Qazaqistan Uyghur jama'etchiliki talantliq zhurnalist muxtar abdurahmanoftin ayrildi

15-Mart küni péshqedem zhurnalist muxtar abdurahmanof 76 yéshida alemdin ötti.

Muxtar abduraxman oghli abdurahmanof 1939-yili almata wilayiti chélek nahiyisige qarashliq maliway yézisida dunyagha kelgen bolup, ottura bilimni chélek yézisining kirof namidiki mektepte alghan. Mezkur mektepni tamamlighandin kéyin u nahiyilik “Kolxozchilar emgiki” namliq gézitta korréktor bolup ishlidi we shuning bilen bille edebiy ijadiyet bilen shughullandi. M. Abdurahmanof nahiyilik gézit rédaksiyiside muxbir, chong muxbir, bölüm bashliqi, mes'ul katip lawazimlirida xizmet qildi. 1965-Yili u jumhuriyetler ara “Kommunizm tughi” (hazirqi Uyghur awazi) gézitigha teklip qilinip, u yerde deslep muxbir, chong muxbir, partiye-kéngesh, iqtisad, medeniyet bölümlirining bashliqi, andin mes'ul katipning orunbasari bolup ishlidi.

Istédatliq we talantliq zhurnalist m. Abdurahmanof uzun waqit metbu'at saheside ishlesh jeryanida gézit mezmunining béyishigha we süpet derijisining ösüshige munasip hessisini qoshup keldi. U özining kespiy wezipilirini orunlashtin tashqiri yene, rédaksiyening bashlan'ghuch kespiy ittipaq teshkilatini, qazaqistan zhurnalistlar ittipaqining bashlan'ghuch teshkilatini bashqurdi. 2003-Yili sherep bilen dem élishqa chiqqan m. Abdurahmanof axirqi waqitlarghiche metbu'at sahesidin qol üzmey, türlük mawzulardiki maqaliliri bilen oqurmenlerning diqqitini özige jelp qilip kelgen idi. U bir mezgil “Axbarat” ijtima'iy-siyasiy zhurnilining muherriri wezipisini atqurdi. Kéyinki waqitlarda m. Abdurahmanof bolupmu balilar edebiyatida ünümlük ijad qilip, “Qaysi pesil yaxshiken?”, “Könglümge yéqin kishiler”, “Ochuq bolsun asmining”, “Qelbim töridiki ademler” namliq kitablarni neshr qildi.

Ziyaritimizni qobul qilghan merhumning kesipdashliri péshqedem zhurnalist minemjan abdurahmanof we “Uyghur awazi” géziti bash muherririning orunbasari iwrayim baratof m. Abdurahmanof heqqide eslimilirini otturigha qoydi.