Istanbulda türk dunyasi noruz bayrimi pa'aliyiti ötküzüldi

Ixtiyariy muxbirimiz arslan
2015-03-23
Share
istanbulda-norruz-paaliyiti.jpg Türk dunyasi noruz bayrimi pa'aliyitidin körünüsh. 2015-Yili 21-mart, istanbul.
RFA/Arslan

21-Mart shenbe küni, istanbul waliy mehkimisi, istanbul sheherlik hökümet we zeytinburnu sheherlik hökümet idarilirining birlikte uyushturushi bilen türk dunyasi noruz bayrimi pa'aliyiti ötküzüldi.

Zeytinburnu medeniyet-sen'et merkizide ötküzülgen bu pa'aliyetni xelq'araliq türk kültüri teshkilati bilen türk dunyasi belediyeler birliki teshkilati qollap desteklidi.

Istiqlal marshi we milliy marsh oqush bilen bashlan'ghan pa'aliyette türk dunyasining bayraqliri lepildidi. Qatardin ay yultuzluq kök bayraqmu orun alghan bolup, bayraqlar meydan etrapida we milliy marsh oqush guruppisining aldida lepildep közge chéliqip turdi.

Pa'aliyette istanbul medeniyet we sayahet mudiri proféssor exmet emre ependi échilish nutqi sözlidi. Exmet emre ependi, yéngi bir künning bashlinishi menisini ipadileydighan noruz bayrimini tebriklesh üchün jem bolghanliqini, noruz bayrimining nechche yüz yildin buyan türk dunyasi üchün muhim ehmiyetlik bir bibaha qimmetlik bir bayram dep qarilip tebriklinip kéliwatqanliqini we bu bayramning keng bir jughrapiyilik rayonlarda oxshash waqitta tebriklinidighanliqini bildürdi.

Exmet emre ependi mundaq dédi: noruzning chiqish nuqtisi insanlarning ortaq medeniyiti bolghan qimmet qarashliridur. Noruzning türk dunyasining nurghun menisi bardur. Aldi bilen noruz tughulushtur, bashlinishtur, yéngi bir künning bashlinishi, qish peslining axirliship baharning yétip kelgenlikini, tebi'etning bix sürgen beriket we bayashatliq kündur. Oxshash waqitta kéche we kündüz teng bolghan, dostluq we qérindashliqning rishtisi baghlan'ghan kündür. Uningdin bashqa yene noruz, qismet, tilek-arzu izdesh künidur.

Bu pa'aliyetke istanbul waliysi wasip shahin, istanbul sheher bashliqi qadir topbash, général shénol alqish, zeytinburnu sheher bashliqi murat aydin qatarliq rehberler yighin zalining aldida échilghan milliy medeniyet körgezmini aylinip chiqti. U yerde bazghan bilen tömür soqti, tuxum chékishturdi. Milliy yémekliklerning temini tétidi.

Pa'aliyette yerlik xelq sen'etchiliri oyun körsetti. Kawkaziye chérkes jem'iyiti xelq sen'etchiliri oyun körsetti. Qazaq sen'etchi beshir exmet, sedat cholaq'oghli qatarliqlar sen'et nomurlirini teqdim qildi. Pa'aliyette yene Uyghur sen'etchi melike noruz Uyghurche naxshilarni orundidi. Bulardin bashqa yene türk, qazaq we qirghiz sen'etchilermu birdin öz sen'et nomurlirini körsetti.

Pa'aliyet axirida muxbirlarning noruz toghrisidiki so'aligha jawab bergen istanbul waliysi wasip shahin noruz bayrimining ehmiyiti toghrisida toxtilip mundaq dédi: pütün türk dunyasida we ottura sherqtiki türkiy xelqlerning qizghinliq bilen tebriklewatqan noruz bayrimining türk dunyasigha we milletlirige huzur, tinchliq, xushalliq élip kélishige tilekdashliq bildürimen.

Noruz bayrimida yene istanbul sheher bashliqi qadirtoppash söz qilip mundaq dédi: yéngi bir oyghinish we tirilish, ümidler yéngilan'ghan, güzellikler jilwe qilghan, insanlarning kelgüsige qarita bashqiche bir hayajan bilen yürgen bir zamanning bashlinishi noruzdur. Türk dunyasining we xelqimizning noruz bayrimini tebrikleymen. Bu bayram pütün insaniyetke güzellik, xushalliq élip kelgey.

Yéngi yilimizning tinchliq we aman-isenlik ichide ötüshini tilekdashliq bildürimiz

Noruz bayrimini tebriklesh pa'aliyiti munasiwiti bilen söz qilghan zeytinburnu sheher bashliqi murat aydin mundaq dédi: noruz bayriminglar qutluq bolsun, zeytinburnu türk dunyasi yighinchaqlan'ghan bir yerdur. Sherqiy türkistandin, afghanistan'ghiche, yeni pütün türk jughrapiyisidin, türkistandin pütün türkiy xelqlerni birleshtürgen bir yer zeytinburnudur. Biz bu yerde, qazaqlar bilen qirghizlar bilen Uyghurlar we özbékler bilen bashqa türk xelqler bilen ottura sherqtin kelgen türk xelqler bilen kawkaziyedin kelgenler bilen hemmimiz birlikte yashaymiz. Zeytinburnuda men 4 qétim sheher bashliqi bolup saylandim. 17-Qétim biz bu yerde noruz bayrimini tebriklewatimiz.

Yéngi yilni yéngi künni tebriklewatimiz. Yéngi yilimizning tinchliq we aman-isenlik ichide ötüshini arzu qilimiz. Qelb köngüllirimizni bir birimizge achayli, bu köngül rishtimiz bilen tinchliq we huzurning wetinimizge we dunyagha hakim bolushini arzu qilimiz.

Türk dunyasi üchün programma tarqitidighan t r t awazi téléwiziye qanili noruz bayrimi munasiwiti bilen mexsus programma tarqatqan bolup, bu programmilarda Uyghur perzenti mujahid qeshqerli, chanaqqel'e shé'irini jarangliq déklamatsiye qilip her zamandikige oxshash qizghin alqishqa érishti. Uningdin bashqa yene türk sen'etchi bunyamin aqsün'ger ependi, Uyghur xelq naxshisi “Gül achil” dégen naxshini oqudi. Bu programmilar t r t awazi téléwiziyesidin sün'iy hemrah arqiliq biwasite tarqitildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet