Bishkekte qirghizistan Uyghur meshripi ötküzüldi

Ixtiyariy muxbirimiz azad qasim
2016.02.24
qirghizistan-meshrep.JPG Xelq sen'etkarliri meshrep ehlige nadir sen'et nomurlirini teqdim qildi. 2016-Yili 21-féwral, bishkek.
RFA/Azad Qasim

Qirghizistan Uyghurliri “Ittipaq” jem'iyitining uyushturushi bilen 21-féwral küni bishkektiki “Awat” réstoranida qirghizistan Uyghurlirining chong meshrep pa'aliyiti ötküzüldi.

Uyghur milliy medeniyitining durdanisi bolghan meshrep pa'aliyiti qirghizistan Uyghurlirining ijtima'iy hayatida Uyghur milliy kimlikini saqlap qélish, en'eniwi örp-adetler we Uyghur til-yéziqi arqiliq yashlarni terbiyelesh qatarliq jehetlerde aktip rol oynap kéliwatidu.

Nöwette qirghizistan Uyghurliri arisida 150 din köprek mehelliwiy meshrepler shekillen'gen bolup, bu meshrepler yashan'ghanlar meshripi, ottura yashliqlar meshripi, yashlar meshripi,ayallar meshripi qatarliq türlerge bölün'gen. Adette her qétimliq qirghizistan chong meshripi melum mehelliwiy meshrepning sahibxaniliqida ötküzülidu. Bu qétimliq chong meshrepke bishkek shehirining sherqi jenubigha jaylashqan “Alataw” yézisidiki ottuz oghul meshripi sahibxaniliq qildi.

Meshrepte aldi bilen söz qilghan qirghizistan chong meshripining meshrep bégi mirzakim hajim meshrepning Uyghur jem'iyitide oynaydighan roli heqqide toxtilip mundaq dédi: “Meshrep Uyghur xelqi ezeldin oynap kéliwatqan, xelqni edep exlaqqa chaqiridighan ijtima'iy oyunlarning biri. Xelqimizde ‛balangni mektepke ber, andin meshrepke ber‚ deydighan hékmetlik söz bar. Uyghur meshripi bizning ata-bowilirimizdin kéliwatqan, bizni edep-exlaqqa, iman-étiqadqa ögitidighan ijtima'iy oyun bolup hésablinidu.”

“Ittipaq” jem'iyitining re'isi artiq hajim meshrep ehlini qirghizistanning 23-féwral küni xatirilinidighan “Weten qehrimanliri bayrimi” bilen tebrikligendin kéyin, Uyghur yashlirini qirghizistan chong meshripige köplep jelp qilishning ehmiyiti heqqide munularni bildürdi: “Men aldi bilen bügünki meshrep sorunidiki barliqinglarni chin dilimdin tebrikleymen. Bügünki meshrep sorunimizgha ‛ittipaq‚ yashlar komitétining re'isi bashchiliqidiki yashlarmu qatnishiwatidu. Biz ata-bowilirimizdin bizge miras bolup qalghan meshrep pa'aliyetlirimizge téximu köpligen yashlirimizni qatnashturushqa ehmiyet bérishimiz lazim. Chünki bizdin kéyin qalsa, ejdadlirimiz bizge miras qaldurghan Uyghur xelqining ésil en'enilirini yashlar dawamlashturidu dep qaraymen.”

“Ittipaq” jem'iyiti aqsaqallar kéngishining re'isi abduréshit hajim Uyghur meshreplirining ehmiyiti heqqide töwendikilerni otturigha qoydi: “Meshrep tolimu ehmiyetlik bir sorun. Hemmimizge ayan bolghinidek, tarixtin buyan bizning ata-bowilirimiz meshrep arqiliq Uyghur medeniyitini ewladmu-ewlad dawamlashturup keldi. Uyghur tarixini, örp-adetlerni, edep-exlaqni we izzet-hörmetni bizge del mushu meshrep ögitidu. Biz millitimizning medeniyet miraslirini özimizning Uyghur meshrepliri arqiliq yashlargha miras qilip qaldurushimiz lazim.”

Bu qétimqi meshrepke bishkek shehiri we uning etrapidiki Uyghur jama'itidin bolup 200 ge yéqin kishi qatnashti. Besh sa'ettin köprek dawam qilghan meshrep dawamida xelq sen'etkarliri meshrep ehlige nadir sen'et nomurlirini teqdim qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.