Perhat hoshur qirghizistan döletlik hörmet mukapatigha érishti

Ixtiyariy muxbirimiz azad qasim
2016-01-27
Élxet
Pikir
Share
Print
Qirghizistan prézidénti almasbék atambayiw(soda) Uyghur yigiti perhat hoshurgha döletlik hörmet mukapati teqdim qildi. 2016-Yil 23-yanwar, bishkek.
Qirghizistan prézidénti almasbék atambayiw(soda) Uyghur yigiti perhat hoshurgha döletlik hörmet mukapati teqdim qildi. 2016-Yil 23-yanwar, bishkek.
RFA/Azad Qasim

23-Yanwar küni qirghizistanning 2015-yilliq xizmetlerni xulasilesh murasimi ötküzülüp, ötken bir yil dawamida herqaysi sahelerde körünerlik netije yaratqan shexsler qirghizistan prézidénti almasbék atambayif teripidin her xil mukapatlar bilen mukapatlandi.

Qirghizistan chélishchilar komandisining bash meshqawuli, bishkektiki "Bürküt" tenterbiye kulubining yétekchisi, Uyghur yigiti perhat hoshur özining qirghizistanning tenterbiye saheside qolgha keltürgen körünerlik netijiliri bilen qirghizistanning döletlik hörmet mukapatigha érishti.

Perhat hoshur on nechche yildin buyan bishkektiki "Bürküt" tenterbiye kulubining yétekchisi bolup kéliwatidu. Uning qattiq telepchanliq bilen terbiyelishi netijiside, xelq'araliq musabiqilerde asiya chémpiyonluqigha érishken köpligen mahirlar yétiship chiqqan.

Perhat yétekligen qirghizistan chélishchilar komandisi 2012-yili taylandta, 2014-yili mongghuliyede, 2015-yili iranda ötküzülgen xelq'araliq musabiqilerde yaxshi netijilerge ériship, qirghizistan tenterbiye sahesining xelq'araliq sehnilerde tonulushigha zor hesse qoshqan.

Perhat hoshur ependi döletlik mukapatqa érishkendin kéyin, radi'omiz ziyaritini qobul qilip, özining tenterbiye herikitige bolghan qiziqishi hemde mukapatlan'ghandin kéyinki tesiratliri heqqide toxtilip, mundaq dédi: "Men baliliq dewrimdin bashlapla tenterbiyining chélishish türige ishtiyaq baghlighan. Yash chaghlirimda we kéyinche sowét armiyiside wezipe ötep yürgen waqitlarda özümning tirishchanliqi bilen sowét ittipaqining tenterbiye mahiri bolup bahalan'ghan. Qirghizistan musteqil bolghandin kéyin, dostum sidiqjan bilen birlikte 'bürküt' tenterbiye kulubini qurup yashlarni terbiyilep kéliwatimiz. Biz nöwette qirghizistanliq mahirlarning olimpik musabiqiliride yaxshi netijilerni qolgha keltürüshi üchün tirishiwatimiz."

"Bürküt" tenterbiye kulubining qurghuchisi sidiqjan ependi eng yéqin dosti perhat hoshurning döletlik mukapatqa érishkenlikidin söyün'genlikini bildürüp mundaq dédi: "Perhatning döletlik mukapatqa érishkenliki biz üchün zor xushalliq boldi. U nechche yillardin buyan özining tirishchanliqi bilen köpligen mahirlarni terbiyilep yétishtürdi. Biz hazir, bu yil biraziliyede ötküzülidighan xelq'araliq olimpik musabiqisige teyyarliq qiliwatimiz."

Perhat hoshur yétekligen qirghizistan chélishchilar komandisi nöwette bu yil féwralda taylandta, aprélda türkiyede ötküzülidighan xelq'araliq chélishish musabiqisining girik-rim türi boyiche tallash musabiqiside yaxshi netijilerni qolgha keltürüsh üchün jiddiy meshiq qilmaqta.

Toluq bet