Qazaqistan Uyghur edebiyati yene bir yultuzidin ayrildi

Ixtiyariy muxbirimiz oyghan
2015.02.24

Qazaqistan Uyghur edebiyati yene bir talantliq sha'iridin juda boldi. 22 - Féwral küni almata wilayitining emgekchiqazaq nahiyisige qarashliq tashtiqara yézisida Uyghur jama'etchiliki sha'ir, terjiman, jurnalist malik abubekri oghli sadirof bilen xoshlashti. Xoshlishish murasimida merhumning qérindishi, ustaz tursun sadirof edibning hayati we ijadiyitige toxtalghandin kéyin, sözge chiqqan qazaqistan Uyghurlirining jumhuriyetlik étno - medeniyet merkizining re'isi shahimerdan nurumof, sha'irlar élaxun hoshurof, mehemmetjan janbaqiyéf, siyasetshunas qehriman ghojamberdi malik sadirof ijadiyitining özige xas alahidiliklirini, uning Uyghur edebiyatida tutqan ornini, merhumning insaniy peziletlirini alahide tekitlidi.

Malik sadirof 1937 - yili Uyghur éli ili wilayitining ablash yézisida déhqan a'iliside tughulghan. Kichigidinla ata - anisidin ayrilghan u akisi abduméjitning terbiyiside boldi. Malik sadirof 1957 - yili ghulja shehiride exmetjan qasimi namidiki bilim yurtini tamamlighandin kéyin, ürümchidiki pédagogika institutining rus tili fakultétida oquydu. 1963 - Yilghiche u stalin namidiki rus mektipide, andin bayköl bashlan'ghuch mektipide mu'ellimlik qilip, shu yili qazaqistan'gha köchüp chiqidu we emgekchiqazaq nahiyisi “Yéngisher”oqush - tejribe igilikining tashtiqara bölümide ishleydu.

Malik sadirof 1970 - yildin ta 1997 - yilghiche “Yéngi hayat” we “Kommunizm tughi”, yeni hazirqi “Uyghur awazi”gézitlirida terjiman, muxbir, bölüm bashliqi wezipilirini atquridu. Uning shé'irliri we her xil mawzulardiki maqaliliri qazaqistandiki we Uyghur élidiki gézit - jurnallarda pat - pat bésilip turdi. Edibning “Tunji qedem”, “Heqiqet quyashi”shé'iriy toplamliri, “Matanet”, “Atu paji'esi”namliq kitabliri oqurmenlerge yaxshi tonushtur. Uning ijadiyitide millet, weten teqdiri asasiy orunni igileydu.

Radi'omiz ziyaritini qobul qilghan siyasetshunas qehriman ghojamberdi we dostluq mehellisining turghuni aztékin ibrahimof sha'ir ijadiyitining alahidiliki, insaniy peziletliri heqqide toxtaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.