Qazaqistan beshyaghach yézisidiki Uyghurlar fashizmgha qarshi urushning 70 yilliqini xatirilidi

Ixtiyariy muxbirimiz oyghan
2015.04.29
Share on WhatsApp
Share on WhatsApp
beshyaghach-yezisi-uyghur-fashizm.jpg Beshyaghach yézisidiki Uyghurlar 1945-yilliridiki fashizmgha qarshi urushning 70 yilliqigha béghishlan'ghan murasimdin körünüsh. 2015-Yili 28-aprél, almata.
RFA/Oyghan

28-Aprélda almata wilayiti talghir nahiyisige qarashliq beshyaghach yézisining shu namliq kafésida 1945-yilliri bolghan fashizmgha qarshi urushning 70 yilliqigha béghishlan'ghan murasim bolup ötti.

Uninggha talghir nahiyisi boyiche urush meydanigha qatnashqanlar we shu yilliri arqa septe emgek qilghanlar teklip qilindi. Nahiyilik we bolupmu beshyaghach yurt-jama'etchiliki, Uyghur medeniyet merkizi, yigit bashliri we xanim-qizlar komitétining küch chiqirishi bilen ötken mezkur pa'aliyet tiyatirlashturulghan üzündi bilen bashlandi. Murasimni kirish söz bilen achqan mushu pa'aliyet teshebbuskari, yazghuchi abduxaliq mahmudof bolupmu urush yilliri arqa septe emgek qilghan ahalining alahide qehrimanliq körsetkenlikini otturigha qoydi.

Uningda sözge chiqqan beshyaghach yézisi hakimi muhit elibékof talghir nahiyilik hakimchiliq we beshyaghach yézisi hakimchiliqi namidin mezkur murasimni uyushturghuchilargha minnetdarliqini bildürdi we qazaqistan prézidénti nursultan nazarbayéfning permani bilen bir qatar kishilerni ghalibiyetning 70 yilliqigha béghishlan'ghan médallar bilen teqdirlidi. Tebrik sözge chiqqan talghir nahiyilik hakimchiliqi ichki siyaset bölümining xadimi aya'uli imadiyéwa, qazaqistan yazghuchilar ittipaqi Uyghur edebiyati kéngishining bashliqi exmetjan hashirof, “ Intizar” zhurnilining bash muherriri peyzulla exmetof, shundaqla urush we arqa sep qatnashquchiliri, ularning baliliri we bashqilar qazaqistanliqlarning, shu jümlidin Uyghurlarning ghalibiyetni qolghan keltürüshke qoshqan töhpisini, qehrimanliqini alahide tekitlidi.

Murasimda shundaqla 1986-yili ukra'inaning chérnobil atom éléktr istansiyiside yüz bergen apetni yoqitishqa qatnashqan bir top kishilermu söz élip, ata-bowilirining kélechek ewladlarning tinch hayati üchün öz jénini qurban qilghanliqini, bügünki kündimu her qandaq xewp-xeter tughulghan teqdirde xelqining, élining xatirjemlikini qoghdaydighan yashlarni terbiyileshning muhimliqini ilgiri sürdi. Murasim beshyaghach sen'etkarlirining bayramliq konsérti bilen dawamlashti.

Radi'omiz ziyaritini qobul qilghan urush yilliri shahitlirining biri qurman'ghali mesimof, talghir nahiyisining pexriy puqrasi, péshqedem ustaz hosman hashimof we beshyaghach xanim-qizlar komitéti aktiplirining biri arzugül hoshurowa bu heqte öz qarashlirini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.