Muxbirimiz qutlan
2015-03-23
Share
noruz-amerika-rabiye-10-yil.jpg Noruz pa'aliyitide rabiye qadir xanimning amérikigha kelgenlikining 10 yilliqi tebriklendi. 2015-Yil 22-mart, washin'gton.
RFA/Qutlan

Amérikidiki Uyghur jama'iti bu yilliq noruz bayrimini rabiye qadir xanimning xitay türmisidin chiqip amérikigha kelgenlikining 10 yilliq xatirisi bilen bille kütüwaldi.

Tünügün, yeni 22-mart kechqurun amérika paytexti washin'gton etrapidiki Uyghur jama'iti amérika Uyghur birleshmisining teshkillishi bilen bir yerge jem bolup 2015-yilliq noruz bayrimini tentenilik halda tebriklidi.

Noruz pa'aliyitige paytext washin'gton, wirjiniye we mariland shtatliri shundaqla amérikining sherqiy qirghaq rayonidiki herqaysi shtatlirida olturushluq Uyghurlardin nechche yüzligen kishi qedem teshrip qildi.

Bu qétimliq noruz pa'aliyitige amérika Uyghur birleshmisining re'isi alim séytof riyasetchilik qildi. U bashlinish nutqida amérikida yashawatqan barliq Uyghur jama'itining bu yilliq noruz bayrimini qizghin tebriklidi. Shuning bilen bir waqitta u yene, bu yilning Uyghur milliy herikitining rehbiri rabiye qadir xanimning xitay zindanidin qutulup amérikigha kelgenlikining del 10 yilliq xatirisi ikenlikini alahide tekitlep ötti.

Rabiye xanim teklip boyiche söz qilip, özining buningdin 10 yil muqeddem xitay türmisidin qoyup bérilip amérikigha kelgen chaghdiki héssiyatini jama'etchilik bilen ortaqlashti. Özining yéqinqi 10 yildin buyan muhajirettiki Uyghur dewasida élip barghan küreshliri, basqan qedemliri we qolgha keltürgen tejribe-sawaqlirini qisqiche eslep ötti. Ötken 10 yil jeryanida özining shexs halitidiki özige emes, belki pütkül Uyghur xelqining awazigha aylan'ghanliqini tekitlidi.

Rabiye xanim axirida: “Uyghur xelqi bügünki künde öz wetini bolmisa héchnémisi bolmaydighanliqini, erkinliki bolmisa mewjutluqining héchqandaq qedir-qimmiti bolmaydighanliqini eng chongqur derijide tonup yetti”, dédi.

Rabiye xanimning sözidin kéyin, noruz pa'aliyiti amérikida ösüp chong bolghan yéngi ewlad Uyghur yashlirining sen'et nomurliri bilen qizghin keypiyatqa kötürüldi. Uyghurche ussul we naxsha-muzikilar noruz pa'aliyitige milliyche kiyim-kéchekler bilen kiyinip kelgen jama'etchilikini, bolupmu amérikida tughulup chong bolghan yash ewlad Uyghur yashlirini küchlük jelp qildi.

Alim séytof ependi bu yilliq noruz pa'aliyitining ilgiriki yillargha oxshashla muhajirettiki Uyghurlar üchün bir milliy bayram hem uniwérsal xatirilesh pa'aliyiti bolupla qalmastin, belki yene amérikidiki Uyghur jama'itining bir yerge jem bolush pursiti bolghanliqini ilgiri sürdi.

U yene muhajirettiki yash ewlad Uyghurlarning her yili noruz bayrimini qizghin kütüwélishi hemde Uyghur tili bilen güzel sen'et nomurlirini teyyarlap kélishi bizge amérikidek büyük bir dölette Uyghur jama'itining mewjutluqini, ularning hem amérikiliq, hem Uyghur bolup yashawatqanliqini eslitidu, deydu.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet