Норвегийәдики уйғурлар норуз паалийитини мол мәзмунлуқ өткүзди

Уйғурларниң норуз паалийитидин көрүнүш. 2015-Йили 22-март, норвегийә.

22-Март күни пайтәхт ослода норвегийә уйғур комитетиниң орунлаштуруши билән мол-мәзмунлуқ норуз паалийити өткүзүлди.

Норвегийәдики уйғурлар бу йилму алдинқи йиллардикигә охшаш бир ариға җәм болуп бу қутлуқ күнни тәбриклиди.

Норвегийә уйғур комитетиниң рәиси ниғмәт һаҗим зал ичигә җәм болған меһманларға башлиниш нутқи сөзлигәндин кейин, сираҗидин пәтқулла әпәнди тәклип билән норузлуқ йүрәк сөзини баян қилди.

Норуз паалийитидә йәнә өмәрҗан ака, мәмтимин һаҗим қатарлиқ җамаәт вәкиллириму сөз қилип вәтини вә сиртидики барлиқ уйғурларға отлуқ саламлирини йоллаш билән биргә, уларни инақ вә иттипақлиққа чақирди.

Бу қетимқи норуз паалийитиниң алаһидә болған йери шуки, норвегийә уйғур комитетиниң саһибханилиқида шиветсийә путбол командиси тәклип қилинған болуп, норвегийә путбол командиси билән шиветсийә путбол командиси норуз паалийити башлиништин бурун бир мәйдан достлуқ мусабиқиси елип барди. Утушни әмәс, достлуқ вә инақлиқни асас қилип елип берилған бу мусабиқә иккидә икки нәтиҗә билән ахирлашти.

Шиветсийә уйғур путбол командисиниң йетәкчиси билән норвегийә уйғур путбол командисиниң башлиқи мутәллип әпәнди тәклип билән сөзгә чиқип, буниңдин кейин путбол командилирини қандақ тәрәққий қилдуруш һәққидики пикир ‏- тәләплирини оттуриға қоюп өтти.

Бу қетимқи норуз паалийитидә норуз ешини вә дастихинини тәйярлаш үчүн арилиқни йирақ көрмәй келип халисанә хизмәт қилған абләт һаҗим, ели әпәнди вә башқа йигитләргә алаһидә рәһмәт ейтип өтүлгәндин башқа, шиветсийәлик меһманларниң ятақ вә тамақ мәсилини өз үстигә елип җапа чәккән һәбибул әпәнди вә ханими рәна ханимниң әҗригә җамаәт намидин көп рәһмәтләр ейтилди.

Норуз паалийити давамида җамаәт саәт сәккизгичә шеир оқуп, нахша, музика орунлап вә усул ойнап, достанә вә қизғин кәйпият ичидә көңүл ачти.