Yüsüp musayéwqa atalghan qirghizistan we qazaqistan dostluq musabiqisi

Ixtiyariy muxbirimiz féroze
2016-09-27
Élxet
Pikir
Share
Print
Qirghizistan qirghizistan xelqi assambléyisi kéngishining mu'awin re'isi rawshan sabirof mukapatlarni tarqatmaqta. 2016-Yili 24-séntebir, bishkek.
Qirghizistan qirghizistan xelqi assambléyisi kéngishining mu'awin re'isi rawshan sabirof mukapatlarni tarqatmaqta. 2016-Yili 24-séntebir, bishkek.
RFA/Féroze

24 Séntebir küni qirghizistan paytexti bishkek shehiride 1960-1970-yillarda ottura asiya jumhuriyetliride nami chiqqan Uyghur putbolchi yüsüp musayéwqa béghishlan'ghan, sowétlar ittipaqi mezgilide dang qazan'ghan "Algha" we "Qayrat" komandilirining dostluq putbol musabiqisi bolup ötti. Bu musabiqige, qazaqistandin kelgen 40-60 yashliq putbol mahirliri qatnashti. Bu küni méhmanlarning bishkekke kélidighanliqining sewebi-pütün sabiq sowét döletlirige meshhur putbolchi yüsüp musayéw 80 yashqa tolghan idi. Yüsüp musayéw qirghizistan Uyghurliri "Ittipaq" jem'iyitining merkizi kéngishining ezasidur.

Bu pa'aliyetni qirghizistan putbolchilar konfédratsiyisi, yeni, putbolchilar ittipaqi bilen bishkek putbolchilar ittipaqi shundaqla qirghizistan xelqi assambléyisi uyushturghan.

Mezkur pa'aliyetke "Ittipaq" jem'iyiti teripidin qirghiz jumhuriyiti aliy kéngishining ezasi p. Tuléndibayéw, teptish hey'itining re'isi kamiljan niyazow, ilim komitétining re'isi g. Ibdiminowa, yashlar komitétining mu'awin re'isi ablimit exmet we toqmaq, qarabalta, keng bulung qatarliq yéza hem sheherlerdin kelgen Uyghur jama'iti wekilliri qatnashti. Shundaqla bu pa'aliyetke qazaqistan putbolchilar konfédratsiyisining mu'awin re'isi, sabiq sowét ittipaqi isport mahiri séyilda bayshakow, özbékistandin kelgen sabiq sowét ittipaqi isport mahiri bérador abduraymow qatnashti. Emma, "Ittipaq" re'isi artiq hajiyéw 23-25-séntebir künliri jalal abad wilayitide jumhuriyetlik meshrep, osh wilayitide konsért ötküzülüsh munasiwiti bilen bu dostluq musabiqisige qatnishalmay qaldi.

Yüsüp musayéwning 80 yashliqi munasiwiti bilen paytext bishkek shehiride, mart éyidin tartip, nechche qétim her-xil musabiqiler we bashqa pa'aliyetler péshqedem we yash putbolchilar arisida bolup ötti.

Mezkur musabiqide yene qirghizistan putbol konfédratsiyisining re'isi söz qilip, öktebir éyida yüsüp musayéwning 80 yashliqigha béghishlan'ghan "Qirghizistan-türkmenistan" dostluq musabiqisi ötküzülmekchi ikenlikini bildürdi.

Nöwette sözge chiqqan sabiq sowét ittipaqi isport mahiri, 20-esirning 80-yilliridiki "Eng yaxshi futbolchi" dégen namgha érishken majit karjanow mundaq dédi: "Yüsüp musayéwning oyunliri jan köyerlerning éside hazirghiche bar, yüsüp musayéw kelgendin kéyin qirghizistan putboli sabiq sowétlar dölitide birinchilikini élish sewiyiside oynashqa yéterlik bolghan idi. Qaysi mesililer bolmisun, biz hemmimiz yüsüp akimizning sözige qarap turimiz, u bizning rehbirimiz" dédi.

Peqet qirghizistanda emes, ottura asiya we sabiq sowét ittipaqida dangliq yüsüp musayéw putbolchiliqni 1961-yili ashu waqitta frunzé dep atalghan bishkek shehirining "Algha" komandisida bashlidi. Mezkur komandining gülligen mezgili 1967-chi yili bolup, bu komanda ashu yili sowét ittipaqi boyiche ötküzülgen musabiqide 3-chi orunni alghan idi. Shu waqitta qirghizistan putboli toghrisida sowét ittipaqi boyiche köp sözler bolghan hem yüsüp musayéw putbol cholpini süpitide chaqnighan idi.

Qirghizistan xelqi assambléyisi teripidin yüsüp musayéw médal bilen mukapatlandi. Qirghizistan putbolchilar konfédératsiyisi bolsa bügünki "Algha" we "Qayrat"dostluq musabiqisige qatnashqan péshqedem putbolchilargha sowghatlar teqdim qildi.

Qirghizistan aliy kéngesh ezasi p. Tuléndibayéw tebrik sözide yüsüp musayéwning "Algha" komandisida 13 yil oynap, hazirghiche her bir musabiqilerde eng hörmetlik méhmanlarning biri boluwatqanliqini, yash putbolchi balilarni qollap-quwwetlewatqanliqini éytti. U: "Biz qirghizistan Uyghurliri siz bilen pexirlinimiz, sizdin ghururlinimiz" dep éytti.

Melumki, yüsüp musayéw addiy putbolchidin axiri qirghiz sowét jumhuriyiti we musteqil qirghizistan milliy komandisining bash trénéri boldi. Bir nechche qirghizistan we xelq'ara mukapatlirigha sahib bolghan. Bularning ichide

"Xizmet körsetken trénér", "Tenterbiye we isportqa xizmet körsetken shexs", "20-Esirining eng yaxshi putbolchisi"dégenlerdin bashqa yene xelq'ara putbol konfédratsiyisining re'isi "Yozéf batlérn mukapati" ning sahibi boldi.

Qirghizistanda hökümet statistikisi boyiche texminen 60 ming etrapida Uyghur ahalisi yashaydu. Emma, Uyghurlarning özlirining éytishiche, ularning sani buningdin köp bolushi mumkin. Ular arisidin ataqliq putbolchi yüsüp musayéwtin bashqa yene meshhur akadémik eziz narinbayéf qatarliq bir qisim proféssorlar, doktorlar, sen'et we medeniyet erbabliri we yazghuchilar yétiship chiqip qirghizistan we ottura asiya jumhuriyetlirige yaxshi tonulghan idi.

Toluq bet