Алматада яш уйғур рәссамлириниң көргәзмиси ечилди

Ихтиярий мухбиримиз ойған
2017-03-08
Share
Yash-ressam-korgezme-qazaqistan.jpg (Оңдин солға) яш рәссамлар нузугум самийева, надирәм йүсүпова, венерә маҗитова, муниса гулийева вә муһәббәт һетахунова. 2017-Йили 6-март, алмата.
RFA/Oyghan

6-Март күни қуддус ғоҗамяроф намидики академийәлик уйғур музикилиқ комедийә тиятирида уйғур рәссамлириниң нөвәттики көргәзмиси ечилди.

Хәлқара ханим-қизлар байрими һарписида уйғур тиятири вә "дуня арт" галлерейиси бирликтә уюштурған мәзкур көргәзмидә муһәббәт һетахунова, надирәм йүсүпова, нузугум самийева, венерә маҗитова вә муниса гулийеваниң әсәрлири қоюлған болуп, улар һәр хил мавзуларға беғишланған.

Көргәзмини киришмә сөз билән ачқан "дуня арт" галлерейисиниң мудири һакимҗан гулийефниң ейтишиға қариғанда, бу көргәзминиң алаһидилики шуниңдики, қазақистан уйғур җәмийити тарихида мундақ көргәзмигә тунҗи қетим уйғур ханим-қизлириниң бир гурупписи қатнашмақта. У болупму кейинки йиллири қазақистан уйғур рәссамлири қатариға бир қанчилиған яш рәссамларниң келип қошулғанлиқини алаһидә тәкитләп, уларни бир-бирләп тонуштурди һәм һәр қайсиниң иҗадийити һәққидә қисқичә тохталди.

Андин сөзгә чиққан мемарчилиқ пәнлириниң доктори, профессор бәһрәмҗан ғилавдиноф рәссамларниң өзигә хас алаһидиликлирини, һазирқи ахбарат инқилаби дәвридә улардин көп нәрсиләрниң тәләп қилинидиғанлиқини, бу көргәзминиң ечилишиниң қазақистан уйғурлири тарихидики чоң вә муһим бир вәқә икәнликини оттуриға қойди. Әмди рәссам әхмәтҗан әһәт болса, биринчидин, уйғур рәссамлири қатариға уйғур қизлириниң келип қошулушиға чәксиз хушал болса, иккинчидин, уларниң әсәрлиридә миллий роһниң орун елишидин қаттиқ тәсирләнгәнликини билдүрди.

Радийомиз зияритини қобул қилған "дуня арт" галлерейисиниң мудири, сәнәтшунаслиқ пәнлириниң намзати, язғучи һакимҗан гулийеф көргәзминиң алаһидилики һәққидә тохтилип, мундақ деди: "бу байрамда әр кишиләр барлиқ ханим-қизларни тәбрикләйду. Бүгүн болса, әксичә, рәссам қизлиримиз бизгә өзлириниң соғисини тәқдим қиливатиду. Көргәзминиң йәнә бир алаһидилики, бу қазақистан тарихида биринчи қетим болуватиду. Алматада иҗад қиливатқан рәссам қизлар хели санға йетип қапту. Шуниң үчүн биз уларни қоллап-қуввәтләш мәқситидә мушу көргәзмини уюштурдуқ."

Һ. Гулийеф мәзкур көргәзмигә қоюлған әсәрләрниң бәдиийлик җәһәттин юқири-төвән болсиму, әң асаси уларда һәқиқий рәссамларға хас хусусийәтләрниң, қабилийәтлириниң бар икәнликини, яш уйғур рәссамлириниң бир гурупписиниң шәкилләнгәнликини, буниңдинму сирт йәнә, рәссам қизларму бар болуп, уларниму бир йәргә топлаш арзуси барлиқини билдүрди.

Мәлумки, өткән әсирниң болупму 70-вә 80-йиллири қазақистанда бир гуруппа талантлиқ рәссамлар мәйданға келип, улар уйғур тәсвирий сәнитиниң раваҗлинишиға алаһидә төһпә қошқан иди һәм қошуп кәлмәктә. Руслан йүсүпоф, абдукерим ийса, гүзәл мамединова, күрәш зулпиқароф, һашимҗан қурбаноф шулар җүмлисидиндур. Әмди кейинки әвладлар сепидә келиватқан рәссамларниң бири муһәббәт һетахунова зияритимизни қобул қилип, мундақ деди: "бүгүнки көргәзмигә мән төт иш билән қатнишиватимән. Уларниң ичидә һәм кона, һәм йеңи ишлиримму бар. Асасий мавзу уйғур қизлири, уйғур уссули, мәдәнийити, сәнити. Мән кичикимдин тартип сүрәт сизған. Буниң барлиқини дадам өгәткән. Униң бәргән билимигә мән наһайити хушал болуп ишини давамлаштуруп келиватимән."

Уйғур рәссамлири қазақистанниң бир нәччилигән шәһәрлиридә, шундақла чәтәлләрдиму уюштурулуватқан көргәзмиләргә пат-патла қатнишип туриду. Уларниң ичидин мәмликәтниң, шундақла һәр хил җәмийәтлик бирләшмиләрниң, тәшкилатларниң мукапатлириға еришкәнләрму аз әмәс. Уйғур рәссамлири шундақла алмата шәһири вә наһийиләрдә өткүзүлүп туридиған хәйрхаһлиқ ишлириниңму актип иштиракчилиридур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт