Qazaqistan Uyghurlirining jumhuriyetlik medeniyet merkizi yilliq hésabat berdi

Ixtiyariy muxbirimiz oyghan
2015.12.25
Share on WhatsApp
Share on WhatsApp
hesawat-yighini-almata.JPG Jumhuriyetlik Uyghur medeniyet merkizining hésabat yighinidin körünüsh. 2015-Yili 24-dékabir, almata.
RFA/Oyghan

24-Dékabirda qazaqistan Uyghurliri jumhuriyetlik étno-medeniyet merkizining kéngeytilgen yilliq hésabat yighini échildi. Yighinda jumhuriyetlik medeniyet merkizining yilliq hésabati közdin kechürüldi. Yighin'gha qatnashqan Uyghurlar medeniyet merkizining xizmetlirini bundin kéyin téximu kücheytip élip mangidighanliqini we qazaqistanning tereqqiyati üchün Uyghurlarningmu ortaq küch chiqiridighanliqini bildürdi.

Yighin almatadiki abdulla rozibaqiyéf namidiki 153-mektep-gimnaziyening mejlis zalida ötküzüldi. Uninggha sheher we nahiyilik medeniyet merkezliri wekilliri, yigit bashliri hem yurt aktipliri, ziyaliylar hem yashlar qatnashti.

Yighinning birinchi qismida uning qatnashquchiliri dölet rehbiri nursultan nazarbayéfning qazaqistan xelqige yollighan “Qazaqistan yéngi alemshumul emeliy shara'itta: ösüsh, islahatlar, tereqqiyat” namliq mektupini muhakime qildi. Jumhuriyetlik medeniyet merkizining re'isi, qazaqistan xelqi assambléyisi siyasiy kéngishining ezasi shahimerdan nurumof mektupning asasiy yönilishlirini chüshendürdi. Sözge chiqqan talghir nahiyisi tuzdibastaw yézisidin péshqedem ustaz abdrim muhemmetof, emgekchiqazaq nahiyisi awat yézisining turghuni muzepper mutellipof, talghir nahiyilik medeniyet merkizining re'isi iminjan toxtaxunof, almata shehiri “Sultanqorghan” jem'iyetlik birleshmisining re'isi nizamdun garayéflar qazaqistan prézidéntining memliketni yenimu rawajlandurush, milletler ara dostluqni mustehkemlesh, xelq turmushini yaxshilash we bashqimu yönilishlerdiki tekliplirini qollaydighanliqini bildürdi.

Radi'omiz ziyaritini qobul qilghan péshqedem ustaz abdrim mutellipof mundaq dédi: “Bügünki bash qoshushtiki asasiy meqset heqqide etrapliq, qiziq, pakitlar bizni xushal qildi. Dölitimiz rehbirining yéqinda yollighan mektupining mezmuni we uning meqsetlirini, qiliniwatqan emeliy ishlirini, shuningdek nurumof özining bu ishlardiki Uyghurlargha munasiwetlik pa'aliyetlirini qizghinliq bilen sözlep berdi. Emdi öz nöwitide men talghir nahiyisining tuzdibastaw mehelliside mushu senelerge munasiwetlik mektep kolléktipi bilen, yurt-jama'etchilik aktipliri bilen, yéziliq hakim bashchiliq bezibir yighinlarda qazaqistan dölitining yéngi zamaniwi pen-téxnikiliq programmisini, yéza-qishlaq, sheher tereqqiyatining kündin-kün'ge ösüp örlewatqanliqini terghib qilduq. Shuningdek yézimizda bezi nezir-chiragh, toy-tökün, yashlirimiz bilen bash qoshidighan ehwallar bolidu. Shu yerlerdimu dölitimizning élip méngiwatqan ishliri we ularning tereqqiyati, dunyawi ösüshler we uning abruyi heqqide da'im sözlep kéliwatimiz. Elwette, biz dölitimizning tereqqiyatini her tereplime qollap-quwwetleymiz. Bizmu chamimiz kelgüche chong-kichik hemmimiz dölitimizning programmisini, meqsitini emelge ashurushni her da'im qollap-quwwetlep, bolupmu dölitimiz ichidiki inaqliq, milletler ara ittipaqliqqa küch qoshimiz dégen ümidler bar.”

Yighinning ikkinchi qismida jumhuriyetlik medeniyet merkizining re'isi shahimerdan nurumof yilliq hésabat berdi. U öz doklatida merkez ish-pa'aliyitining asasiy jehettin qazaqistan prézidénti nursultan nazarbayéf mektuplirida körsitilgen memliketlik ijtima'iy, iqtisadiy programmilardin, shundaqla qazaqistanda yashawatqan xelqler arisidiki dostluqni mustehkemlesh, jumhuriyettiki Uyghur ahalisining bilim we medeniyet derijisini sapaliq kötürüsh, yashlarni wetenperwerlik, meniwiylik we exlaq jehettin terbiyilesh, dölet tilining emeliy paydilinish da'irisini kéngeytish, Uyghur jem'iyetlik teshkilatlirini birleshtürüsh oxshash prinsiplardin tüzülgenlikini tekitlidi. Bu mesile boyiche almata sheherlik kéngeshning ezasi exmetjan sherdinofning yardemchisi, merkez bashqarmisining ezasi osmanjan obulof, merkez yénidiki Uyghur mektepliri birleshmisining re'isi shawket ömerof, péshqedem ziyaliylar baharem rexmitullayéwa we zérip molotoflar, Uyghur nahiyilik bash yigit béshining orunbasari abdukérim seydullayéf öz pikir-tekliplirini otturigha qoydi.

Ziyaritimizni qobul qilghan almata wilayiti Uyghur nahiyilik bash yigit béshining orunbasari abdukérim seydullayéf mundaq dédi: “Jumhuriyetlik medeniyet merkizi we nahiyilik medeniyet merkezlirining ishi éniqlandi. Shuni hökümet bahalap, nazarbayéf teripidin bizning medeniyet merkizining re'isi shahimerdan'gha ‛hörmet ordéni‚ bérildi. Biz buningdin nahayiti pexirlinimiz. Pütün Uyghur medeniyet merkizining ishini yaxshi bahalighanliqtin biz buninggha nahayiti xushal. Shuning üchün biz birliship, hemkarliship, téximu yaxshi ishleshke tirishishimiz kérek. Biz, Uyghurlarghimu oqushqa, ishleshke hemme shara'it bar. Shuning üchün qazaqistanda yashawatqinimizgha xushal.”

Yighinning üchinchi qismida sh. Nurumof qazaqistanda méhir-shepqetni, insanperwerlik we jem'iyetlik hemkarliqni teshwiq qilishtiki alahide pa'aliyetliri üchün qazaqistan xelqi asambléyisi, qazaqistan prézidénti yénidiki “Jem'iyetlik kélishim” jumhuriyetlik memliketlik mehkimisi, shundaqla shexsen dölet prézidénti nursultan nazarbayéfning jumhuriyetlik medeniyet merkizige ewetken ‛teshekkürnamiler‚ ni oqup, köpchilikni tebriklidi. U shundaqla qazaqistan musteqilliqi küni harpisida yene, bir top Uyghurlarning memliketning ijtima'iy, iqtisadiy, medeniy tereqqiyatigha qoshqan salmaqliq töhpisi, shundaqla xelqler dostluqini mustehkemleshte, razimenlik bilen turaqliqni saqlashta alahide közge körün'genliki üchün dölet mukapatlirigha érishkenlikini xewer qildi. Ularning ichide “Paraset ordéni” bilen teqdirlen'gen zhürgénof namidiki qazaq milliy sen'et akadémiyisining oqutquchisi, proféssor rahile meshürowa, “Hörmet ordén” liri bilen teqdirlen'gen quddus ghojamyarof namidiki jumhuriyetlik dölet Uyghur muzikiliq komédiye tiyatirining artisi gülbahar exmediyéwa we jumhuriyetlik medeniyet merkizi re'isining birinchi orunbasari sedirdin ehetof, emgektiki jasariti üchün médal bilen teqdirlen'gen yarkent kraxmal-shirne zawutining mudiri wilyam xaliqof we almata shehiri türksib nahiyilik özini özi bashqurush komitétining re'isi osmanjan obulof“Shepqet médali” bilen teqdirlen'gen. “Amir xeyrxahliq fondi” ning re'isi kenje isayéf, “Emgek singdürgen énérgiyechi belgisi” bilen teqdirlen'gen “Batis-tranzit jem'iyiti” emgek hem téxnika bixeterliki xizmitining bashliqi dilshat imamniyazof médal bilen teqdirlen'gen herbiy burchini öteshte qehrimanlarche qaza bolghan zamir adiloflar bar.

Jumhuriyetlik Uyghur medeniyet merkizining ijra'iye mudiri zuhrullam qurwanbaqiyéf bügünki yighinning alahidiliki we merkezning emelge ashurghan asasiy ishlirini körsitip, mundaq dédi: “Bu yighin'gha qazaqistan xelqi assambléyisi ‛jem'iyetlik birlik‚ bashqarmisi mudirining orunbasari mexpirowa rahilemning qatnishishi, shundaqla almata oblastidiki barliq rayonlardin we sheher ichidiki ziyaliylirimizning qatnishishi nahayiti muhim boldi. Buningdin kéyinmu bizning medeniyet merkizimiz qazaqistan xelqi assambléyisi we élimiz prézidénti körsetmiliri boyiche ishlarni dawamlashturidu, dep oylaymiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.