Алмутада өткүзүлгән яш-өсмүрләр бокс мусабиқисидә уйғурларму утуққа еришти

Ихтиярий мухбиримиз ойған
2018-06-29
Share
Almuta-yash-osmurler-boks-musabiqisi-repir-zakir-abduqadirof-2018-00.jpg Алмутада өткүзүлгән яш-өсмүрләрниң бокс мусабиқисидин бир көрүнүш. Оңдин биринчиси репир закир абдуқадироф. 2018-Йили 29-июн. Алмута, қазақистан.
RFA/Oyghan

29-Июн күни алмута шәһиридә яш-өсмүрләрниң җумһурийәтлик 13-қетимлиқ бокс мусабиқиси ахирлашти. Мәзкур мусабиқә "совет-герман уруши қәһримани" дегән атақни алған мәсим яқупоф хатирисигә беғишланди. Бәш күнгә созулған мәзкур мусабиқигә җумһурийәтниң һәрқайси шәһәр-йезилиридин болуп җәмий 175 тәнһәрикәтчи қатнашти. Бу қетимлиқ бокс мусабиқиси "динамо-султан" тәнһәрикәт җәмийити, алмута шәһириниң түрксиб наһийилик һаким идариси вә "метал пром гуруһи" ширкити тәрипидин уюштурулди.

Мусабиқидә нәтиҗигә еришкән бокс маһирлири билән мусабиқини уюштурғучи орунларға пәхрий ярлиқ вә баһалиқ совғиларни тәқдим қилинди. Шуларниң ичидә биринчиләрдин болуп "хәлқара дәриҗилик тәнһәрикәт маһири", даңлиқ боксчи абдурешит абдурахманофму орун алди. 

Абдурешит абдурахманоф радийомиз зияритини қобул қилип, бокс мусабиқисигә қатнишиватқан яш-өсмүрләрниң оюнини көрүветип, өзиниңму буниңдин көп йиллар илгири қатнашқан мусабиқилирини әслигәнликини, һаятида 500 гә йеқин һәр хил дәриҗидики мусабиқиләргә қатнишип, бу җәһәттә һәр хил боксчиларни, тренерларни көргәнликини әсләп өтти. У мундақ деди: "тәнһәрикәтниң һәр қандақ түридә әң биринчи орунда туридиған нәрсә у мулайимлиқ. Мәсилән, боксчилар йәкмуйәк чиққанда хаталиқ өткүзмәсликкә тиришиши керәк. Хаталиқ өткүзгән киши әнсирәшкә башлайду. Биринчи қисимда дәрру һуҗумға өтмәй алди билән ойнап, риқабәтчисини синаш лазим. Мениң өзүмниң шундақ мусабиқилишиш истилим болған. Буниң үчүн әлвәттә тәҗрибилик тренер болуши керәк. Боксчи өзиниңму тәҗрибиси болғини яхши. Тренер өз шагиртини әнсиримәсликкә өгитиши керәк. Мән мусабиқидин көрүватимәнки, бәзидә тренерлар шагиртлирини тиллайду, варқирайду. Бу дурус әмәс."

Абдурешит абдурахманоф яш боксчиларниң көпрәк тиришип издиниши лазимлиқини ейтип, уларға чоң утуқлар тилиди.

Мәзкур мусабиқиләрни өткүзүшниң биринчи мәқсити яш әвладлар арисида сағлам һаят муһитини тәрғиб қилиштин ибарәт икән. Игилишимизчә, бүгүнки күндә сағламлиқ һөкүмәт алаһидә диққәт қилидиған мәсилиләрниң бири болуп қалмақтикән.

Мусабиқә уюштурғучилириниң бири "метал пром гуруһи" ширкити баш мудириниң орунбасари ели гасанофниң ейтишичә, долқун абдухелил башқуруватқан мәзкур ширкәт балиларни сағлам һаятқа тәрбийәләшкә һәмдә қазақистан мәмликитиниң гүллинишигә алаһидә диққәт қиливатмақтикән. У мундақ деди: "бизниң ширкитимиз даим тәнһәрикәтчиләргә, муһтаҗларға ярдәм көрситишкә тиришип кәлди. Биздә иш орниму йетәрлик болуп, 100 дин ошуқ адәмни иш билән тәминлидуқ. Буниңдин ташқири биз йетимләр өйлиригә, мәҗруһларға, балилар бағчилириға ярдәм қолимизни созуп туримиз. Тәнһәрикәткә йәнә тохталсақ, өткән йили җумһурийәт даирисидә путбол мусабиқиси уюштурдуқ. Униң баш һамийси бизниң ширкәт болди. Қисқиси, бизгә шәһәр вә наһийилик һөкүмәтләр мураҗиәт қилғинида биз даим ярдәмгә келимиз."

Мәзкур бокс мусабиқисини уюштурғучилириниң йәнә бири, хәлқара дәриҗилик репир закир абдуқадирофниң ейтишичә, һәр йили өткүзүлидиған бокс мусабиқилиригә уйғур тәнһәрикәтчилириму пат-пат қатнишип туридикән. У бу қетимлиқ мусабиқиниң ахирқи басқучиға 46 боксчиниң биринчи вә иккинчи орунлар үчүн күрәшкәнликини, уларниң ичидә уйғур қиз-йигитлириниңму қатнашқанлиқини оттуриға қоюп, мундақ деди: "бүгүнки мусабиқигә пүткүл қазақистандин вә бири данийәдин кәлди. 23 Җүпниң ичидә уйғурларму бар. 5-6 Оғул бала вә 2 уйғур қиз ахирқи басқучқа чиқти. Улардин "динамо-султан" кулубидин қанатоф ринат йәңди. Мәмәтбақийеф нодәрму йәңди. Мусабиқә болуватиду. Йәнә уйғур балилири бар. Уларму йеңиши керәк дәп ойлаймән. Бу мусабиқигә һөрмәтлик меһманларму келип туриду. Шуларниң бири уйғурлардин чиққан боксчи абдурешит абдурахманоф. У икки қетим сабиқ совет иттипақи бойичә өткүзүлгән бокс мусабиқилириниң чемпийони болған. Йәнә бир меһман хәмит бәрайеф, у хәлқара дәриҗилик репир, қазақистанниң тәҗрибилик тренери."

44 Килограм салмақтики мусабиқә чемпийони 15 яшлиқ ришат марселимофниң ейтишичә, мусабиқидә уйғурлардин йәнә мәликәм юлчийева вә фаруқ тохтасуноф 1-орунға, адиләм иминова, имран ниязоф, әшрәф муһәммәд 2-орунға еришкән икән.

Ришат марселимоф зияритимизни қобул қилип, мундақ деди: "7-синиптин тартип бокс билән шуғуллинип келиватимән. Мениң тренерим сидиқоф шамил. Бу мусабиқигә қатнишип, биринчи болдум. Шәһәрлик мусабиқиләрдә иккинчи болдум. Ата-анам һәммигә ярдәм берип туриду. Дуня мусабиқилиригә қатнишиш арминим бар. Келәчәктә тренер болғум келиду. Шамил ака бизни өгитип туриду, мусабиқиләргә қатнаштуриду. Мениң үчүн әң яхши тренер шамил ака."

Игилишимизчә, мусабиқигә қатнашқанлар 10-15 яшлардики қиз-йигитләр болуп, улар һәр хил тәнһәрикәт кулублириға вәкиллик қилидикән. Уларниң арисида наһийилик, шәһәрлик, җумһурийәтлик мусабиқиләрдә бир нәччә қетим чемпийон болғанлар, һәтта тәнһәрикәт маһири дәриҗисигә игә болғанлар бар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт