Qazaqistandiki Uyghur yigit bashliri yilliq hésabat berdi

Ixtiyariy muxbirimiz oyghan
2015.11.09
Share on WhatsApp
Share on WhatsApp

4-Noyabirda almatada quddus ghojamyarof namidiki jumhuriyetlik dölet Uyghur muzikiliq komédiye tiyatirida qazaqistan Uyghur yigit bashlirining yilliq hésabat yighini bolup ötti.

Melumki, yigit bashliri birleshmisi qazaqistan Uyghurlirining jumhuriyetlik étnomedeniyet merkizi terkibide ish élip bériwatqan bolup, almata shehiri we almata wilayiti, shundaqla jenubiy qazaqistan, sherqiy-shimali qazaqistan, aqmola we bashqimu wilayetlerde yashawatqan Uyghur jama'etchilikining béshini qoshidu. Buningdin tashqiri qazaqistan yigit bashliri birleshmisining qoshna qirghizistan yigit bashliri bilenmu munasiwet baghlighanliqini köpchilik yaxshi bilidu.

Bu küni ötken hésabat yighinini jumhuriyetlik medeniyet merkizining re'isi shahimerdan nurumof échip, u yigit bashlirining qazaqistan jem'iyitide we Uyghur jama'etchiliki arisida tutqan ornini alahide tekitlidi. Andin chong doklat bilen sözge chiqqan jumhuriyetlik bash yigit béshi abduréshit mexsutof bir yil ichide qilin'ghan ishlar, bu ishlarning asasiy qismining, bolupmu qazaqistan xelqi assambiléyisining 20 yilliqi, qazaq xanliqining 550 yilliqi we sowét-gérman urushining 70 yilliqigha baghlashturup ötkenlikini atap körsetti. U shundaqla yigit bashliri aldida turghan bezi muhim mesililer hem kélechek pilanlar heqqidimu öz pikirlirini otturigha qoydi. Mezkur bash qoshushta shundaqla almata sheherlik meslihetning ezasi exmetjan sherdinof, “Nur weten” partiyisi siyasiy kéngishining ezasi asimjan zilawdinof, jumhuriyetlik “Uyghur awazi” gézitining bash muherriri érshat esmetof, Uyghur tiyatirining bash meslihetchisi sawut iskenderof, sheherlik bash yigit béshi inemjan xudayberdiyéf, sultanqorghan mehellisi bash yigit béshi gheyret memiteliyéf, zarya wostoka mehellisi bash yigit béshi yarmuhemmet kibirof, Uyghur nahiyisi bash yigit béshining orunbasari abdukérim seydullayéf, emgekchiqazaq nahiyisi ishikte rayonining bash yigit béshi tursunmehemmet abdusémetof we bashqilar yigit bashlirining bügünki kündiki wezipiliri, yurt-jametchilik bilen ishleshning yolliri, milliy örp-adetler, yashlar we bashqimu köpligen mesililerni muhakime qildi.

Radi'omiz ziyaritini qobul qilghan jumhuriyetlik bash yigit béshi abduréshit mexsutof bir yil ichide qilin'ghan asasiy ishlar heqqide toxtilip, mundaq dédi: “Bizning Uyghur yigit bashliri her yili séntebir, öktebir aylirida yigit bashliri künini ötküzimiz. Bu e'e'enige aylinip qaldi. Bultur biz besh yilliqni chong ötküzgen iduq. Bu yili yarkenttin bashlap u yéqi uzunyaghash, almata hem uning etrapidiki pütün yigit bashlirini yighip, bir yilliq hésabat berduq. Bir yildiki pa'aliyetler heqqide toxtalsaq, birinchidin, prézidént saylimi bolghanda uninggha yigit bashliri toluq qatnashti. Prézidéntning 99 pirsent awaz élishigha yigit bashlirining kichikkine bolsimu hessisi bar, dep oylaymen. Shundaqla ghalibiyetning 70 yilliqida, hemmimiz yaxshi bilimiz, her bir mehellide yoq dégende birdin, ikkidin bolsimu soqushqa, arqa sepke bolsun qatnashqanlar bar, shularning könglini élip, öylirige bérip, halini sorap, shundaq ishlarni ötküzduq. Bizning aliy kéngesh ezamiz murat exmediyéf bilen tört kün ichide Uyghur, yarkent, rayimbék we emgekchiqazaq rayonlirigha bérip, hakimlar, xelq bilen uchrashtuq. Gézitimiz muherriri érshat esmetof bilen yéqinda yarkentke bérip, yette mehellide uchrishish ötküzduq. U yerlerde bolupmu hakimlarning yigit bashlirigha bolghan közqarishi yaxshi. Sewebi her qandaq ish mehellilerde, bolupmu Uyghurlar köp jaylarda yigit bashlirisiz hel bolmaydu.”

Igilishimizche, yigit bashlirining uyushturushi we almata sheherlik meslihet ezasi e. Sherdinof, “Nur weten” partiyisi siyasiy kéngishining ezasi a. Zilawdinoflarning qollap-quwwetlishi bilen bu yili, mesilen, qaraghanda wilayiti hem almata wilayitining xeshkileng nahiyiside yüz bergen tebi'iy apetlerdin zerdab chekkenlerge 3 milyon 700 ming tengge pul we 3 milyon tengge maddiy yardem bérilip, yigit bashlirining bu herikiti köpchilikning alqishigha sazawer bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.