Almatada yash Uyghur ressamlirining körgezmisi échildi

Ixtiyariy muxbirimiz oyghan
2017-03-08
Share
Yash-ressam-korgezme-qazaqistan.jpg (Ongdin solgha) yash ressamlar nuzugum samiyéwa, nadirem yüsüpowa, wénére majitowa, munisa guliyéwa we muhebbet hétaxunowa. 2017-Yili 6-mart, almata.
RFA/Oyghan

6-Mart küni quddus ghojamyarof namidiki akadémiyelik Uyghur muzikiliq komédiye tiyatirida Uyghur ressamlirining nöwettiki körgezmisi échildi.

Xelq'ara xanim-qizlar bayrimi harpisida Uyghur tiyatiri we "Dunya art" galléréyisi birlikte uyushturghan mezkur körgezmide muhebbet hétaxunowa, nadirem yüsüpowa, nuzugum samiyéwa, wénére majitowa we munisa guliyéwaning eserliri qoyulghan bolup, ular her xil mawzulargha béghishlan'ghan.

Körgezmini kirishme söz bilen achqan "Dunya art" galléréyisining mudiri hakimjan guliyéfning éytishigha qarighanda, bu körgezmining alahidiliki shuningdiki, qazaqistan Uyghur jem'iyiti tarixida mundaq körgezmige tunji qétim Uyghur xanim-qizlirining bir guruppisi qatnashmaqta. U bolupmu kéyinki yilliri qazaqistan Uyghur ressamliri qatarigha bir qanchilighan yash ressamlarning kélip qoshulghanliqini alahide tekitlep, ularni bir-birlep tonushturdi hem her qaysining ijadiyiti heqqide qisqiche toxtaldi.

Andin sözge chiqqan mémarchiliq penlirining doktori, proféssor behremjan ghilawdinof ressamlarning özige xas alahidiliklirini, hazirqi axbarat inqilabi dewride ulardin köp nersilerning telep qilinidighanliqini, bu körgezmining échilishining qazaqistan Uyghurliri tarixidiki chong we muhim bir weqe ikenlikini otturigha qoydi. Emdi ressam exmetjan ehet bolsa, birinchidin, Uyghur ressamliri qatarigha Uyghur qizlirining kélip qoshulushigha cheksiz xushal bolsa, ikkinchidin, ularning eserliride milliy rohning orun élishidin qattiq tesirlen'genlikini bildürdi.

Radiyomiz ziyaritini qobul qilghan "Dunya art" galléréyisining mudiri, sen'etshunasliq penlirining namzati, yazghuchi hakimjan guliyéf körgezmining alahidiliki heqqide toxtilip, mundaq dédi: "Bu bayramda er kishiler barliq xanim-qizlarni tebrikleydu. Bügün bolsa, eksiche, ressam qizlirimiz bizge özlirining soghisini teqdim qiliwatidu. Körgezmining yene bir alahidiliki, bu qazaqistan tarixida birinchi qétim boluwatidu. Almatada ijad qiliwatqan ressam qizlar xéli san'gha yétip qaptu. Shuning üchün biz ularni qollap-quwwetlesh meqsitide mushu körgezmini uyushturduq."

H. Guliyéf mezkur körgezmige qoyulghan eserlerning bedi'iylik jehettin yuqiri-töwen bolsimu, eng asasi ularda heqiqiy ressamlargha xas xususiyetlerning, qabiliyetlirining bar ikenlikini, yash Uyghur ressamlirining bir guruppisining shekillen'genlikini, buningdinmu sirt yene, ressam qizlarmu bar bolup, ularnimu bir yerge toplash arzusi barliqini bildürdi.

Melumki, ötken esirning bolupmu 70-we 80-yilliri qazaqistanda bir guruppa talantliq ressamlar meydan'gha kélip, ular Uyghur teswiriy sen'itining rawajlinishigha alahide töhpe qoshqan idi hem qoshup kelmekte. Ruslan yüsüpof, abdukérim iysa, güzel mamédinowa, küresh zulpiqarof, hashimjan qurbanof shular jümlisidindur. Emdi kéyinki ewladlar sépide kéliwatqan ressamlarning biri muhebbet hétaxunowa ziyaritimizni qobul qilip, mundaq dédi: "Bügünki körgezmige men töt ish bilen qatnishiwatimen. Ularning ichide hem kona, hem yéngi ishlirimmu bar. Asasiy mawzu Uyghur qizliri, Uyghur ussuli, medeniyiti, sen'iti. Men kichikimdin tartip süret sizghan. Buning barliqini dadam ögetken. Uning bergen bilimige men nahayiti xushal bolup ishini dawamlashturup kéliwatimen."

Uyghur ressamliri qazaqistanning bir nechchiligen sheherliride, shundaqla chet'ellerdimu uyushturuluwatqan körgezmilerge pat-patla qatniship turidu. Ularning ichidin memliketning, shundaqla her xil jem'iyetlik birleshmilerning, teshkilatlarning mukapatlirigha érishkenlermu az emes. Uyghur ressamliri shundaqla almata shehiri we nahiyilerde ötküzülüp turidighan xeyrxahliq ishliriningmu aktip ishtirakchiliridur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet