Almutada ötküzülgen yash-ösmürler boks musabiqiside Uyghurlarmu utuqqa érishti

Ixtiyariy muxbirimiz oyghan
2018-06-29
Élxet
Pikir
Share
Print
Almutada ötküzülgen yash-ösmürlerning boks musabiqisidin bir körünüsh. Ongdin birinchisi répir zakir abduqadirof. 2018-Yili 29-iyun. Almuta, qazaqistan.
Almutada ötküzülgen yash-ösmürlerning boks musabiqisidin bir körünüsh. Ongdin birinchisi répir zakir abduqadirof. 2018-Yili 29-iyun. Almuta, qazaqistan.
RFA/Oyghan

29-Iyun küni almuta shehiride yash-ösmürlerning jumhuriyetlik 13-qétimliq boks musabiqisi axirlashti. Mezkur musabiqe "Sowét-gérman urushi qehrimani" dégen ataqni alghan mesim yaqupof xatirisige béghishlandi. Besh kün'ge sozulghan mezkur musabiqige jumhuriyetning herqaysi sheher-yéziliridin bolup jem'iy 175 tenheriketchi qatnashti. Bu qétimliq boks musabiqisi "Dinamo-sultan" tenheriket jem'iyiti, almuta shehirining türksib nahiyilik hakim idarisi we "Métal prom guruhi" shirkiti teripidin uyushturuldi.

Musabiqide netijige érishken boks mahirliri bilen musabiqini uyushturghuchi orunlargha pexriy yarliq we bahaliq sowghilarni teqdim qilindi. Shularning ichide birinchilerdin bolup "Xelq'ara derijilik tenheriket mahiri", dangliq bokschi abduréshit abduraxmanofmu orun aldi. 

Abduréshit abduraxmanof radiyomiz ziyaritini qobul qilip, boks musabiqisige qatnishiwatqan yash-ösmürlerning oyunini körüwétip, öziningmu buningdin köp yillar ilgiri qatnashqan musabiqilirini esligenlikini, hayatida 500 ge yéqin her xil derijidiki musabiqilerge qatniship, bu jehette her xil bokschilarni, trénérlarni körgenlikini eslep ötti. U mundaq dédi: "Tenheriketning her qandaq türide eng birinchi orunda turidighan nerse u mulayimliq. Mesilen, bokschilar yekmuyek chiqqanda xataliq ötküzmeslikke tirishishi kérek. Xataliq ötküzgen kishi ensireshke bashlaydu. Birinchi qisimda derru hujumgha ötmey aldi bilen oynap, riqabetchisini sinash lazim. Méning özümning shundaq musabiqilishish istilim bolghan. Buning üchün elwette tejribilik trénér bolushi kérek. Bokschi öziningmu tejribisi bolghini yaxshi. Trénér öz shagirtini ensirimeslikke ögitishi kérek. Men musabiqidin körüwatimenki, bezide trénérlar shagirtlirini tillaydu, warqiraydu. Bu durus emes."

Abduréshit abduraxmanof yash bokschilarning köprek tiriship izdinishi lazimliqini éytip, ulargha chong utuqlar tilidi.

Mezkur musabiqilerni ötküzüshning birinchi meqsiti yash ewladlar arisida saghlam hayat muhitini terghib qilishtin ibaret iken. Igilishimizche, bügünki künde saghlamliq hökümet alahide diqqet qilidighan mesililerning biri bolup qalmaqtiken.

Musabiqe uyushturghuchilirining biri "Métal prom guruhi" shirkiti bash mudirining orunbasari éli gasanofning éytishiche, dolqun abduxélil bashquruwatqan mezkur shirket balilarni saghlam hayatqa terbiyeleshke hemde qazaqistan memlikitining güllinishige alahide diqqet qiliwatmaqtiken. U mundaq dédi: "Bizning shirkitimiz da'im tenheriketchilerge, muhtajlargha yardem körsitishke tiriship keldi. Bizde ish ornimu yéterlik bolup, 100 din oshuq ademni ish bilen teminliduq. Buningdin tashqiri biz yétimler öylirige, mejruhlargha, balilar baghchilirigha yardem qolimizni sozup turimiz. Tenheriketke yene toxtalsaq, ötken yili jumhuriyet da'iriside putbol musabiqisi uyushturduq. Uning bash hamiysi bizning shirket boldi. Qisqisi, bizge sheher we nahiyilik hökümetler muraji'et qilghinida biz da'im yardemge kélimiz."

Mezkur boks musabiqisini uyushturghuchilirining yene biri, xelq'ara derijilik répir zakir abduqadirofning éytishiche, her yili ötküzülidighan boks musabiqilirige Uyghur tenheriketchilirimu pat-pat qatniship turidiken. U bu qétimliq musabiqining axirqi basquchigha 46 bokschining birinchi we ikkinchi orunlar üchün küreshkenlikini, ularning ichide Uyghur qiz-yigitliriningmu qatnashqanliqini otturigha qoyup, mundaq dédi: "Bügünki musabiqige pütkül qazaqistandin we biri daniyedin keldi. 23 Jüpning ichide Uyghurlarmu bar. 5-6 Oghul bala we 2 Uyghur qiz axirqi basquchqa chiqti. Ulardin "Dinamo-sultan" kulubidin qanatof rinat yengdi. Memetbaqiyéf nodermu yengdi. Musabiqe boluwatidu. Yene Uyghur baliliri bar. Ularmu yéngishi kérek dep oylaymen. Bu musabiqige hörmetlik méhmanlarmu kélip turidu. Shularning biri Uyghurlardin chiqqan bokschi abduréshit abduraxmanof. U ikki qétim sabiq sowét ittipaqi boyiche ötküzülgen boks musabiqilirining chémpiyoni bolghan. Yene bir méhman xemit berayéf, u xelq'ara derijilik répir, qazaqistanning tejribilik trénéri."

44 Kilogram salmaqtiki musabiqe chémpiyoni 15 yashliq rishat marsélimofning éytishiche, musabiqide Uyghurlardin yene melikem yulchiyéwa we faruq toxtasunof 1-orun'gha, adilem iminowa, imran niyazof, eshref muhemmed 2-orun'gha érishken iken.

Rishat marsélimof ziyaritimizni qobul qilip, mundaq dédi: "7-Siniptin tartip boks bilen shughullinip kéliwatimen. Méning trénérim sidiqof shamil. Bu musabiqige qatniship, birinchi boldum. Sheherlik musabiqilerde ikkinchi boldum. Ata-anam hemmige yardem bérip turidu. Dunya musabiqilirige qatnishish arminim bar. Kélechekte trénér bolghum kélidu. Shamil aka bizni ögitip turidu, musabiqilerge qatnashturidu. Méning üchün eng yaxshi trénér shamil aka."

Igilishimizche, musabiqige qatnashqanlar 10-15 yashlardiki qiz-yigitler bolup, ular her xil tenheriket kulublirigha wekillik qilidiken. Ularning arisida nahiyilik, sheherlik, jumhuriyetlik musabiqilerde bir nechche qétim chémpiyon bolghanlar, hetta tenheriket mahiri derijisige ige bolghanlar bar iken.

Toluq bet