Қазақистан бойичә өткүзүлгән сәнәт көрикидә уйғурлар 1 - дәриҗилик мукапат алди

Ихтиярий мухбиримиз ойған
2016-05-22
Share
qazaqistan-almata-weten-usulchilar-ansambili-2016.jpg "вәтән" усулчилар ансамбили
RFA/Oyghan

Қазақистанниң алмата шәһиридики оқуғучилар сарийида 14 - вә 15 - май күнлири "әрлики - әлгә мирас" намлиқ җумһурийәтлик фестивал болуп өтти. "атидин мирас" хәйрхаһлиқ фонди уюштурған бу паалийәткә мәмликәтниң һәр қайси шәһәрлиридики мәктәпләрдә билим еливатқан оқуғучилар вә сәнәт өмәклири қатнашқан болуп, улар өз һүнәрлирини һәр қайси саһәләрдә синиди. Игилишимизчә, униң яш қатнашқучилири көплигән тамашибинлар вә қазиларни қайил қилған болуп, һәр хил дәриҗилик мукапатларға еришкән.

"вәтән" уссулчилар ансамбили һазир алмата вилайити талғир наһийисиниң бәшяғач мәһәллисидә бир йил мабәйнидә паалийәт елип бериватмақта. Биз бу ансамбилниң қурулуш сәвәблири вә утуқлири һәққидә униң рәһбири пәрһат дуганоф билән сөһбәт елип бардуқ.

—Йеқинда алматада өткән фестивалға қайси йәрләрдин қатнашти?

—Бу қетимда алмата шәһиридики оқуғучилар сарийида өткән "әрлики - әлгә мирас" фестивалиға қазақистанниң нурғунлиған шәһәрлиридин оқуғучилар қатнашти. У йәрдә он бәшкә йеқин уссул ансамбиллири болди. Уйғур ансамбиллиридин пәқәт биз болдуқ.

—Силәрниң бу уссул ансамбилини қуруштики мәқситиңлар немә?

—Ансамбилниң нами "вәтән". Вәтән немини чүшәндүриду десәк, уни һәммә яхши билиду. Бизниң мәқситимиз уйғур сәнитини дуняға тонутуш. Һазир нурғунлиған балилиримиз сәнәтни, муқамни, нахшиларни уқмайду. Бизниң мәқситимиз әнә шуларни чүшәндүрүп, арқимизда шагирт қалдуруш.

Һәр милләт вәкиллиридин тәркиб тапқан сәнәт гуруппилири вә йәккә сәнәтчиләрниң орунлишидики нахша вә уссуллар фестивал меһманлириниңму көңлидин чиққан. Шулардин бири устаз елмира заированиң ейтишичә, пәқәт уссул бойичә мусабиқигә қатнашқан 18 ансамбилниң ичидин "вәтән" топи таллинип, униңға фестивалниң баш мукапати берилгән. У, узун тарихқа вә бай мәдәнийәткә игә уйғурларниң әзәлдинла сәнәтхумар хәлқ болуп, ата—анини һөрмәтләш, балини дурус тәрбийиләш, миллитини, вәтинини сөйүшкә охшаш ишларға көп көңүл бөлүп кәлгәнликини тәкитлиди.

У мундақ деди: "устаз болғанлиқтинму, юртдашлиримниң қоллиши биләнмә, оқутуватқан қара көзләргә һәр қачан аңлиқ тәрбийә, сапалиқ билим беришкә тиришип келиватимән. Шу сәвәбтин уйғур балилириниң егиз чоққилардин көрүнүшигә, һәр қандақ мәдәнийәт ишлириға үлүшини қошушиға күч салғум келиду. Йеқинда уюштурулған чоң бир консертқа, бәйгигә қатнишишқа ақ йол селинди. Өткән йили бәшяғач йезисида "ирадә" хәлқ ансамбили уссулчилири пәрһат дуганоф вә камиләм кизирова рәһбәрликидә сәнәт өмики ечилип, униңға бизниң мәктәп оқуғучилири бир йил давамида қатнишип кәлмәктә. Балилиримиз дәсләп қетим мундақ чоң мусабиқигә қатнишип, алаһидә көзгә чүшти."

Е. Заирова өз сөзидә шундақла яш уйғур сәнәтчилириниң уссулни юқири маһарәт билән ойнап, көплигән тамашибинлар вә қазиларни қайил қилғанлиқини ейтип, йәнә мундақ деди: "сәһнидә көплигән уссуллар көрситилди. ‹Вәтән' топиниң уссулчилири өзлириниң алаһидилики билән көзгә чүшти. 18 Топниң ичидә пәқәт ‹вәтән' топида һәм оғуллар һәм қизлар қатнашти. Уссулни баһалиған мөлдир юсупова уссулдики гүзәллики, кийгән кийими, бир—биригә беқишип ойнашлири билән көзгә чүшкән ‹вәтән' топиға баш мукапатни бәлгилидуқ, дәп ейтти."

—Пәрһат дуганоф, сиз өзиңизниң сәнәт мәйданиға қандақ қилип кәлгәнликиңиз һәққидә тохтилип кәтсиңиз.

—Кичикимдин тартип сәнәткә болған көз қаришим бар иди. Алтә йешимдин тартип дадам раваб челишни өгәтти. Мәктәпни пүттүрүп, алматада мурат насироф хатирисигә беғишланған мусабиқидә жургеноф намидики академийигә оқушқа чақириқ алған. Буниңдин ташқири үрүмчигиму чақириқ алдим. Мениң кичикимдин вәтәнни көрүш арзуюм бар иди. Шу пурсәтни қолдин бәрмәй, 2008 - йили йигирмигә йеқин оқуғучи үрүмчидә бир йил сәнәт мәктипидә оқуп чиқтуқ.

—Дәсләпки утуқларға қачан вә қәйәрләрдә ериштиңиз?

—2009 - Йили яркәнттә дилшат насироф вә сүрийәм һезимова бизгә баш—көз болуп, оқушни пүттүрүп кәлгән балилар чечилип кәтмисун, артис болуп, хәлққә хизмәт қилсун дәп "ирадә" нахша—уссул ансамбилини қурди. Биз 2012 - йили испанийәдә, астанада, ақтөпидә, 2014 - йили талдиқорғанда өткән фестивалларда ғалип чиқтуқ.

—Әмди өзиңизниң бүгүнки асасий паалийитиңизни тонуштуруп кәтсиңиз.

—2015 - Йилдин тартип алмата вилайитиниң бәшяғач мәһәллисидә, биз үрүмчидә өгәнгәнлиримизни мушу йәрдики оқуғучиларға қалдуруп кетәйли дегән нийәт билән йигирмигә йеқин оқуғучини сәһниләргә елип чиқишқа башлидуқ. Балиларни 2015—йили артур илахуноф қойған "яңра, нахшам" консертиға, 2016—йили шавкәт нәзәрофниң "шавкәт шов" консертиға елип чиқтуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт