"Sepdashlar uchrishishi" pa'aliyitide 1988-yilidiki Uyghur oqughuchilar namayishi eslep ötüldi

Ixtiyariy muxbirimiz ekrem
2018-06-18
Élxet
Pikir
Share
Print
"Sepdashlar uchrishishi" pa'aliyitide 1988-yilidiki Uyghur oqughuchilar namayishi eslep ötüldi. 2018-Yili 17-iyun, gérmaniye.
"Sepdashlar uchrishishi" pa'aliyitide 1988-yilidiki Uyghur oqughuchilar namayishi eslep ötüldi. 2018-Yili 17-iyun, gérmaniye.
RFA/Ekrem

Gérmaniyening myunxén shehiride ötküzülgen "Sepdashlar uchrishishi" pa'aliyiti 17-iyun küni netijilik axirlashti.

Dunya Uyghur qurultiyining orunlashturushi bilen gérmaniyening myunxén shehiride 15-iyun bashlan'ghan "Sepdashlar uchrishishi" pa'aliyiti 3 kün dawam qilip, 17-iyun küni axirlashti. 1988-Yili ürümchide yüz bergen Uyghur aliy mektep oqughuchilirining xitayning rayondiki milliy siyasitige qarshi naraziliq namayishining 30 yilliqini xatirilesh we xitayning Uyghur élidiki "Yighiwélish lagérliri" heqqide mexsus muhakime élip bérishni meqset qilghan bu pa'aliyetke yawropadiki herqaysi döletler, shimaliy amérika qit'esidiki eller we awstraliyedin kelgen bir qisim Uyghur ziyaliyliri qatnashti.

15-Iyun küni myunxén shehiridiki Uyghur jama'iti bilen bashqa ellerdin kelgen méhmanlar birlikte myunxén sheher merkizide héyt namizi oqudi. Andin jama'et birlikte myunxéndiki Uyghur qebristanliqini ziyaret qildi we Uyghur a'ililirige kirip héyt petisi qildi. Shu küni chüshtin kéyin Uyghur jama'iti myunxéndiki xitay konsulxanisi aldida xitaygha qarshi naraziliq namayishi ötküzdi. Andin "Xelq'ara Uyghur ana til küni" ni birlikte qutlidi.

16-Iyun küni "Sepdashlar uchrishishi" muhakime yighini myunxén sheher merkizidiki konrad méhmanxanisida resmiy bashlandi. Yighinda d u q ning re'isi dolqun eysa ependi 1988-yili 6-ayning 15-küni shinjang uniwérsitétini merkez qilghan ürümchidiki aliy mektep oqughuchiliri namayishing teshkillinishi, jeryani we namayishning aldi-keynidiki weqeler heqqide tepsiliy melumat berdi.

16-Iyun ötküzülgen muhakime yighinida herqaysi ellerdin kelgen shahitlar, yeni 1988-yilidiki 15-iyun oqughuchilar namayishining bir qisim shahitliri öz béshidin ötküzgen kechmishlirini köpchilikke sözlep ötti. D u q ning sabiq re'isi, muhajirettiki Uyghur dewasining péshqedem yétekchiliridin biri bolghan erkin aliptékin ependi bilen gérmaniyediki "Ilham toxti guruppisi" ning mes'uli enwerjan ependilermu nutuq sözlep, 1988-yilidiki Uyghur oqughuchilar namayishining 30 yilliqini xatirilesh yüzisidin ötküzülgen bu pa'aliyetke yuqiri bahalar bérishti.

Bu qétimqi pa'aliyetke riyasetchilik qilghan d u q ning mu'awin re'isi perhat muhemmidi 3 kün dawamlashqan "Sepdashlar uchrishishi" pa'aliyitining netijilik ötküzülgenlikini alahide tilgha aldi. Kanadadin kelgen Uyghur ziyaliysi mukerrem qurban xanimmu "Sepdashlar uchrishishi" yighinidin hasil qilghan tesiratliri heqqide toxtaldi.

16-Iyun küni kechte dunyaning herqaysi elliridin kelgen méhmanlar we gérmaniyediki Uyghur jama'itining sheripige héytliq pa'aliyet orunlashturuldi. Pa'aliyetke chonglar we balilardin bolup yüzlerche kishi qatnashti. Myunxéndiki Uyghur jama'et erbabi ablimit tursun ependi qisqa waqit ichide orunlashturulghan bu pa'aliyetlerning nahayiti köngüllük ötküzülgenlikini bayan qildi.

16-Iyundiki muhakime yighinida yene xitayning Uyghur diyaridiki "Yighiwélish lagérliri" mesilisi muzakire qilindi we muhajirettiki milliy dewaning kélechiki heqqide qimmetlik teklip-pikirler otturigha qoyuldi.

Toluq bet