Norwégiyediki noruz pa'aliyiti milliy rohni urghutti

Ixtiyariy muxbirimiz ekrem
2018-03-21
Élxet
Pikir
Share
Print
Norwégiyede ötküzülgen noruz pa'aliyitidin körünüsh. 2018-Yili 18-mart, oslo.
Norwégiyede ötküzülgen noruz pa'aliyitidin körünüsh. 2018-Yili 18-mart, oslo.
RFA/Ekrem

18-Mart küni norwégiye paytexti osloda ötküzülgen noruz pa'aliyiti shimaliy yawropadiki bu tinch elde yashawatqan Uyghur jama'itining milliy rohni urghutti.

Norwégiye Uyghur komitétining teshkillishi bilen 18-mart oslo shehiride ötküzülgen noruz pa'aliyitige norwégiyening herqaysi jayliridin kelgen ayallar, balilar bolup köp sanda Uyghurlar qatnashti. "Nobél erkinlik sariyi" da ötküzülgen ilmiy muhakime yighinigha we 3 künlük "Uyghur yashlirini terbiyelesh kursi" gha qatnishish üchün kelgen dolqun eysa bashliq dunya Uyghur qurultiyining rehberliri we chet'ellik méhmanlar teklipke bina'en noruz sorunigha qedem teshrip qilghanda yüzlerche Uyghurlar orunliridin turushup güldüras alqishlar bilen qarshi aldi.

D u q ning re'isi dolqun eysa ependi neq meydanda ziyaritimizni qobul qilip, noruzluq pa'aliyette Uyghur yash-ösmürliri orundighan türlük sen'et nomurlirining kishiler qelbini lerzige sélip, milliy rohni urghutush rolini oynighanliqini tilgha aldi. Qurultay ijra'iye komitétining re'isi ömer qanat ependimu Uyghur yash-ösmürlerning kelgüsige nisbeten zor ümid peyda qilghanliqini eskertti.

Oslodiki bu qétimliq noruz pa'aliyitide "Oslo Uyghur ana til mektipi" diki ösmürler we sebiy balilar Uyghurlarda milliy hayajan qozghaydighan, kök bayraqqa sadaqet bildürüshni mezmun qilghan, weten-millet söygüsini terghib qilidighan sen'et nomurlirini körsetti. Hayajan'gha chömgen körürmenler zal ichide üzlüksiz halda alqish sadalirini yangritip turdi. Norwégiyediki Uyghur xanim-qizliri yene milletke muhebbet, düshmen'ge nepret qozghaydighan lirik shé'irlarni déklamatsiye qilip, tamashibinlarni hayajanlandurdi. Sazende we naxshichilarmu Uyghur ana tiligha medhiye oquydighan naxshilarni orundap, noruz sorunni qoyuq milliy keypiyatqa chömdürdi.

Tamashibinlarning bildürüshiche, bu xil yuqiri milliy keypiyat yéqinqi mezgillerdin buyan Uyghur diyarida dawam qiliwatqan chékidin ashqan milliy zulumning chet'ellerdiki Uyghurlar arisida peyda qilghan milliy oyghinishning mehsuli iken.

Norwégiye Uyghur komitétining re'isi bextiyar ependi bu heqte ziyaritimizni qobul qilghanda, aldi bilen bu qétimliq noruz pa'aliyitini teshkilleshke hesse qoshqan, pa'aliyet zalini kök bayraqlar bilen bézigen Uyghur jama'itige alahide rehmitini bildürdi.

Noruz pa'aliyitining xatimiside d u q rehberliri we chet'ellik méhmanlar sehnige teklip qilinip, ulargha Uyghur doppisi teqdim qilindi. D u q ning re'isi dolqun eysa ependi qurultay ehlige wakaliten nutuq sözlep, norwégiyediki Uyghur jama'itige bolghan rehmitini izhar qilish bilen birge norwégiyediki Uyghurlarni 4-ayning 27-küni bélgiye paytexti biryussélda ötküzülidighan 5 ming kishilik namayishqa qatnishishqa chaqiriq qildi shundaqla "Oslo Uyghur ana til mektipi" ge ming dollar yardem qilidighanliqini bildürdi.

Norwégiyediki Uyghur ziyaliysi semet abla ependimu ziyaritimizni qobul qilip, bu qétimqi noruz pa'aliyitining ilgiriki yillardikige oxshimaydighan alahidiliklerge ige bolghanliqini tekitlidi.

Bu qétimqi noruz pa'aliyitige qatnashqan Uyghur jama'itimu bu yil osloda untulghusiz bir noruz bayrimi ötküzgenlikini izhar qilishti.

Toluq bet